Молитвы для здоровья. Все самые важные молитвы, чтобы уберечь себя и близких

Ирина Булгакова

Молитва ко Пресвятой Богородице пред иконою Ее «Всех скорбящих Радость»
Молитва перед образом Пресвятой Богородицы «Всех скорбящих Радость» приносит утешение в скорбях, исцеляет душевные недуги.

О, Пресвята́я Влады́чице Богоро́дице, Преблагослове́нная Ма́ти Христа́ Бо́га Спаси́теля на́шего, всех скорбя́щих Ра́досте, больны́х посеще́ние, немощны́х покро́ве и засту́пнице, вдо́виц и си́рых покрови́тельнице, ма́терей печа́льных всенаде́жная уте́шительнице, младе́нцев немощны́х кре́посте, и всем безпомо́щным всегда́ гото́вая по́моще и ве́рное прибе́жище! Тебе́, о, Всеми́лостивая, даде́ся от Всевы́шняго благода́ть во е́же всех заступа́ти и избавля́ти от ско́рби и боле́зней, зане́ Сама́ лю́тыя ско́рби и боле́зни претерпе́ла еси́, взира́ющи на во́льное страда́ние Сы́на Твоего́ возлю́бленнаго и Того́ на кресте́ распина́ема зря́щи, егда́ ору́жие Симео́ном предрече́нное се́рдце Твое́ про́йде. Те́мже у́бо, о Ма́ти чадолюби́вая, вонми́ гла́су моле́ния на́шего, уте́ши нас в ско́рби су́щих, я́ко ве́рная ра́дости Хода́таица: предстоя́щи престо́лу Пресвяты́я Тро́ицы, одесну́ю Сы́на Твоего́, Христа́ Бо́га на́шего, мо́жеши, а́ще восхо́щеши, вся нам поле́зная испроси́ти. Сего́ ра́ди с ве́рою серде́чною и любо́вию от души́ припа́даем к Тебе́ я́ко Цари́це и Влады́чице и псало́мски вопи́ти Тебе́ дерза́ем: слы́ши, Дщи́, и виждь, и приклони́ у́хо Твое́, услы́ши моле́ние на́ше, и изба́ви нас от обстоя́щих бед и скорбе́й; Ты бо проше́ния всех ве́рных, я́ко скорбя́щих ра́дость, исполня́еши, и душа́м их мир и утеше́ние пода́вши. Се зри́ши беду́ на́шу и ско́рбь: яви́ нам ми́лость Твою́, посли́ утеше́ние уя́звленному печа́лию се́рдцу на́шему, покажи́ и удиви́ на нас гре́шных бога́тство милосе́рдия Твоего́, пода́ждь нам сле́зы покая́ния ко очище́нию грехо́в на́ших и утоле́нию гне́ва Бо́жия, да с чи́стым се́рдцем, со́вестию благо́ ю и наде́ждою несумне́нною прибега́ем ко Твоему́ хода́тайству и заступле́нию: приими́, всеми́лостивая на́ша Влады́чице Богоро́дице, усе́рдное моле́ние на́ше Тебе́ приноси́мое, и не отри́ни нас, недосто́йных, от Твоего́ благосе́рдия, но пода́ждь нам избавле́ние от ско́рби и боле́зни, защити́ нас от вся́каго наве́та вра́жия и клеветы́ челове́ческая, бу́ди нам помо́щница неотсту́пная во все дни жи́зни на́шея, я́ко да под Твои́м ма́терним покро́вом всегда́ пребу́дем це́ли и сохране́ни Твои́м заступле́нием и моли́твами к Сы́ну Твоему́ и Бо́гу Спаси́телю на́шему, Ему́же подоба́ет вся́кая сла́ва, че́сть и поклоне́ние, со безнача́льным Его́ Отце́м и Святы́м Ду́хом, ны́не и при́сно и во ве́ки веко́в. Ами́нь.

Молитвы об исцелении от алкоголизма и наркомании
Молитвы ко Пресвятой Богородице пред иконою Ее «Неупиваемая чаша»
Перед иконой Божией Матери «Неупиваемая чаша» молятся об исцелении от курения, наркомании, алкоголизма.

Молитва 1-я
О, Премилосе́рдая Влады́чице! К Твоему́ заступле́нию ны́не прибега́ем, моле́ний на́ших не пре́зри, но ми́лостивно услы́ши нас: жен, дете́й, матере́й и тя́жким неду́гом пиа́нства одержи́мых, и того́ ра́ди от ма́тере своея́ – Це́ркви Христо́вой и спасе́ния отпа́дающих бра́тьев и сесте́р и сро́дник на́ших исцели́. О, Ми́лостивая Ма́ти Бо́жия, косни́ся серде́ц их и ско́ро возста́ви от паде́ний грехо́вных, ко спаси́тельному воздержа́нию приведи́ их. Умоли́ Сы́на Своего́, Христа́ Бо́га на́шего, да прости́т нам согреше́ния на́ша и не отврати́т ми́лости Своея́ от люде́й Свои́х, но да укрепи́т нас в трезве́нии и целому́дрии. Приими́, Пресвята́я Богоро́дице, моли́твы матере́й, о ча́дех свои́х сле́зы пролива́ющих, жен, о муже́х свои́х рыда́ющих, чад, си́рых и убо́гих, заблу́ждшими оста́вленных, и всех нас, к ико́не Твое́й припа́дающих. И да прии́дет сей вопль наш, моли́твами Твои́ми, ко Престо́лу Всевы́шняго. Покры́й и соблюди́ нас от лука́ваго ловле́ния и всех ко́зней вра́жиих, в стра́шный же час исхо́да на́шего помози́ пройти́ непреткнове́нно возду́шныя мыта́рства, моли́твами Твои́ми изба́ви нас ве́чнаго осужде́ния, да покро́ет нас ми́лость Бо́жия в несконча́емые ве́ки веко́в. Ами́нь.

Молитва 2-я
Цари́це на́ша Преблага́я, наде́ждо на́ша, Пресвята́я Богоро́дице, прия́телище си́рых и стра́нных Засту́пнице, бе́дствующих по́моще и озло́бленных покро́ве. Зри́ше на́шу беду́, зри́ше на́шу скорбь: отвсю́ду искуше́ниями одержи́мы есмы́, а заступа́ющего несть. Ты у́бо Сама́ помози́ нам, я́ко не́мощны, окорми́, я́ко стра́нны, наста́ви нас, я́ко заблу́дших, уврачу́й и спаси́ нас, я́ко безнаде́жных. Не и́мамы ины́я по́мощи, ни ина́го предста́тельства, ни утеше́ния, то́кмо Тебе́, о Ма́ти всех ско́рбных и обремене́нных. При́зри на нас, гре́шных и во озлобле́нии су́щих, покры́й нас честны́м Твои́м омофо́ром, да изба́влени бу́дем от зол, обыше́дших нас, наипа́че же пия́нства. Да восхва́лим всегда́ Пресвято́е и́мя Твое́. Ами́нь.

Молитвы об исцелении от душевных болезней
Молитва ко Пресвятой Богородице пред иконою Ее «Достойно есть» («Милующая»)
Молитва перед чудотворной иконой Божией Матери «Достойно есть» дарует исцеление в телесных и душевных страданиях, помогает при тяжелых болезнях, эпидемиях или несчастных случаях.

О, Пресвята́я и Преми́лостивая Влады́чице Богоро́дице! Припа́дая к святе́й ико́не Твое́й, смире́нно мо́лимся Тебе́, вонми́ гла́су моле́ния на́шего, виждь ско́рби, виждь беды́ на́ша и, я́ко любвеоби́льная Ма́ти, потщи́ся на по́мощь нам безпо́мощным, умоли́ Сы́на Твоего́ и Бо́га на́шего: да не погуби́т нас за беззако́ния на́ша, но яви́т нам человеколю́бно свою́ ми́лость. Испроси́ нам, Влады́чице, у бла́гости Его́ теле́сное здра́вие и душе́вное спасе́ние, и ми́рное житие́, земли́ плодоно́сие, возду́ха благорастворе́ние, и благослове́ние свы́ше на вся блага́я дела́ и начина́ния на́ша. И я́коже дре́вле призре́ла еси́ ми́лостиво на смире́нное славосло́вие послу́шника Афо́нскаго, воспева́вшего Тя пред пречи́стою ико́ною Твое́ю и посла́ла еси́ к нему́ А́нгела научи́ти его́ пе́ти песнь небе́сную, е́юже славосло́вят Тя А́нгели; та́ко и ны́не приими́ на́ше усе́рдное молитвосло́вие, Тебе́ принос и́мое. О, Цари́це Всепе́тая! Простри́ ко Го́споду богоно́сныя Твоя́ ру́це, и́миже Богомладе́нца Иису́са Христа́ носи́ла еси́, и умоли́ Его́ изба́вити нас от вся́каго зла. Яви́, Влады́чице, Твою́ ми́лость к нам: боля́щия исцели́, скорбя́щия уте́ши, бе́дствующим помози́ и сподо́би нас благоче́стно житие́ сие́ земно́е соверши́ти, христиа́нскую непосты́дную кончи́ну получи́ти и Небе́сное Ца́рствие насле́дити ма́терним хода́тайством Твои́м к Ро́ждшемуся от Тебе́ Христу́ Бо́гу на́шему, Ему́же со Безнача́льным Его́ Отце́м и Пресвяты́м Ду́хом подоба́ет вся́кая сла́ва, честь и поклоне́ние, ны́не и при́сно и во ве́ки веко́в. Ами́нь.