автордың кітабын онлайн тегін оқу  Арғымақ, сені сақтадым

Махамбет Өтемісұлы

Арғымақ, сені сақтадым,

Құлағың, сенің сергек деп.

Азамат, сені сақтадым,

Бір күніме керек деп.

Жабыдан туған жаман ат

Шаба алмайды бөжектеп.

Қырдан қиқу төгілсе,

Еділге таман үңілсе,

Арғымақтың баласы

Шабушы еді безектеп.

…Жақсыменен дос болсаң,

Басыңа қиын іс түссе,

Алдыңнан шығар ебектеп,

Жаныңа не керек деп.

…Жаманменен дос болсаң,

Айрылмас күні қос болсаң

Басыңа қиын іс түссе

Басқа кетер бөлектеп,

Қолдан берер есептеп,

Сыртыңнан жүрер өсектеп.

…Ат – жігіттің майданы,

Қылыш – жанның дәрмені,

Өлім – хақтың пәрмені…

…Атақты ермен бірге өлсе,

Жігіттің болмас арманы.

Өте шыққан қызыл гүл,

Бұ дүниенің жалғаны.