Хвоі гавораць

Кузьма Чорны

Чалавек яшчэ не пэвен, пакуль многага яшчэ не зробіць...
Тады я падумаў:
«Чалавек, значыцца, аба многім павінен даведацца...»

Над шырокай зямлёй пахне восенню, і яснымі днямі дзьме густы вецер. І шумяць-шумяць кусты над глыбакадумнаю рэчкай...

Ясна ад сонца і шырока ад першага подыху блізкай восені. Слаўна пахне з садоў бэрамі, блішчаць першыя ніці белага павуціння; скрыпяць на вуліцы вазы - возяць позні авёс, але ціха ад пажаўцеўшых клёнаў... Плюхае вада і спяваюць пеўні.