Дайындаған: Елмұрат Ораз

 

«Шабыт» баспасы

Алматы, 2022

Жетім Мәриям

Қазақта қалмай жүрген ата салты,

Милләтқа қызмет етіп тыймақ салтты.

Көз салған ілгергіде біреуі жоқ,

Артында тамам елдің қалды жалқы.

Дау-жанжал арасында үзілмейді,

«Бұрынғы атам жүрген ізі» дейді.

Малы көп бір кәрінің қатыны өлсе,

«Бар екен пәленшенің қызы» дейді.

Тоздырар өтірікпенен иман жүзін,

10 Кемітпес қалыңмалдың жүзден ізін.

Қызықты қалың үшін мал көрсетсе,

Беруге ұялмайды шалға қызын.

Туысқан партия үшін жау болады,

Жанжалдан қашан қазақ сау болады.

Қыз байғұс теңіменен кете қалса,

Аяғы ұлы дүбір, дау болады.

Болады кейбіреулер қарсы құда,

Түбінде түзу құда болмас бұ да.

Бір жерге екі көңіл хош келмесе,

20 Апаттан мағсұмалар болар жүдә.

Осындай іс көп болды біздің елде,

Жазамын көзбен көріп мұны мен де.

Басқұдық болысында, жетінші ауыл,

Қараған Керекудің уезінде.

Ерте уақытта Басқұдық болысы, қазір Бесқарағай ауданы, жетінші ауыл, Павлодар облысында Нұржан, Н

...