Дайындаған: Елмұрат Ораз

 

«Шабыт» баспасы

Алматы, 2022

Данияр

Қолыма қалам алып жаздым хатқа,

Мән-жайын таныстырып жамағатқа.

Ертерек өтіп кеткен замандарда,

Бір асқан бай болыпты Бағдатта.

Данияр қалай өнер тапқандығын,

Үйренсін кейінгі жас ұрпақтар да.

Мысал ғып әрбір істі айтып кеткен,

Бұрынғы аңыз етіп ғалымдар да.

Қырық күндей Бақтиярға тергеу болған,

10 Құтылуға тәмсіл айтып ол зарлаған.

Бақтияр қырық күн зарлап айтып өткен,

«Қырық бұтақ» деген содан қалған.

Дарға асу үшін бала келген,

Көп халық сөзін тыңдап көңіл бөлген.

Сөйлейін соның сөзін, халық сізге,

Бағдатта бір бай болған Махмұт деген.

Махмұт дәулеті асқан бай болыпты,

Байлығы патшаға сай болыпты.

Келгенше елу жасқа бала көрмей,

20 Дүниеде бір балаға зар болыпты.

Бұл байдың бала үшін көңілі жарым,

«Жарылқар күн болар ма бір Құдайым?

Бір күні ажал жетіп өліп кетсем,

Кім ие болып алады жиған малым?»

Айта алмас бұл қайғыны іштен жарып,

«Тәуап етсем қажыға Мекке барып,

Сарып қып Алла өзі берген малды» —

Малға бай, бала үшін болды ғарып.

Бағдатта Махмұт бай мекен еткен,

30 Жасы ұлғайып талайға келген екен.

Ие жоқ дәулетіне жүргенінде,

Елуде бір ұл бала берген екен.

Жалғызы шыққан кезде сегіз жасқа,

Беріпті ғалым дана молласына.

Қайырлы болашақтан үміт күтіп,

Тапсырып аманат қып Алласына.

Оқыды Данияр жас бірнеше жыл,

Жыл сайын балалардан озып ылғи.

Ішінен молла сынап зеректігін,

40 Даниярға көңілі толды ауып пиғыл.

Ғалымды Данияр жас асырады,

Балалықты өскен сайын қашырады.

Ғылымын өзінде бар үйренген соң,

Баласын молла әкеліп тапсырады.

Үйіне Данияр жас оралады,

Іздеуге тағы ғылым жол алады.

«Данияр» —Бақтиярдың бір бұтағы,

Сөйлейін соның жайын, тыңда мұны.

Молладан демалысқа бала келіп,

50 Әр іске зыр жүгіріп аттай желіп,

Болса да мұңсыз өскен бай баласы,

...