Канон безплотным силам

Творение Иоанна монаха

Глас 8

Песнь 1

Ирмос: Песнь возсле́м, лю́дие, / чу́дному Бо́гу на́шему, / свободи́вшему Изра́иля от рабо́ты, / Песнь побе́дную пою́ще и вопию́ще: / по́ем Тебе́, Еди́ному Влады́це.

Припев: Святи́и Арха́нгели и Ангели, моли́те Бо́га о нас.

Вси воспои́м, ве́рнии, / вся управля́ющую невеще́ственныя Горних ли́ков чинонача́лия, Тро́ицу несозда́нную: / Свят, Свят, Свят еси́, вопию́ще, Бо́же Вседержи́телю.

Положи́л еси́ тва́рей нача́ло, существо́ Безпло́тное, Тво́рче Ангелов, / пречи́стый Твой Престо́л окружа́ющее, зва́ти Тебе: / Свят, Свят, Свят еси́, Бо́же Вседержи́телю.

Слава: Ра́дуйся, Гаврии́ле, тайновидче Бо́жия воплоще́ния, / Михаи́ле же, чино́в невеще́ственных предста́телю, непреста́нно зову́ще: / Свят, Свят, Свят еси́, Бо́же Вседержи́телю.

И ныне: Трепе́щу та́инства, Христе́, Твоего́ снизхожде́ния, / я́ко Иже естество́м Бог, прия́л еси́ от Де́вы роди́тися я́ко Челове́к, / да спасе́ши мир от рабо́ты проти́внаго.

Песнь 3

Ирмос: Страх Твой, Го́споди, / всади́ в сердца́ раб Твои́х / и бу́ди нам утвержде́ние, / Тя во и́стине призыва́ющих.

Кре́постию поставил еси́, Безсме́ртне, си́льныя, / соверша́ющия всесвятую Твое́ волю, / Тебе́ в вы́шних всегда́ предстоя́щия.

Таинники Твоего́ вочелове́чения и честна́го воста́ния, / Ангельския чинонача́льники, Христе́, за ны приими́ моля́щияся.

Слава: Ангелы приста́вил еси́ храни́тели челове́ком, / я́ко Благоутро́бен, / служи́тели же показа́л еси́, Христе́, спасе́ния Твои́х уго́дников.

И ныне: Неизрече́нно зачала еси Го́спода и Спаса, Богоневесто, / изба́вляющего ны от лютых, Тя вои́стинне призыва́ющия.

Седален, глас 8. Подобен: Повеленное:

Небе́сных нача́льницы и первостоя́телие высокопресто́льных и стра́шных / Боже́ственныя сла́вы Михаи́ле и Гаврии́ле Архистрати́зи, / А́нгелов чинонача́льницы, со всеми Безпло́тными, / о служи́телие Влады́чни! / О ми́ре непреста́нно моля́щеся, / испроси́те оставле́ние прегреше́ных на́ших, / и ми́лость, и благода́ть обрести́ в день су́дный.

Слава, и ныне, Богородичен: Богоблагода́тная, Чи́стая, Благослове́нная, благоутро́бия ра́ди ще́дрот из Тебе́ Ро́ждшагося / с вы́шними Си́лами, и Арха́нгелы, и всеми Безпло́тными моли́ непреста́нно / пода́ти нам пре́жде конца́ ми́лостивно проще́ние грехо́в / и жития́ исправле́ние, я́ко да обря́щем ми́лость.

Песнь 4

Ирмос: Всел еси́ на ко́ни, апо́столы Твоя́, Го́споди, / и прия́л еси́ рука́ма Твои́ма узды́ их, / и спасе́ние бысть ежде́ние Твое́ / ве́рно пою́щим: / сла́ва си́ле Твое́й, Го́споди.

Всел еси́ на А́нгелы, я́коже на ко́ни, Человеколю́бче, / и прия́л еси́ руко́ю Твое́ю брозды́ их, / и спасе́ние бысть ежде́ние Твое́ непреста́нно вопию́щим: / сла́ва си́ле Твое́й, Го́споди.

Покрыва́ет А́нгелы доброде́тель Твоя́, Человеколю́бче, / и земли́ исполня́ет концы́ Твоего́ сла́внаго, Безнача́льне, Боже́ственнаго хвале́ния, / с ни́ми Тебе́ вопию́щи: / сла́ва си́ле Твое́й, Го́споди.

Слава: Изше́л еси́, ще́дре, на спасе́ние люде́й Твои́х, Христе́, / созыва́еши же дру́ги, Си́лы Твоя́, / и весе́лие бысть прише́ствие Твое́ ве́рно Тебе́ вопию́щим: / сла́ва си́ле Твое́й, Го́споди.

И ныне: Де́ва и Ма́ти преесте́ственно яви́лася еси́, Всечи́стая, / я́ко Бо́га, Того́жде и Челове́ка Христа́, ро́ждшая. / Ему́же со стра́хом вопию́т А́нгельския чи́ни: / сла́ва си́ле Твое́й, Го́споди.

Песнь 5

Ирмос: От но́щи неве́дения / по душелови́тельному пути́ при́сно блудя́щаго, / све́том ра́зума Твоего́, Го́споди, преднаставля́я мя, / на стезю́ за́поведей Твои́х напра́ви.

Невозвра́тным жела́нием при́сно к высоте́, / к Тебе́, Христе́, носи́ми, кра́йнейшему всех жела́ний, / А́нгельския си́лы непреста́нно Тя сла́вят.

Ты у́мныя по существу́, нетле́нныя благода́тию Твое́ю, Христе́, / устро́ил еси́ песнопе́вцы Твоего́ вели́чества, / А́нгелы Твои́, по о́бразу соде́лав, Непостижи́ме.

Слава: Ты непрекло́нны на го́ршее к Тебе́ приближе́нием, Христе́, / сохрани́л еси́ Твоя́ слуги́, / исто́чник бо бла́гости Ты еси́, / благотвори́ши досто́йно Тебе́ служа́щия.

И ныне: Умерщвле́нную мою́ ду́шу страстьми́ ме́рзкими, Всенепоро́чная, оживи́, / жи́зни Храни́теля ро́ждшая, / и к стези́ ве́чней, и блаже́нней жи́зни упра́ви.

Песнь 6

Ирмос: Ио́ну в ки́те, Го́споди, / еди́наго всели́л еси́, / мене́ же, свя́заннаго мре́жами вра́жиими, / я́ко от тли о́наго, спаси́.

Боголе́пне от не су́щих, Го́споди, / сло́вом Твои́м приве́л еси́ существа́ Небе́сных безсме́ртных во́инств, / светови́дны ты́я соде́ловая.

Таи́нницы честни́и Бо́жия хвале́ния бы́сте Безпло́тнии, / гра́ждане Небе́сныя и Боже́ственныя и́стинно ски́нии, / Творцу́ досто́йно служа́ще.

Слава: Безпло́тных чи́ни у́мнии / Тя, Сы́не Бо́жий пребезнача́льный, хва́лят непреста́нно / и славосло́вят, я́ко Творца́ и Созда́теля вся́ческих.

И ныне: Со Отце́м в вы́шних, Пречи́стая, безнача́льне седя́щаго, / на объя́тиих Твои́х восклони́ти сподо́билася еси́: / Его́же нам пода́ждь, Чи́стая, рабо́м Твои́м, Ми́лостива.

Кондак, глас 2:

Архистрати́зи Бо́жии, / служи́телие Боже́ственныя сла́вы, / А́нгелов нача́льницы и челове́ков наста́вницы, / поле́зное нам проси́те и ве́лию ми́лость, / я́ко Безпло́тных Архистрати́зи.

Икос:

Рекл еси́, Человеколю́бче, в Писа́ниих Твои́х / мно́жеству ра́доватися А́нгелов на Небеси́ / о челове́це еди́ном ка́ющемся, Безсме́ртне. / Те́мже мы, и́же в беззако́ниих, Безгре́шне, / еди́не Сердцеве́дче, / Тя моли́ти всегда́ дерза́ем, я́ко Благоутро́бнаго, / уще́дрити и низпосла́ти недосто́йным умиле́ние, Влады́ко, / подая́й нам проще́ние: / о всех бо нас мо́лятся Тебе́ Безпло́тных Архистрати́зи.

Песнь 7

Ирмос: О́троцы евре́йстии в пещи́ / попра́ша пла́мень дерзнове́нно / и на ро́су огнь преложи́ша, вопию́ще: / благослове́н еси́, Го́споди Бо́же, во ве́ки.

Све́ты яви́л еси́, ще́дре, А́нгелов Твои́х невеще́ственное существо́, / неизрече́ннаго све́та исполня́еми непреста́нно, / благослове́н еси́, зову́щия, Бо́же во ве́ки.

Ему́же предстоя́т непреста́нно, служа́ще, тьмы А́нгелов, / ли́ца же зре́ти не терпя́т зре́ния, / благослове́н еси́, зову́ще, Го́споди Бо́же, во ве́ки.

Слава, и ныне: Сло́вом Твои́м Ипоста́сным А́нгельское естество́ соде́лал еси́, / освяти́в же Боже́ственным Ду́хом, / Тро́ицу Богосло́вити научи́л еси́, Бо́же, во ве́ки.

Троичен: Три у́бо, у́мствующе, Ипоста́си, неопи́санное сла́вим Существо́, / Отца́, Сло́ва со Ду́хом, вопию́ще: / благослове́н еси́, Го́споди Бо́же, во ве́ки.

Песнь 8

Ирмос: На горе́ святе́й просла́вльшася, / и в купине́ огне́м / Присноде́вы Моисе́ови та́йну я́вльшаго, / Го́спода по́йте / и превозноси́те во вся ве́ки.

А́нгельскому поревну́им житию́, и мы́сли впери́м к высоте́, / и с ни́ми невеще́ственно воспои́м Го́спода, / пою́ще и превознося́ще во вся ве́ки.

Лико́вственницы ликова́ния Небе́снии, / Престо́л обстоя́ще сла́вы, / о́крест Бо́га же всегда́ обраща́ющеся, / А́нгели пою́т и превозно́сят Его́ во вся ве́ки.

Слава: Невеще́ственнаго огня́ творя́щей пла́мень, / на высоте́ непреста́нно служа́щия, и А́нгелы ду́хи явля́ющей, / Тро́ице покланя́емся и славосло́вим во вся ве́ки.

И ныне: Ему́же на Небеси́ предстоя́т с тре́петом тьмы А́нгел и Арха́нгел, / Того́ на объя́тиих носи́ти сподо́билася еси́, Богоро́дице, / моли́ спасти́ся славосло́вящим Его́ во вся ве́ки.

Песнь 9

Ирмос: Уста́вы прешла́ еси́ естества́, / Соде́теля заче́нши и Го́спода, / и дверь спасе́ния ми́рови была́ еси́. / Тем Тя, Богоро́дице, / непреста́нно велича́ем.

Тя, неизрече́нно соедини́вшаго небе́сным, Христе́, земна́я / и еди́ну Це́рковь соверши́вша А́нгелов и челове́ков, / непреста́нно велича́ем.

А́нгели же и Арха́нгели, / Престо́ли, Вла́сти и Госпо́дства, / Нача́ла же и Си́лы, Херуви́ми и Серафи́ми, / с Богоро́дицею о ми́ре моли́теся.

Слава: Всех предста́телие показу́ющиися, Михаи́л с Гаврии́лом, / посети́те от любве́ чту́щия всепра́зднственную па́мять ва́шу и ве́рно воспева́ющия: / спаса́йте от вся́каго обстоя́ния.

И ныне: Ра́дуйся, свята́я Богоневе́сто! / Ра́дуйся, Свет ми́ру ро́ждшая ве́рным! / Ра́дуйся, стено́ и покро́ве всех нас: / Бо́га, я́ко Благоде́теля за ны, непреста́нно моли́.

Светилен.

О́гненных, Архистрати́же, слуг предста́тельство от Отца́ прия́л еси́ Михаи́ле, све́тов, / тем и сия́ние Того́ сла́вы сия́ющее и́маши,/ окру́г пречи́стаго Престо́ла ты предстоя́, / я́ко пе́рвый Невеще́ственных чино́в.

Слава: Невеще́ственных Сил, Арха́нгел и А́нгел, / Госпо́дьств, и Престо́л, и Нача́л предста́тель пред Бо́гом постоя́нный, / Архистрати́же Боже́ственне, Михаи́ле пресла́вне, / нестерпи́мому бо Престо́лу предстоя́й, / покры́й, соблюди́, сохрани́ и спаси́ вся, ве́рою тя почита́ющия, / мирска́го предста́теля.

И ныне, Богородичен: Честне́йшая еси́ Херуви́м сла́вных и Серафи́м, Всепе́тая, / стра́шных без сравне́ния сла́внейшая / и всех святы́х А́нгел святе́йшая, Пречи́стая: / Зижди́теля бо всех пло́тски неизрече́нно родила́ еси́, Богоро́дице. / Его́же моли́ рабо́м Твои́м разреше́ние дарова́ти прегреше́ний.

Молитва всем чинам Ангельским

Вси святи́и Небе́сные беспло́тные Си́лы, удосто́йте меня́ си́лы сокруша́ть все зло и стра́сти под но́ги мои́.

Святи́и беспло́тные Серафи́мы, удосто́йте меня́ име́ть пламене́ющее се́рдце к Бо́гу.

Святи́и беспло́тные Херуви́мы, удосто́йте меня́ име́ть прему́дрость для сла́вы Бо́жией.

Святи́и беспло́тные Престо́лы, удосто́йте меня́ различа́ть и́стину от непра́вды.

Святи́и беспло́тные Го́сподства, удосто́йте меня́ госпо́дствовать над страстя́ми, что́бы дух поработи́л плоть.

Святи́и беспло́тные Си́лы, удосто́йте меня́ име́ть му́жество в исполне́нии во́ли Бо́жией.

Святи́и беспло́тные Вла́сти, удосто́йте меня́ име́ть си́лу побе́ды над злом.

Святи́и беспло́тные Нача́ла, удосто́йте меня́ служи́ть Го́споду Бо́гу в непоро́чности се́рдца и дел рук мои́х.

Святи́и беспло́тные Арха́нгелы, удосто́йте меня́ исполня́ть во́лю Го́спода на́шего на́шего Иису́са Христа́.

Святи́и беспло́тные А́нгелы, удосто́йте меня́ руково́дствоваться за́поведями Бо́жиими во все дни жи́зни мое́й.

Молитва всем святым и безплотным Небесным Силам

Бо́же Святы́й и во святы́х почива́яй, трисвяты́м гла́сом на Небеси́ от А́нгел воспева́емый, на земли́ от челове́к во святы́х Свои́х хва́лимый; да́вый Святы́м Твои́м Ду́хом коему́ждо благода́ть по ме́ре дарова́ния Христо́ва, и то́ю поста́вивый Це́ркви Твое́й святе́й о́вы Апо́столы, о́вы проро́ки, о́вы же благове́стники, о́вы па́стыри и учи́тели, и́хже сло́вом про́поведи, Тебе́ Самому́ де́йствующему вся во всех, мно́зи соверши́шася святи́и в ко́емждо ро́де и ро́де, разли́чными доброде́тельми благоугоди́вшии Тебе́, и к Тебе́, нам о́браз до́брых по́двигов свои́х оста́вивше, в ра́дости преше́дшии, гото́ви, в не́мже са́ми искуше́ни бы́ша, и нам напа́ствуемым помога́ти. Сих святы́х всех воспомина́я и их богоуго́дное похваля́я житие́, Тебе́ Самаго́ в них де́йствовавшаго восхваля́ю и о́нех благотворе́ния Твоя́ дарова́ния бы́ти ве́руя, приле́жно молю́ Тя, Свя́те святы́х, даждь ми, гре́шному, после́довати их уче́нию, житию́, любве́, ве́ре, долготерпе́нию, и их моли́твенною по́мощию, па́че же Твое́ю вседе́йствующею благода́тию, небе́сныя с ни́ми сподо́битися сла́вы, хва́ляще Пресвято́е и́мя Твое́, Отца́ и Сы́на и Свята́го Ду́ха во ве́ки. Ами́нь.

Архангел Михаил. 1676. Симон Ушаков

Иной Канон Безплотным Силам

Творение тогожде Иоанна монаха

Глас 8

Песнь 1

Ирмос: Колесницегони́теля фарао́ня погрузи́ / чудотворя́й иногда́ / моисе́йский жезл, крестообра́зно порази́в / и раздели́в мо́ре, / Изра́иля же беглеца́, пешехо́дца, спасе́, / Песнь Бо́гови воспева́юща.

Припев: Святи́и Арха́нгели и Ангели, моли́те Бо́га о нас.

Умныя безпло́тных чино́в ли́ки / Пе́сньми, я́ко служи́тели Боже́ственныя, прииди́те, восхва́лим, ли́к совоку́пльше, / о на́шем спасе́нии непреста́нно моля́щияся и о покая́нии на́шем сра́дующияся.

Иже Ангелов началовожди́, и предъизбра́ннии, и чинонача́льницы све́тлии, / Безпло́тныя умы́ дне́сь воздви́жут к наверше́нию пра́здника све́тлыя и́х па́мяти, / с ни́миже ку́пно ра́дуются челове́цы, пе́ние Тро́ице принося́ще.

Да возвесели́мся со Ангелы дне́сь, челове́цы, духо́вне в ра́дости: / Гаврии́л бо па́ки ны́не благовеству́ет Це́рквей соедине́ние / и низложе́ние вся́кия проти́вныя е́реси / в па́мяти Архистрати́гов.

Богородичен: Ражда́еши су́щее па́че естества́, Пречи́стая, / в Тебе́ все́льшееся Отчее Сло́во Ду́хом Святы́м, / во дву́ у́бо естества́х и хоте́ниих су́ща, / во Ипоста́си же непрело́жно еди́ней, / Ея́же и зра́к целу́ем.

Песнь 3

Ирмос: Ты́ еси́ утвержде́ние притека́ющих к Тебе́, Го́споди, / Ты́ еси́ све́т омраче́нных, / и пое́т Тя́ ду́х мо́й.

Ангелов пе́рвейший и Тро́ицы све́т вторы́й / яви́лся еси́ на́м, Михаи́ле нача́льниче, / ве́рно благохва́лящим тя́.

Заре́ю Боже́ственныя благода́ти Гаврии́л ве́рно испо́лни всю́ зе́млю, / Бо́жие пропове́дав во пло́ти прише́ствие.

Арха́нгели приснопева́емии и светоза́рная дво́ице невеще́ственный, све́т Бо́жий, / ве́рно соверша́ющим ва́шу па́мять покажи́те.

Богородичен: Воспе́ Иса́ия Твое́, е́же па́че ума́, Чи́стая, рождество́, / пою́ и а́з, да о́наго получу́ очище́ния.

Седален, глас 8. Подобен: Повеленное

Небе́сных нача́льницы и первостоя́телие высокопресто́льных и стра́шных, / Боже́ственныя сла́вы, Михаи́ле и Гаврии́ле Архистрати́зи, / Ангелов чинонача́льницы, со все́ми Безпло́тными, / о служи́телие Влады́чни! / О ми́ре непреста́нно моля́щеся, / испроси́те оставле́ние прегреше́нных на́ших, / и ми́лость, и благода́ть обрести́ в де́нь су́дный.

Слава, и ныне: Богородичен:

Богоблагодатная, Чистая, Благословенная, благоутробия ради щедрот из Тебе Рождшагося, / с вышними Силами, и Архангелы, и всеми Безплотными моли непрестанно / подати нам прежде конца милостивно прощение грехов / и жития исправление, яко да обрящем милость.

Песнь 4

Ирмос: Ты́ моя́ кре́пость, Го́споди, / Ты́ моя́ и си́ла, / Ты́ мо́й Бо́г, Ты́ мое́ ра́дование, / не оста́вль не́дра Отча, / и на́шу нищету́ посети́в. / Те́м с проро́ком Авваку́мом зову́ Ти: / си́ле Твое́й сла́ва, Человеколю́бче.

Во Иерихо́не яви́ся си́лы Госпо́дни Архистрати́г вою́ющему дре́вле Иису́су Нави́ну, / победотворя́ и побо́рствуя, Михаи́л вели́кий, Безпло́тных нача́льник сы́й, / от него́же прие́м си́лу, слуга́ Госпо́день, / копие́м плени́в, я́т сопоста́ты.

Нача́льник не́когда Безпло́тных си́л яви́ся, нося́ ча́да благове́щения, / Заха́рии иере́ю Гаврии́л вели́кий и Боже́ственный и́стинно Арха́нгел, / те́мже гла́с Словесе́ роди́выйся Иоа́нн отцу́ своему́ гла́с проглаго́лания отдае́т.

Ра́дуются ра́достию вси́ концы́ земни́и дне́сь, / честне́ю па́мять пра́зднующе Арха́нгелов Твои́х, Бо́же, / Михаи́ла Боже́ственнаго и Гаврии́ла Богому́драго; / сра́дуется же ку́пно и ве́сь Ангельский чи́н, / я́ко сохраня́ется ми́р покро́вом и́х.

Богородичен: Еди́на Чи́стая пребыла́ еси́ и по рождестве́, / еди́на то́кмо яви́лася еси́ Безму́жная, млеко́м пита́ющая Сло́во Отчее и́стинное, / Ду́хом Святы́м прие́мшее ра́бий зра́к по на́м, Де́во Богоро́дице, / Его́же, Боже́ственное чту́ще зра́ка подо́бие, почита́ем.

Песнь 5

Ирмос: Вску́ю мя́ отри́нул еси́ / от лица́ Твоего́, Све́те Незаходи́мый, / и покры́ла мя́ е́сть чужда́я тма́, окая́ннаго, / но обрати́ мя и к све́ту за́поведей Твои́х / пути́ моя́ напра́ви, молю́ся.

Непокаря́ющуся дре́вле Бо́жиим неизрече́нным / и Боже́ственным чудесе́м Валаа́му волхву́, / на распу́тии Ангел, в виде о́сли яви́вся, стра́шно обличи́ / и, слове́сно живо́тное показа́в, естества́ премени́ позна́ние.

Яту бы́вшу Петру́ и в темни́це пребыва́ющу, / Ангел яви́ся Бо́жий, от ру́к Иродовых, и у́з, и сме́рти избавля́я. / Те́мже, прииди́те вси́, я́ко ду́ш храни́тели Боже́ственныя, / му́дрыя Арха́нгелы да почти́м.

Бра́ней крамолы́, Ангели, Арха́нгели, Боже́ственныя си́лы Бо́жия, / и церко́вныя е́реси, и вся́ собла́зны ва́шими разреши́те к Бо́гу при́сными мольба́ми / и на́с в ми́ре соблюди́те.

Богородичен: Во дву́ существа́х Еди́наго Тя́ ве́мы, Бо́га тва́ри, / де́йствы обе́ма и хоте́нии су́ща несли́тна, Сы́на Бо́жия, отжени́ пло́ть прии́мша, / Ея́же о́браз почита́ем на дщи́цах.

Песнь 6

Ирмос: Очи́сти мя́, Спа́се, / мно́га бо беззако́ния моя́, / и из глубины́ зо́л возведи́, молю́ся: / к Тебе́ бо возопи́х, и услы́ши мя́, / Бо́же спасе́ния моего́.

Яко о́гнь, и пла́мень, и све́т, безпло́тныя су́щия, / от веще́ственныя тли́ умо́м восперя́еми, / бре́нными устна́ми невеще́ственныя, со стра́хом Пе́сньми да почти́м.

Умертви́те страсте́й бу́ри, Арха́нгели, / и утиши́те с ни́ми возмуще́ния вся́ на ве́ру, / Святи́и Тро́ицы су́ще огнезра́чнии Архистрати́зи.

Арха́нгели Бо́жии, Безпло́тных нача́льницы, / предста́тельством ва́шим от вся́кия е́реси на́с сохрани́те, / Михаи́ле нача́льниче и Гаврии́ле, Архистрати́зи.

Богородичен: Из утро́бы яви́лся еси́ во́лею, от Неискусому́жныя воплоща́ем, / безпло́тен Сы́й, я́ко Бо́г, Христе́, / плотоно́сец же, я́ко Челове́к, бы́л еси́. / Его́же подо́бия, ве́рнии, ви́д почита́ем.

Кондак, глас 2:

Архистрати́зи Бо́жии, / служи́телие Боже́ственныя сла́вы, / Ангелов нача́льницы и челове́ков наста́вницы, / поле́зное на́м проси́те, и ве́лию ми́лость, / я́ко Безпло́тных Архистрати́зи.

Икос:

Ре́кл еси́, Человеколю́бче, в Писа́ниих Твои́х / мно́жеству ра́доватися Ангелов на Небеси́ / о челове́це еди́ном ка́ющемся, Безсме́ртне. / Те́мже мы́, и́же в беззако́ниих, Безгре́шне, / еди́не Сердцеве́дче, / Тя́ моли́ти всегда́ дерза́ем, я́ко Благоутро́бнаго, / уще́дрити и низпосла́ти недосто́йным умиле́ние, Влады́ко, / подая́й на́м проще́ние: / о все́х бо на́с мо́лятся Тебе́ Безпло́тных Архистрати́зи.

Песнь 7

Ирмос: От Иуде́и доше́дше, о́троцы, / в Вавило́не иногда́, / ве́рою Тро́ическою пла́мень пе́щный попра́ша, пою́ще: / отце́в Бо́же, благослове́н еси́.

С ли́ки безпло́тных и челове́ческий ро́д, / прииди́те, поклони́мся в благознамени́тый де́нь се́й, / па́мять соверша́юще му́дрых Арха́нгелов Христо́вых, / Свя́т, Свя́т, Свя́т, пою́ще, Бо́же оте́ц на́ших.

Яко страннолюби́вии дре́вле, Авраа́м богови́дец и Ло́т сла́вный, / сретоша Ангелы и обрето́ша обще́ние со Ангелы, зову́ще: Свя́т, Свя́т, Свя́т еси́, Бо́же оте́ц на́ших.

Мано́ю до́блественному и Тови́ту прему́дрому яви́шася Ангели, / воздаю́ще натрижне́ния[1] жития́ по досто́инству; / и отроко́в Ангел угаси́ пла́мень иногда́, / в пещи́ о́гненней су́щих.

Богородичен: Все́ на́ше по существу́ от Де́вы поне́сл еси́, кроме́ измене́ния, Иису́се, / естествы́ сугу́ба, но еди́наго Ипоста́сию, оте́чески Тя́ пропове́дуем, / Его́же и ви́д ве́рно почита́ем, изобразу́юще.

Песнь 8

Ирмос: Седмери́цею пе́щь / халде́йский мучи́тель / Богочести́вым неи́стовно разжже́, / си́лою же лу́чшею спасе́ны сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, / лю́дие, превозноси́те во вся́ ве́ки.

Нача́льник Ангелов бы́сть Михаи́л Арха́нгел, / но сла́вится с ни́м светле́е таи́нник благода́ти и Де́вы обручи́тель честны́й, / воево́да Безпло́тных, досто́йно ра́дость предвозвеща́я, Гаврии́л, вопию́щим: / лю́дие, превозноси́те Христа́ во вся́ ве́ки.

Ангельския чи́ны в разли́чном зра́це уви́дев, / Иезеки́иль, предсказу́я, пропове́даше: / в ни́хже шестокри́льнии Серафи́ми предстоя́ху, / и Херуви́ми многоочи́тии окружа́ху, / с ни́миже Арха́нгелы пресве́тлыя зря́ще, / Христа́ славосло́вящия во вся́ ве́ки.

Яко стра́шно прише́ствие втора́го седа́лища Твоего́ явленнотворя́, / Дании́л предглаго́лаше: / я́ко престо́ли поста́вишася, и Ве́тхий седя́ше, и тьмы́ Ангелов ввожда́ше, / со стра́хом предстоя́щия и гла́сы немо́лчными вопию́щия Тро́ице во вся́ ве́ки.

Богородичен: Отцу́ и Ду́ху Единосу́щное Сло́во, во́лею яви́ся, / и на́м, из Де́вы, сообра́зен, / не смеси́в в дру́г дру́га, я́же стра́шнаго соедине́ния: / Еди́н бо и То́йжде во обои́х показу́ется, / во дву́ существа́х и Еди́ной Ипоста́си. / Его́же ны́не подо́бия о́бразу покланя́емся.

Песнь 9

Ирмос: Вои́стинну Богоро́дицу, / Тя́ испове́дуем, / спасе́ннии Тобо́ю, Де́во Чи́стая, / с Безпло́тными ли́ки Тя́ велича́юще.

Неду́гующих, и пла́вающих, и су́щих в ну́ждах / ко спасе́нию побо́рницы яви́стеся, / Безпло́тных пе́рвии, Михаи́ле и Гаврии́ле.

Си́л и Престо́лов Боже́ственных слико́вственник, / я́ко Воево́да Ангельский и таи́нник Бо́жий, / о на́с Спа́су, Гаврии́ле, моли́ся.

Яко храни́телие ми́ра и Це́ркве / и чинонача́льницы вы́шних си́л, / о на́с Спа́са умоли́те.

Богородичен: Согла́сно, Богоро́дице, Тя́ славосло́вим, / я́ко от страсте́й и бе́д спаса́еши ны́ / и на́ша моле́ния во благи́х исполня́еши.

Светилен.

О́гненных, Архистрати́же, слуг предста́тельство от Отца́ прия́л еси́, Михаи́ле, све́тов,/ тем и сия́ние Того́ сла́вы сия́ющее и́маши,/ окру́г пречи́стаго Престо́ла ты предстоя́,/ я́ко пе́рвый Невеще́ственных чино́в.

Слава: Невеще́ственных Сил, Арха́нгел и А́нгел,/ Госпо́дьств, и Престо́л, и Нача́л предста́тель пред Бо́гом постоя́нный,/ Архистрати́же Боже́ственне, Михаи́ле пресла́вне,/ нестерпи́мому бо Престо́лу предстоя́й,/ покры́й, соблюди́, сохрани́ и спаси́ вся, ве́рою тя почита́ющия,/ мирска́го предста́теля.

И ныне: Честне́йшая еси́ Херуви́м сла́вных и Серафи́м, Всепе́тая,/ стра́шных без сравне́ния сла́внейшая/ и всех святы́х А́нгел святе́йшая, Пречи́стая:/ Зижди́теля бо всех пло́тски неизрече́нно родила́ еси́, Богоро́дице./ Его́же моли́ рабо́м Твои́м разреше́ние дарова́ти прегреше́ний.

Стихи́ры, гла́с 1.

Небе́сных чино́в я́ко преднача́льника / и су́щих на земли́ челове́ков кре́пкаго тя́ предста́теля, / храни́теля же и изба́вителя / воспева́ем ве́рно, / Михаи́ле Архистрати́же, / моля́щеся вся́кия тлетво́рныя боле́зни на́с изба́вити.

Чинонача́льник сы́й го́рних Боже́ственных си́л / дне́сь созыва́ет челове́ческия ли́ки / еди́н со Ангелы све́тлый пра́здник соста́вити / собо́ра и́х боже́ственнаго / и ку́пно Пе́снь Бо́гу / воспе́ти Трисвяту́ю.

Под кро́в боже́ственных ны́ кри́л твои́х / прибега́ющия ве́рою, / Михаи́ле, боже́ственный у́ме, / соблюда́й и покрыва́й чрез все́ житие́. / И в ча́с, Арха́нгеле, сме́ртный, стра́шный / ты́ предста́ни помо́щник / все́м на́м благоприе́мнейший.

Гла́с 4:

Трисо́лнечныя лучи́, Боже́ственным све́том осиява́еми, Архистрати́зи, невеще́ственных озаря́ете чинонача́лия, я́коже све́т, белообра́зне показу́ющеся в вы́шних, о́гнь облиста́ете в ми́ре непристу́пнаго Божества́. Те́м и трисвяту́ю Пе́снь пла́менными устна́ми непреста́нно поете́: Свя́т, Свя́т, Свя́т еси́, Бо́же на́ш, сла́ва Тебе́.

^{Сла́ва, гла́с 5:}

Иде́же осеня́ет благода́ть твоя́, арха́нгеле, отту́ду диа́воля прого́нится си́ла: не терпи́т бо све́та твоего́ ви́дети спады́й денни́ца. Те́м мо́лим тя́, огнено́сныя его́ стре́лы, я́же на ны́ дви́жимыя, угаси́ хода́тайством твои́м, избавля́я на́с от собла́знов его́, достохва́льный Михаи́ле Архистрати́же.

И ны́не, Богородичен:

Блажи́м Тя́, Богоро́дице Де́во, и сла́вим Тя́, ве́рнии, по до́лгу, гра́д непоколеби́мый, сте́ну необори́мую, тве́рдую предста́тельницу и прибе́жище ду́ш на́ших.

Молитва Архангелу Михаилу

О, святы́й Михаи́ле Арха́нгеле, поми́луй нас, гре́шных, тре́бующих твоего́ заступле́ния, сохрани́ нас, раб Бо́жиих (имена), от все́х ви́димых и неви́димых враг, па́че же подкрепи́ от у́жаса сме́ртнаго и от смуще́ния диа́вольскаго и сподо́би нас непосты́дно предста́ти Созда́телю на́шему в час стра́шнаго и пра́веднаго Суда́ Его́. О, всесвяты́й, вели́кий Михаи́ле Архистрати́же! Не пре́зри нас, гре́шных, моля́щихся тебе́ о по́мощи и заступле́нии твое́м в ве́це сем и в бу́дущем, но сподо́би нас та́мо ку́пно с тобо́ю сла́вити Отца́ и Сы́на и Свята́го Ду́ха во ве́ки веко́в. Аминь.

Молитва святому Архангелу Михаилу

О, святы́й Михаи́ле Арха́нгеле, светлообра́зный и гро́зный Небе́снаго Царя́ воево́до! Пре́жде Стра́шнаго Суда́ осла́би ми пока́ятися от грехо́в мои́х, от се́ти ловя́щих изба́ви ду́шу мою́ и приведи́ ю́ к сотво́ршему ю́ Бо́гу, седя́щему на Херуви́мех, и моли́ся о ней приле́жно, да твои́м хода́тайством по́слет ю́ в ме́сто поко́йное. О гро́зный Воево́до Небе́сных Сил, предста́телю всех у Престо́ла Влады́ки Христа́, храни́телю тве́рдый всем челове́ком и му́дрый ору́жниче, кре́пкий Воево́до Небе́снаго Царя́! Поми́луй мя, гре́шнаго, тре́бующаго твоего́ заступле́ния, сохрани́ мя от всех ви́димых и неви́димых враг, па́че же подкрепи́ от у́жаса сме́ртнаго и от смуще́ния диа́вольскаго и сподо́би мя непосты́дно предста́ти Созда́телю на́шему в час стра́шнаго и пра́веднаго Суда́ Его́. О всесвяты́й вели́кий Михаи́ле Архистрати́же! Не пре́зри мене́, гре́шнаго, моля́щагося тебе́ о по́мощи и заступле́нии твое́м, в ве́це сем и в бу́дущем, но сподо́би мя та́мо ку́пно с тобо́ю сла́витии Отца́ и Сы́на и Свята́го Ду́ха во ве́ки веко́в. Ами́нь.

Собор святых ангелов

Канон Архангелам и Ангелам

Тропарь, глас 4:

Небе́сных во́инств Архистрати́зи, / мо́лим вас при́сно мы, недосто́йнии, / да ва́шими моли́́твами оградите́ нас / кро́вом крил невеще́ственныя ва́шея сла́вы, / сохраня́юще ны, припа́дающия приле́жно и вопию́щия: / от бед изба́вите ны, / я́ко чинонача́льницы Вы́шних сил.

Пе́снь 1

Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную Пе́снь пои́м, вопия́ше.

Припев: Вси Небеснии Силы безплотнии, молите Бога о нас.

Небе́сных ли́к восхваля́ю кра́сное благоле́пие, те́х све́тлыми мо́лниями просвети́тися вопию́: молю́ Тя, Христе́, еди́наго благоутро́бнаго. [Два́жды.]

Слава: Украше́й сло́вом вся́, и и́же из Тебе́ Всесвяты́м Ду́хом а́нгельския ли́ки, тебе́ ю́же все́х вину́ пе́ти устро́ил еси́ те́х, я́ко всеси́лен.

И ныне, Богоро́дичен: Твоего́ прие́мши Соде́теля я́ко Са́м восхоте́, из безсе́меннаго Твоего́ чре́ва па́че ума́ воплоща́ема, Чи́стая, тва́рем вои́стинну яви́ся Влады́чица.

Пе́снь 3

Ирмо́с: Не́сть свя́т, я́коже Ты́, Го́споди, Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

И́же вся́кое слове́сное естество́, от не су́щих хоте́нием соде́лавшее, трисвяты́ми гла́сы пое́тся в три́ ли́ца, и славосло́вится ве́рно. [Два́жды.]

Слава: Источа́я ны́не благо́е, Влады́ко вся́ческих, и бога́тне излива́я: прича́стием благи́х, безпло́тныя ли́ки а́нгельския показа́л еси́, Человеколю́бче.

И ныне, Богоро́дичен: Даде́ся отпуще́ние на́м Тебе́ ра́ди, Богоро́дице, зако́на бо Влады́ка из Тебе́ вопло́щься, стра́сти на́с ра́ди претерпе́в, и все́х изба́вил е́сть.

Седален, глас 8.

Небе́сных нача́льницы и первостоя́телие высокопресто́льных и стра́шных / Боже́ственныя сла́вы Михаи́ле и Гаврии́ле Архистрати́зи, / А́нгелов чинонача́льницы, со всеми Безпло́тными, / о служи́телие Влады́чни! / О ми́ре непреста́нно моля́щеся, / испроси́те оставле́ние прегреше́ных на́ми, / и ми́лость, и благода́ть обрести́ в день су́дный.

Слава, и ныне, Богородичен: Богоблагода́тная, Чи́стая, Благослове́нная, / благоутро́бия ра́ди ще́дрот из Тебе́ Ро́ждшагося / с вы́шними Си́лами, и Арха́нгелы, и всеми Безпло́тными моли́ непреста́нно / пода́ти нам пре́жде конца́ ми́лостивно проще́ние грехо́в / и жития́ исправле́ние, я́ко да обря́щем ми́лость.

Пе́снь 4

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т взыва́ющи, от смы́сла чи́ста о Го́споде пра́зднующи.

Тли́ неприя́тное естество́ иму́ще, Боже́ственнейшии уми́ Твои́ честни́и, престо́л обстоя́т, безсме́ртия Тя́ исто́чник насле́довавшии, Человеколю́бче. [Два́жды.]

Слава: От Свята́го Ду́ха освяща́еми а́нгельстии собо́ри, на зло́ пребыва́ют недви́жими, е́же к пе́рвому благо́му восхожде́нию обожа́еми.

И ныне, Богоро́дичен: Кля́тва разори́ся прама́терняя, Тебе́ ра́ди, Богоро́дице Всенепоро́чная: Ты́ бо на́м, Пречи́стая, благослове́ния исто́чник приснотеку́щ родила́ еси́.

Пе́снь 5

Ирмо́с: Бо́жиим све́том Твои́м, Бла́же, у́тренюющих Ти́ ду́шы любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

На престо́ле херуви́мсте ви́дев Тя́ проро́к, Всеви́дче, Зижди́теля и Бо́га седя́ща, зна́меньми Твоему́ науча́ется влады́честву и госпо́дству. [Два́жды.]

Слава: Тьмы́ тьма́ми, и ты́сяща ты́сящами А́нгел, Тебе́ окружа́ема, Влады́ко, Дании́л зря́ше, совокупле́на челове́ческому зра́ку, держа́ве Твоея́ сла́вы тайно науча́ется.

И ныне, Богоро́дичен: Красе́н добро́тою Тво́й Сы́н яви́ся, па́че сыно́в земноро́дных, Всенепоро́чная Влады́чице: Сло́во бо е́сть и́же над все́ми Бо́г, а́ще и естество́ челове́ческое из Тебе́ прия́т.

Пе́снь 6

Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к вопию́ Ти: возведи́ от тли́ живо́т мо́й, Многоми́лостиве.

Ума́ чистото́ю зря́ Иа́ков на ле́ствице низходя́щя А́нгелы Твоя́, Влады́ко, све́тло, издале́ча Твоему́ науча́шеся в пло́ти прише́ствию я́вственнейше. [Два́жды.]

Слава: Разуме́в Боже́ственное А́нгелов све́тлое ополче́ние, ра́довашеся уго́дник Тво́й, Влады́ко, Изра́иль, благочи́нно ликовству́ющее, и Твою́ неизрече́нную сла́ву обстоя́щее.

И ныне, Богоро́дичен: Го́р небе́сных вои́стинну превы́шши, А́нгельских си́л, яви́ся гора́ я́вственная, Отрокови́ца Влады́чица, я́же Твою́ вмести́вшая лучу́ Божества́.

Кондак, глас 2:

Архистрати́зи Бо́жии, / служи́телие Боже́ственныя сла́вы, / А́нгелов нача́льницы и челове́ков наста́вницы, / поле́зное нам проси́те и ве́лию ми́лость, / я́ко Безпло́тных Архистрати́зи.

Икос:

Рекл еси́, Человеколю́бче, в писа́ниих Твои́х / мно́жеству ра́доватися А́нгелов на Небеси́ / о челове́це еди́ном ка́ющемся, Безсме́ртне. / Те́мже мы, и́же в беззако́ниих, Безгре́шне, / еди́не Сердцеве́дче, / Тя моли́ти всегда́ дерза́ем, я́ко Благоутро́бнаго, / уще́дрити и низпосла́ти недосто́йным умиле́ние, Влады́ко, / подая́й нам проще́ние: / о всех бо нас мо́лятся Тебе́ Безпло́тных Архистрати́зи.

Пе́снь 7

Ирмо́с: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие мучи́теля увеща́ вопи́ти: благослове́н еси́, Бо́же оте́ц на́ших.

Красото́ю светле́етеся вси́ святи́и А́нгели, Вседержи́теля, приближа́ющеся неизрече́нней сла́ве Христо́вей, и любо́вию всегда́ пою́ща ему́: благослове́н еси́, Бо́же, во ве́ки. [Два́жды.]

Слава: Мы́сленно о Тебе́, Влады́ко, обраща́ющеся А́нгели, непости́жно светоявле́ние Твое́ прие́млют присносу́щне, пою́ще и глаго́люще всегда́: благослове́н еси́, Бо́же, во ве́ки.

И ныне, Богоро́дичен: С тобо́ю, благослове́нная Госпо́дь, безпло́тный Арха́нгел рече́: истле́вшее бо естество́ обнови́ти хотя́, во чре́во Твое́ всели́ся, Чи́стая, благослове́нная, я́же Бо́га пло́тию ро́ждшая.

Пе́снь 8

Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Я́коже Елиссе́а дре́вле Твоего́ уго́дника во́инствы безпло́тными огради́л еси́: та́кожде и ны́не, Христе́, Це́рковь Твою́, Тебе́ превознося́щую, огради́ во ве́ки. [Два́жды.]

Слава: Изба́витися от прегреше́ний, моли́теся Архистрати́зи Боже́ственнии, Яко предстоя́ще престо́лу гро́зному, любо́вию сла́вящым и превознося́щым Христа́ во вся́ ве́ки.

И ныне, Богоро́дичен: Я́ко Ма́тери и Де́ве, ра́дуйся, тебе́ вопие́м с Гаврии́лом Боже́ственным, Богора́дованная: сло́во бо на́м Бо́жие пло́тию родила́ еси́, Его́же превозно́сим во вся́ ве́ки.

Пе́снь 9

Ирмо́с: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти: Тобо́ю же, Всечи́стая, яви́ся челове́ком Сло́во воплоще́нно, Его́же велича́юще, с Небе́сными во́и Тя́ ублажа́ем.

Дави́ду проро́ку Твоему́, я́ко преста́ти сотвори́л еси́, Твоя́ лю́ди поража́юща ору́жием Ти́ А́нгела, я́ко ще́др пода́ждь ми́р, Христе́, все́м це́рквам, надлежа́щая ны́не облегча́я искуше́ния, я́ко Многоми́лостив. [Два́жды.]

Слава: Ви́дев люде́й Твои́х, Христе́, озлобле́ние, я́ко вра́чь ду́ш же и теле́с, исцели́ мольба́ми, Влады́ко, Твои́х служи́телей, ны́не о́крест стоя́щих Тебе́, все́х Царя́, и гла́сы непреста́нными я́ко Бо́га славосло́вящих Тя́.

И ныне, Богоро́дичен: Нача́ла, арха́нгели, госпо́дьствия и серафи́ми, си́лы, вла́сти и ́ангели, престо́ли с херуви́мы, ны́не препросла́вленное Рождество́ Твое́ чту́ще, Тя́, Ма́ти Де́во, благогове́йно при́сно сла́вят.

Молитва Небесным Силам Безплотным

О, Святии Безплотнии силы: Серафимы, Херувимы, Престолы и Власти, Господствия, Силы и Начала, Архангелы и Ангелы, любовию ко Господу и Творцу непрестанно горящии, и всем нам спастися хотящии, у Престола Вседержителя предстоящии и непрестанно трисвятую Песнь Ему вопиющии, ради явления любви Божией и милосердия неизреченнаго к людем посылаимии и благую и всесовершенную волю Его творящии. Воззрите милостивно на нас грешных и не возгнушайтесь сквернами нашими, но умолите Господа Иисуса Христа, да не погибнем в пучине беззаконий наших, но в тихое пристанище спасения приидем. Покрыйте нас невещественныма крилома вашима от всех враг видимых и невидимых, да сподобимся и мы воспевати Всеблагаго Христа Бога нашего, Ему же подобает слава со Безначальным Его Отцем и Святым Духом во веки веков. Аминь.

Ангел Хранитель. Икона

Канон Ангелу Хранителю

Тропарь, глас 6:

А́нгеле Бо́жий, храни́телю мой святы́й, живо́т мой соблюди́ во стра́се Христа́ Бо́га, ум мой утверди́ во и́стиннем пути́, и к любви́ го́рней уязви́ ду́шу мою́, да тобо́ю направля́емь, получу́ от Христа́ Бо́га ве́лию ми́лость.

Богородичен: Святая Владычице, Христа Бога нашего мати, яко всех Творца недоуменно родшия: моли благость Его всегда, со хранителем моим Ангелом, спасти душу мою, страттьми одержимую, и оставление грехов даровати ми.

Канон, глас 8.

Песнь 1.

Ирмос: Пои́м Го́сподеви, / прове́дшему лю́ди Своя́ сквозе́ Чермно́е мо́ре, / я́ко еди́н сла́вно просла́вися.

Припев: Го́споди Иису́се Христе́ Бо́же мой, поми́луй мя.

Песнь воспе́ти и восхвали́ти, Спа́се, / Твоего́ раба́ досто́йно сподо́би, / безпло́тному Áнгелу, наста́внику и храни́телю моему́.

Припев: Святы́й Áнгеле Бо́жий, храни́телю мой, моли́ Бо́га о мне.

Еди́н аз в неразу́мии и в ле́ности ны́не лежу́, / наста́вниче мой и храни́телю, / не оста́ви мене́, погиба́юща.

Слава: Ум мой твое́ю моли́твою напра́ви, / твори́ти ми Бо́жия повеле́ния, / да получу́ от Бо́га отда́ние грехо́в, / и ненави́дети ми злых наста́ви мя, молю́ся ти.

И ныне: Моли́ся, Деви́це, о мне, рабе́ Твое́м, ко Благода́телю, / со храни́телем мои́м Áнгелом, / и наста́ви мя твори́ти за́поведи Сы́на Твоего́ и Творца́ моего́.

Песнь 3

Ирмос: Ты еси́ утвержде́ние / притека́ющих к Тебе́, Го́споди, / Ты еси́ свет омраче́нных, / и пое́т Тя дух мой.

Припев: Святы́й Áнгеле Бо́жий, храни́телю мой, моли́ Бо́га о мне.

Все помышле́ние мое́ и ду́шу мою́ к тебе́ возложи́х, храни́телю мой: / ты от вся́кия мя напа́сти вра́жия изба́ви.

Враг попира́ет мя, и озлобля́ет, / и поуча́ет всегда́ твори́ти своя́ хоте́ния: / но ты, наста́вниче мой, / не оста́ви мене́ погиба́юща.

Слава: Пе́ти Песнь со благодаре́нием и усе́рдием / Творцу́ и Бо́гу даждь ми, / и тебе́, благо́му Áнгелу храни́телю моему́: / изба́вителю мой, изми́ мя от враг озлобля́ющих мя.

И ныне: Исцели́, Пречи́стая, моя́ многонеду́жныя стру́пы, я́же в души́, / прожени́ враги́, и́же при́сно бо́рются со мно́ю.

Седален, глас 2

От любве́ душе́вныя вопию́ ти, / храни́телю моея́ души́, всесвяты́й мой Áнгеле: / покры́й мя и соблюди́ от лука́ваго ловле́ния всегда́, / и к жи́зни наста́ви небе́сней, / вразумля́я и просвеща́я и укрепля́я мя.

Слава, и ныне, Богородичен: Богоро́дице безневе́стная, Пречи́стая, / Я́же без се́мени ро́ждши всех Влады́ку, / Того́ со Áнгелом храни́телем мои́м моли́ / изба́витимися вся́каго недоуме́ния, / и да́ти умиле́ние и свет души́ мое́й и согреше́нием очище́ние, / Я́же еди́на вско́ре заступа́ющи.

Песнь 4

Ирмос: Услы́шах, Го́споди, / смотре́ния Твоего́ та́инство, / разуме́х дела́ Твоя́, / и просла́вих Твое́ Божество́.

Припев: Святы́й Áнгеле Бо́жий, храни́телю мой, моли́ Бо́га о мне.

Моли́ Человеколю́бца Бо́га ты, храни́телю мой, / и не оста́ви мене́: / но при́сно в ми́ре житие́ мое́ соблюди́ / и пода́ждь ми спасе́ние необори́мое.

Я́ко засту́пника и храни́теля животу́ моему́ прие́м тя от Бо́га, Áнгеле, / молю́ тя, святы́й, / от вся́ких мя бед свободи́.

Слава: Мою́ скве́рность твое́ю святы́нею очи́сти, храни́телю мой, / и от ча́сти шу́ия да отлуче́н бу́ду моли́твами твои́ми / и прича́стник сла́вы явлю́ся.

И ныне: Недоуме́ние предлежи́т ми от обыше́дших мя зол, Пречи́стая, / но изба́ви мя от них ско́ро: / к Тебе́ бо еди́ней прибего́х.

Песнь 5

Ирмос: У́тренююще вопие́м Ти: / Го́споди, спаси́ ны; / Ты бо еси́ Бог наш, / ра́зве Тебе́ ино́го не ве́мы.

Припев: Святы́й Áнгеле Бо́жий, храни́телю мой, моли́ Бо́га о мне.

Я́ко име́я дерзнове́ние к Бо́гу, / храни́телю мой святы́й, / Сего́ умоли́ от оскорбля́ющих мя зол изба́вити.

Све́те све́тлый, све́тло просвети́ ду́шу мою́, / наста́вниче мой и храни́телю, / от Бо́га да́нный ми Áнгеле.

Слава: Спя́ща мя зле тягото́ю грехо́вною, / я́ко бдя́ща сохрани́, Áнгеле Бо́жий, / и возста́ви мя на славосло́вие моле́нием твои́м.

И ныне: Мари́е, Госпоже́ Богоро́дице безневе́стная, наде́ждо ве́рных, / вра́жия возноше́ния низложи́, / а пою́щыя же Тя возвесели́.

Песнь 6

Ирмос: Ри́зу ми пода́ждь све́тлу, / одея́йся све́том я́ко ри́зою, / многоми́лостиве Христе́ Бо́же наш.

Припев: Святы́й Áнгеле Бо́жий, храни́телю мой, моли́ Бо́га о мне.

Вся́ких мя напа́стей свободи́, и от печа́лей спаси́, / молю́ся ти, святы́й Áнгеле, да́нный ми от Бо́га, / храни́телю мой до́брый.

Освети́ ум мой, бла́же, и просвети́ мя, / молю́ся ти, святы́й Áнгеле, / и мы́слити ми поле́зная всегда́ наста́ви мя.

Слава: Уста́ви се́рдце мое́ от настоя́щаго мяте́жа, / и бде́ти укрепи́ мя во благи́х, храни́телю мой, / и наста́ви мя чу́дно к тишине́ живо́тней.

И ныне: Сло́во Бо́жие в Тя всели́ся, Богоро́дице, / и челове́ком Тя показа́ небе́сную ле́ствицу: / Тобо́ю бо к нам Вы́шний соше́л есть.

Кондак, глас 4:

Яви́ся мне милосе́рд, святы́й Áнгеле Госпо́день, храни́телю мой, / и не отлуча́йся от мене́ скве́рнаго, / но просвети́ мя све́том непрИкоснове́нным / и сотвори́ мя досто́йна Ца́рствия Небе́снаго.

Икос:

Уничиже́нную ду́шу мою́ мно́гими собла́зны, / ты, святы́й предста́телю, / неизрече́нныя сла́вы небе́сныя сподо́би, / и певе́ц с ли́ки безпло́тных сил Бо́жиих, / поми́луй мя и сохрани́, и по́мыслы до́брыми ду́шу мою́ просвети́, / да твое́ю сла́вою, Áнгеле мой, обогащу́ся, / и низложи́ зломы́слящия мне враги́, / и сотвори́ мя досто́йна Ца́рствия Небе́снаго.

Песнь 7

Ирмос: От Иуде́и доше́дше о́троцы / в Вавило́не иногда́, / ве́рою Тро́ическою пла́мень пе́щный попра́ша, пою́ще: / отце́в Бо́же, благослове́н еси́.

Припев: Святы́й Áнгеле Бо́жий, храни́телю мой, моли́ Бо́га о мне.

Ми́лостив бу́ди ми, и умоли́ Бо́га, Госпо́день Áнгеле: / име́ю бо тя засту́пника во всем животе́ мое́м, наста́вника же и храни́теля, / от Бо́га дарова́ннаго ми во ве́ки.

Не оста́ви в путь ше́ствующия души́ моея́ окая́нныя / уби́ти разбо́йником, святы́й Áнгеле, / я́же ти от Бо́га предана́ бысть непоро́чне, / но наста́ви ю́ на путь покая́ния.

Слава: Всю посра́млену ду́шу мою́ / привожду́ от лука́вых ми по́мысл и дел: / но предвари́, наста́вниче мой, / и исцеле́ние ми пода́ждь благи́ми по́мыслы, / уклоня́ти ми ся всегда́ на пра́выя стези́.

И ныне: Прему́дрости испо́лни всех и кре́пости Боже́ственныя, / Ипоста́сная Прему́дросте Вы́шняго, Богоро́дицы ра́ди, ве́рою вопию́щих: / оте́ц на́ших Бо́же, благослове́н еси́.

Песнь 8

Ирмос: Царя́ Небе́снаго, / Его́же пою́т во́и а́нгельстии, / хвали́те и превозноси́те во вся ве́ки.

Припев: Святы́й Áнгеле Бо́жий, храни́телю мой, моли́ Бо́га о мне.

От Бо́га по́сланный, / утверди́ живо́т мой, раба́ твоего́, преблаги́й Áнгеле, / и не оста́ви мене́ во ве́ки.

А́нгела тя су́ща бла́га, / души́ моея́ наста́вника и храни́теля, преблаже́нне, / воспева́ю во ве́ки.

Слава: Бу́ди ми покро́в и забра́ло / в день испыта́ния всех челове́к, / во́ньже огне́м искуша́ются дела́ блага́я же и зла́я.

И ныне: Бу́ди ми помо́щница и тишина́, Богоро́дице Присноде́во, рабу́ Твоему́, / и не оста́ви мене́ лише́на бы́ти Твоего́ влады́чества.

Песнь 9

Ирмос: Вои́стинну Богоро́дицу / Тя испове́дуем, / спасе́ннии Тобо́ю, Де́во чи́стая, / с безпло́тными ли́ки Тя велича́юще.

Припев: Го́споди Иису́се Христе́ Бо́же мой, поми́луй мя.

Поми́луй мя, еди́не Спа́се мой, / я́ко ми́лостив еси́ и милосе́рд, / и пра́ведных лико́в сотвори́ мя прича́стника.

Припев: Святы́й Áнгеле Бо́жий, храни́телю мой, моли́ Бо́га о мне.

Мы́слити ми при́сно и твори́ти, Госпо́день Áнгеле, / блага́я и поле́зная да́руй, / я́ко си́льна яви́ в не́мощи и непоро́чна.

Слава: Я́ко име́я дерзнове́ние к Царю́ Небе́сному, Того́ моли́, / и с про́чими безпло́тными, поми́ловати мя, окая́ннаго.

И ныне: Мно́го дерзнове́ние иму́щи, Де́во, к Вопло́щшемуся из Тебе́, / преложи́ мя от уз и разреше́ние ми пода́ждь и спасе́ние, моли́твами Твои́ми.

Молитва ко Ангелу Хранителю

А́нгеле Христо́в святы́й, к тебе́ припа́дая молю́ся, храни́телю мой святы́й, прида́нный мне на соблюде́ние души́ и те́лу моему́ гре́шному от свята́го креще́ния, аз же свое́ю ле́ностию и свои́м злым обы́чаем прогне́вах твою́ пречи́стую све́тлость и отгна́х тя от себе́ все́ми сту́дными де́лы: лжа́ми, клевета́ми, за́вистию, осужде́нием, презо́рством, непоко́рством, братоненавиде́нием, и злопомне́нием, сребролю́бием, прелюбодея́нием, я́ростию, ску́постию, объяде́нием без сы́тости и опи́вством, многоглаго́ланием, злы́ми по́мыслы и лука́выми, го́рдым обы́чаем и блу́дным возбеше́нием, имы́й самохоте́ние на вся́кое плотско́е вожделе́ние. О, зло́е мое́ произволе́ние, его́же и ско́ти безслове́снии не творя́т! Да ка́ко возмо́жеши воззре́ти на мя, или́ приступи́ти ко мне, а́ки псу смердя́щему? Кото́рыма очи́ма, А́нгеле Христо́в, воззри́ши на мя, опле́тшася зле во гну́сных де́лех? Да ка́ко уже́ возмогу́ отпуще́ния проси́ти го́рьким и злым мои́м и лука́вым дея́нием, в ня́же впа́даю по вся дни и но́щи и на всяк час? Но молю́ся ти припа́дая, храни́телю мой святы́й, умилосе́рдися на мя гре́шнаго и недосто́йнаго раба́ твоего́ (имя рек), бу́ди ми помо́щник и засту́пник на зла́го моего́ сопроти́вника, святы́ми твои́ми моли́твами, и Ца́рствия Бо́жия прича́стника мя сотвори́ со все́ми святы́ми, всегда, и ныне и присно, во ве́ки, ами́нь.

Архангел Михаил с деяниями.

Первая четверть XV в.

Канон святому Архистратигу Божию Михаилу

Тропарь, глас 4:

Небе́сных во́инств Архистрати́же, / мо́лим тя при́сно мы, недосто́йнии, / да твои́ми моли́твами огради́ши нас / кро́вом крилу́ невеще́ственныя тво я́ сла́вы, / сохраня́я нас, припа́дающих приле́жно и вопию́щих: / от бед изба́ви нас, / я́ко чинонача́льник Вы́шних Сил.

Глас 4

Песнь 1

Ирмос: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся све́тло торжеству́я, / и воспою́, ра́дуяся Тоя́ чудеса́.

Припев: Святы́й Архистрати́же Михаи́ле, моли́ Бо́га о нас.

Боже́ственными светлостьми́ облистава́ем всегда́, / ум мой озари́, е́же воспе́ти тя, Архистрати́же го́рних во́инств, / всех утвержде́ние притека́ющих к тебе́.

Ум пребезнача́льный, / преми́рнаго чинонача́льника показа́ тя, пресла́вне Архистрати́же, / и свет су́щих во тьме, и Боже́ственное украше́ние Це́ркве Своея́.

Слава: Умо́в предворя́я Небе́сных в Ду́се, / до́льним же всеизря́днейшее Михаи́ле, да́лся еси́ огражде́ние, и утвержде́ние, / и ору́жие, враги́ закала́ющее и потребля́ющее.

И ныне: Де́во Всенепоро́чная, А́нгелов радование, челове́ков по́моще, / Ты мне помози́, морепла́вающему / и в бу́ри греха́ при́сно впа́дающу и бе́дствующу.

Песнь 3

Ирмос: Твоя́ песносло́вцы, Богоро́дице, / живы́й и незави́стный исто́чниче, / лик Себе́ совоку́пльшия духо́вно, утверди́, / в Боже́ственней Твое́й сла́ве / венце́в сла́вы сподо́би.

Припев: Святы́й Архистрати́же Михаи́ле, моли́ Бо́га о нас.

Кре́постию Боже́ственною, воево́до А́нгелов всехва́льне, / обхо́диши всю зе́млю, от лю́тых ны изыма́я, / призыва́ющия твое́ боже́ственное и́мя.

Я́ко боже́ствен пропове́дник, я́ко предста́тель ве́рных непосты́ден, / заблу́ждших путево́ждь и наказа́тель был еси́ выну, / Бо́жий Архистрати́же богови́днейший.

Слава: Боже́ственнаго сия́ния чи́стшее зерца́ло был еси́, / явле́ния честна́го све́тло прие́м Ду́ха, / Михаи́ле Первоа́нгеле, досточу́дне.

И ныне: Невеще́ственныя умы́ соста́вивый во́лею, / в веще́ственное Твое́ чре́во всели́ся хоте́нием, Всенепоро́чная, / пло́тию зрим Незре́нный.

Го́споди, поми́луй, трижды.

Седален, глас 1

Лик Ангельский Архистрати́га име́я, боже́ственнаго Михаи́ла, / с ним Святе́й Тро́ице немо́лчное приноша́ет песнопе́ние, / из не су́щих бо Соде́тель вся́ческих / во́инства огнезра́чных чино́в, Сло́вом приведе́.

Слава, и ныне, Богородичен: Упова́ние христиа́н, Пресвята́я Де́во, / Его́же родила́ еси́ Бо́га, па́че ума́ же и сло́ва, / непреста́нно моли́ с вы́шними Си́лами, / пода́ти нам оставле́ние грехо́в и исправле́ние жития́, / ве́рою и любо́вию при́сно Тя славя́щим.

Песнь 4

Ирмос: Седя́й в сла́ве на Престо́ле Божества́, / во о́блаце ле́гце / прии́де Иису́с Пребоже́ственный, / нетле́нною дла́нию, / и спасе́ зову́щия: / сла́ва, Христе́, си́ле Твое́й.

Припев: Святы́й Архистрати́же Михаи́ле, моли́ Бо́га о нас.

Ум сый Пе́рвый, соста́вил еси́ боже́ственныя умы́ хоте́нием, / нача́льника посреде́ сих Михаи́ла соде́ла, / всеблаже́нным прича́стием просвеща́ема и у́мными богонача́лии облиста́ема.

Пе́ние Трисвято́е со Престо́лы и Нача́лы, и Си́лами, и Властьми́, / и свяще́нными Госпо́дьствы возглаша́еши Тро́ице, / пресла́вне Михаи́ле, спаса́я ны пою́щия тя.

Слава: Велича́ем всех Творца́ же и Го́спода, / за благоутро́бие да́вшаго обхране́ние велича́йшее и необори́му сте́ну, и забра́ло, / Михаи́ла нам, светоза́рнаго Архистрати́га.

И ныне: Мы́сленно, Де́во, Твоего́ Пречистаго Рождества́ пресла́вное ска́зоваше дре́вле, священноявле́нный / Ду́хом го́ру Присе́нную ви́дя Тя ясне́йше, / из Нея́же Святы́й прии́де Бог воплоща́емь.

Песнь 5

Ирмос: Ужасо́шася вся́ческая / о Боже́ственней сла́ве Твое́й: / Ты бо, неискусобра́чная Де́во, / име́ла еси́ во утро́бе над все́ми Бо́га / и родила́ еси́ безле́тнаго Сы́на, / всем воспева́ющим Тя / мир подава́ющая.

Припев: Святы́й Архистрати́же Михаи́ле, моли́ Бо́га о нас.

Яви́лся еси́ предводя́щ дре́вняго Изра́иля, / повеле́нием Су́щаго из Иа́кова, / челове́ком я́вльшагося дебельство́м те́ла, / Михаи́ле безтеле́сный, А́нгелов Архистрати́же.

Невеще́ственными сия́нии обожа́емь при́сно, прича́стием богонача́льным, / и нам осия́ние светода́тельное подава́еши, / Первоа́нгеле, призыва́ющим и́мя твое́.

Слава: Украси́ся благода́тию боже́ственный твой храм, / в той бо незримо прише́д, враче́вств пучи́ну его́ показа́л еси́, / Михаи́ле Первоа́нгеле всякия страсти потребляеши.

И ныне: У́мных А́нгелов Тя показа́ Бог вы́шшую, / всели́вся в Твоя́ ложесна́, Чи́стая Всенепоро́чная, / Его́же моли́ всегда́, уще́дрити пою́щия Тя.

Песнь 6

Ирмос: Боже́ственное сие́ и всечестно́е / соверша́юще пра́зднество, / богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.

Припев: Святы́й Архистрати́же Михаи́ле, моли́ Бо́га о нас.

Ра́дуется ве́рных мно́жество, благохва́лящее тя, / Михаиле, и сла́вит Всесвята́го Сло́ва, / совоку́пльшаго земны́я со А́нгелы, Свое́ю бла́гостию.

Во́инства Изра́илева спасл еси́, явля́яся, / и боже́ственная подая́ повеле́ния, Архистрати́же, / враги́ низложи́л еси́ и в коне́ц сия́ истреби́л еси́.

Слава: Я́ко ви́де тя Иису́с Нави́н, поклони́ся, / вопроси́в честна́го твоего́ и свята́го и́мене, нача́льниче А́нгелов, / благогове́нием и стра́хом держи́м.

И ныне: Блаже́ни лю́дие, при́сно блажа́щии Тя, Блаже́нная, / я́ко Бо́га Блаже́ннаго ро́ждшая, / земны́я за милосе́рдие неизрече́нным едине́нием обо́жившаго.

Кондак, глас 2

Архистрати́же Бо́жий, / служи́телю Боже́ственныя сла́вы, / А́нгелов нача́льниче и челове́ков наста́вниче, / поле́зное нам проси́ и ве́лию ми́лость, / я́ко Безпло́тных Архистрати́г.

Икос:

Рекл еси́, Человеколю́бче, в Писа́ниих Твои́х, / мно́жеству ра́доватися А́нгел на Небеси́ о челове́це еди́ном ка́ющемся, Безсме́ртне. / Те́мже мы, и́же в беззако́нниих, Безгре́шне еди́не Сердцеве́дче, / Тя моли́ти всегда́ дерза́ем, я́ко Благоутро́бнаго, / уще́дрити и низпосла́ти недосто́йным умиле́ние, Влады́ко, подая́й нам проще́ние: / о всех бо нас мо́лится Тебе́ Безпло́тных Архистрати́г.

Песнь 7

Ирмос: Не послужи́ша тва́ри Богому́дрии, / па́че Созда́вшаго, / но о́гненное преще́ние му́жески попра́вше, / ра́довахуся пою́ще: / препе́тый отце́в Госпо́дь и Бог, благослове́н еси́.

Припев: Святы́й Архистрати́же Михаи́ле, моли́ Бо́га о нас.

Нача́льник А́нгелов бысть Михаи́л Арха́нгел, / но сла́вится с ним светле́е таи́нник благода́ти и Де́вы обручи́тель честны́й, / воево́да Безпло́тных, досто́йно ра́дость предвозвеща́я, Гаврии́л, вопию́щим: / лю́дие, превозноси́те Христа́ во вся ве́ки.

А́нгелов наста́вники богови́дныя и светоно́сныя, Михаи́ла и Гаврии́ла, / на́ша благи́я уте́шители, и предста́тели, и храни́тели, / восхва́лим ве́рою велегла́сно.

Слава: Красе́н и всеблаголе́пен, и богови́ден сый, / вождь па́че ума́ невеще́ственных духо́в был еси́, Михаи́ле светоза́рнейше, / с ни́ми у́бо о всех нас моли́ся.

И ныне: Ума́ Вели́каго и́стинно Сло́во Присносу́щное, Де́во, / в Тя неизглаго́ланно и стра́шно всели́вшася ви́дя, / возопи́ Гаврии́л Арха́нгел: / ра́дуйся, Престо́ле Высоча́йшаго, Благослове́нная.

Песнь 8

Ирмос: О́троки благочести́выя в пещи́, / рождество́ Богоро́дично спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ / и превозноси́те Его́ во вся ве́ки.

Припев: Святы́й Архистрати́же Михаи́ле, моли́ Бо́га о нас.

Мы́сленных существ безтеле́сных чинонача́льник, моли́твенник челове́ков спаси́телен, / боже́ствен Бо́жий служи́тель, Михаи́ле, показа́лся еси́, поя́ непреста́нно: / вся дела́ благослови́те, по́йте Го́спода.

Свети́льника два всесве́тлая, Михаи́ле и Гаврии́ле Арха́нгели, / Трисве́тлаго Божества́ сия́ньми всю тварь просвеща́ющии, / лю́тых мглу отгоня́ете.

Слава: Я́ко до́брии ко́рмчии, Арха́нгели, / ко приста́нищу Боже́ственныя во́ли душе́вный кора́бль мой спаса́йте, / от бу́ри грехо́в па́дший и бе́дствующий.

И ныне: Невестокраси́тель, боже́ственный Арха́нгел, предста́в, / приглаша́ше Тебе́: е́же ра́дуйся, Неве́сто Бо́жия Безневе́стная, / А́нгелов сла́во и челове́ков спасе́ние и огражде́ние.

Песнь 9

Ирмос: Всяк земноро́дный / да взыгра́ется Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная / Богоро́дице, Чи́стая Присноде́во.

Припев: Святы́й Архистрати́же Михаи́ле, моли́ Бо́га о нас.

Се благоле́пие твоего́, Арха́нгеле, боже́ственнаго хра́ма, / осия́ющее, светоза́рным твои́м прису́тствием, чуде́с мо́лнии испуща́ет / и тьмы неду́гов всегда́ отгоня́ет Боже́ственною благода́тию.

Я́ко дво́ица прекра́сная и светоле́пная су́ще, / Влады́чним повеле́нием су́щим на земли́ слу́жите, Михаи́ле пресла́вне и Гаврии́ле досточу́дне, / от лю́тых изыма́юще, и всем просвеще́ние посыла́юще / спаси́тельное, Боже́ственным Ду́хом.

Слава: Днесь ра́дуются с на́ми безтеле́снии боже́ственнии у́ми, / воспева́ема, ви́дяще сего́ от всех, вели́каго и све́тлаго Архистрати́га, / и любо́вию с на́ми пра́зднуют, Жизнода́вца велича́юще.

И ныне: Глас боже́ственнаго Гаврии́ла прино́сим Тебе́ ра́достно, Всечи́стая, и взыва́ем: / ра́дуйся ра́ю, посреде́ дре́во жи́зни име́яй, / ра́дуйся Бо́га Сло́ва жили́ще и черто́же, / ра́дуйся воззва́ние Ада́ма и всего́ ро́да челове́ча.

Светилен, глас 8:

Я́коже дре́вле погрузи́л еси́ реки́ безчи́нная ше́ствия и шуме́ния, Архистрати́же сла́вы, / та́ко и ны́не, Арха́нгеле, язы́ков горды́ню и де́монов свере́пства потреби́, / я́ко да по до́лгу тя чтим в пе́снех досто́йно.

Слава, и ныне; Богородичен: Почита́ют Рождество́ Твое́ безпло́тных чи́ни: / ра́дости бо земна́я Ты напо́лнила еси́ еди́на. / Тем Тя, Всенепоро́чную, ве́рнии сла́вим в пе́ниих славосло́вяще, / Свет бо су́щим во тьме возсия́ла еси́, / я́ко у́тренний возсия́вший день.

Молитва первая

Святы́й и вели́кий Арха́нгеле Бо́жий Михаи́ле, неисповеди́мыя и пресу́щественныя Тро́ицы пе́рвый во А́нгелех предстоя́телю, ро́да же челове́ческаго приста́вниче и храни́телю, сокруши́вый с во́инствы свои́ми главу́ прего́рдаго денни́цы на небеси́ и посрамля́яй вы́ну зло́бу и кова́рства его́ на земли́. К тебе́ прибега́ем с ве́рою и тебе́ мо́лимся с любо́вию: бу́ди щит несокруши́м и забра́ло тве́рдо святе́й Це́ркви и правосла́вному Оте́чествию на́шему, огражда́я их молниено́сным мече́м твои́м от всех враг, ви́димых и неви́димых. Не оста́ви же, о Арха́нгеле Бо́жий, по́мощию и заступле́нием твои́м и нас, прославля́ющих днесь свято́е и́мя твое́: се бо, а́ще и многогре́шни есмы́, оба́че не хо́щем в беззако́ниих на́ших поги́бнути, но е́же обрати́тися ко Го́споду и оживле́нным бы́ти от Него́ на дела́ блага́я. Озари́ у́бо ум наш све́том лица́ Бо́жия, и́же вы́ну сия́ет на молниеви́днем челе́ твое́м, да возмо́жем разуме́ти, что есть во́ля Бо́жия о нас, блага́я и соверше́нная, и ве́дети вся, я́же подоба́ет нам твори́ти и я́же презира́ти, и оставля́ти. Укрепи́ благода́тию Госпо́днею сла́бую во́лю и немощно́е произволе́ние на́ше, да утверди́вшеся в зако́не Госпо́днем, преста́нем про́чее вла́ятися земны́ми по́мыслы и похоте́нии пло́ти, увлека́ющеся по подо́бию несмы́сленных дете́й скороги́бнущими красо́тами ми́ра сего́, я́ко ра́ди тле́ннаго и земна́го безу́мне забыва́ти ве́чная и небе́сная. Над все́ми же си́ми испроси́ нам свы́ше дух и́стиннаго покая́ния, нелицеме́рную печа́ль по Бо́зе и сокруше́ние о гресе́х на́ших, да остаю́щее нам число́ дний вре́меннаго живота́ на́шего иждиве́м не во угожде́нии чувств и рабо́те страсте́м на́шим, но во изглажде́нии зол, соде́янных на́ми, слеза́ми ве́ры и сокруше́ния серде́чнаго, по́двигами чи́стоты и святы́ми дела́ми милосе́рдия. Егда́ же прибли́зится час оконча́ния на́шего, освобожде́ния от уз бре́ннаго сего́ телесе́, не оста́ви нас, Арха́нгеле Бо́жий, беззащи́тных проти́ву духо́в зло́бы поднебе́сных, обы́кших прегражда́ти душе́ челове́честей восхо́д в го́рняя, да, охраня́еми тобо́ю, безпреткнове́нне дости́гнем о́ных пресла́вных селе́ний ра́йских, иде́же несть печа́ль, ни воздыха́ние, но жизнь безконе́чная, и, сподо́бльшеся узре́ти пресве́тлое лице́ Всеблага́го Го́спода и Влады́ки на́шего, па́дше со слеза́ми у ног Его́, в ра́дости и умиле́нии воскли́кнем: сла́ва Тебе́, дража́йший Искупи́телю наш, И́же за премно́гую любо́вь Твою́ к нам, недосто́йным, благоволи́л еси́ посла́ти а́нгелы Твоя́ в служе́ние спасе́нию на́шему, ами́нь.

Молитва вторая

О святы́й Михаи́ле Арха́нгеле, поми́луй нас, гре́шных, тре́бующих твоего́ заступле́ния, сохрани́ нас, раб Бо́жиих (имя рек), от всех ви́димых и неви́димых враг, па́че же подкрепи́ от у́жаса сме́ртнаго и от смуще́ния диа́вольскаго и сподо́би нас непосты́дно предста́ти Созда́телю на́шему в час стра́шнаго и пра́веднаго Суда́ Его́. О всесвяты́й, вели́кий Михаи́ле Архистрати́же, не пре́зри нас, гре́шных, моля́щихся тебе́ о по́мощи и заступле́нии твое́м в ве́це сем и в бу́дущем, но сподо́би нас та́мо ку́пно с тобо́ю сла́вити Отца́ и Сы́на и Свята́го Ду́ха во ве́ки веко́в.

Молитва третия

Го́споди, Бо́же вели́кий, Царю́ безнача́льный, посли́ Арха́нгела Твоего́ Михаи́ла на по́мощь раба́м Твои́м (имя рек). Защити́, Арха́нгеле, нас от вся́ких враго́в, ви́димых и неви́димых. О, Госпо́день вели́кий Арха́нгеле Михаи́ле, де́монов сокруши́телю, запрети́ всем враго́м, борю́щимся со мно́ю, и сотвори́ их я́ко о́вцы, и смири́ их зло́бные сердца́, и сокруши́ их, я́ко прах пе́ред лице́м ве́тра. О, Госпо́день вели́кий Арха́нгеле Михаи́ле, шестикры́лый пе́рвый кня́же и воево́до Небе́сных Сил, Херуви́мов и Серафи́мов, бу́ди нам помо́щник во всех бе́дах, ско́рбях, в печа́лех, в пусты́ни и на моря́х ти́хое приста́нище. О, Госпо́день вели́кий Арха́нгеле Михаи́ле, изба́ви нас от вся́кия пре́лести диа́вольския, егда́ услы́шишь нас, гре́шных, моля́щихся Тебе́, и призыва́ющих и́мя твое́ свято́е. Ускори́ нам на по́мощь и побори́ всех, проти́вящихся нам, си́лою Честна́го и Животворя́щего Креста́ Госпо́дня, моли́твами Пресвяты́я Богоро́дицы, моли́твами святы́х апо́столов, святи́теля чудотво́рца Никола́я, Андре́я, Христа́ ра́ди, юро́диваго, свята́го проро́ка Илии́ и всех святы́х великому́чеников, святы́х му́чеников Ники́ты и Евста́фия и всех преподо́бных отцо́в на́ших, от ве́ка Бо́гу угоди́вших и всех святы́х Небе́сных Сил. О, Госпо́день вели́кий Арха́нгеле Михаи́ле, помози́ нам, гре́шным (имя рек), и изба́ви нас от тру́са, пото́па, огня́, меча́ и напра́сныя сме́рти, от вели́каго зла, от врага́ льсти́ваго, от бу́ри наноси́мой, от лука́ваго изба́ви нас всегда́, ны́не и при́сно, и во ве́ки веко́в, ами́нь. Святы́й Архистрати́же Бо́жий Михаи́ле, молниено́сным мече́м Твои́м отжени́ от мене́ ду́ха лука́ваго, искуша́ющего и томя́щего мя. Ами́нь.

Молитва четвертая

О святы́й Михаи́ле Арха́нгеле, светлообра́зный и гро́зный Небе́снаго Царя́ воево́до, пре́жде Стра́шнаго Суда́ осла́би ми пока́ятися от грехо́в мои́х, от се́ти ловя́щих изба́ви ду́шу мою́ и приведи́ ю́ к сотво́ршему ю́ Бо́гу, седя́щему на Херуви́мех, и моли́ся о ней приле́жно, да твои́м хода́тайством по́слет ю́ в ме́сто поко́йное. О гро́зный воево́до Небе́сных Сил, предста́телю всех у Престо́ла Влады́ки Христа́, храни́телю тве́рдый всем челове́ком и му́дрый ору́жниче, кре́пкий воево́до Небе́снаго Царя́, поми́луй мя, гре́шнаго, тре́бующаго твоего́ заступле́ния, сохрани́ мя от всех ви́димых и неви́димых враг, па́че же подкрепи́ от у́жаса сме́ртнаго и от смуще́ния диа́вольскаго и сподо́би мя непосты́дно предста́ти Созда́телю на́шему в час стра́шнаго и пра́веднаго Суда́ Его́. О всесвяты́й вели́кий Михаи́ле Архистрати́же, не пре́зри мене́, гре́шнаго, моля́щагося тебе́ о по́мощи и заступле́нии твое́м, в ве́це сем и в бу́дущем, но сподо́би мя та́мо ку́пно с тобо́ю сла́вити Отца́ и Сы́на и Свята́го Ду́ха во ве́ки веко́в. Ами́нь.

А. Дюрер. Сражение архангела Михаила с драконом. Небесное воинство

Акафист Архангелу Божию Михаилу

Кондак 1

Избра́нный Небе́сных сил воево́до и ро́да челове́ческаго засту́пниче, сие́ тебе́, и́же тобо́ю от ско́рбных избавля́еми, благода́рственное прино́сим пе́ние: ты же, я́ко предстоя́й Престо́лу Царя́ Сла́вы, от вся́ких нас бед свобожда́й, да с ве́рою и любо́вию в похвалу́ тебе́ зове́м:

Ра́дуйся, Михаи́ле, вели́кий Архистрати́же, со все́ми Небе́сными си́лами.

Икос 1

Я́ко а́нгельских огнезра́чных лико́в предстоя́теля, а́нгельскими у́бо и язы́ки подоба́ше восхвали́те тя, Михаи́ле; но до́ндеже вразумля́еми и тобо́ю навы́кнем безпло́тных глаго́лом, услы́ши, а́ще и от челове́ческих, оба́че благода́рных усте́н, сицева́я:

Ра́дуйся, звездо́ ми́ра первообра́зная; ра́дуйся, свеще́ и́стины и пра́вды златоза́рная.

Ра́дуйся, луче́й све́та несозда́ннаго пе́рвый во а́нгельских ликостоя́ниях прие́мниче; ра́дуйся, А́нгелов и Архангелов нача́льниче.

Ра́дуйся, в не́мже наивя́щше светле́ется сла́ва Тво́рческия Десни́цы; ра́дуйся, и́мже красу́ются собо́ры всех суще́ств безпло́тных.

Ра́дуйся, Михаи́ле, вели́кий Архистрати́же, со все́ми Небе́сными си́лами.

Кондак 2

Прови́дяще ве́ры очесы́ вели́чие духо́вныя красоты́ и си́лу молниено́сныя десни́цы твоея́, Арха́нгеле Бо́жий, мы, я́ко земни́и и пло́тию обложе́ннии, удивле́нием, ра́достию и благодаре́нием ко Творцу́ вся́ческих исполня́емся, зову́ще со все́ми Небе́сными си́лами: Аллилу́иа.

Икос 2

Ра́зум чист и свобо́ден от страсте́й испроси́ нам, пречу́дный Михаи́ле, Небе́сных чино́в нача́льниче, да, возне́сшеся мы́слию от земны́х к Небе́сным, хвале́бную Песнь воспое́м ти си́це:

Ра́дуйся, Бо́жия неизре́ченныя красоты́ и добро́ты ближа́йший зри́телю; ра́дуйся, всеблаги́х сове́тов Пресвяты́я Тро́ицы преи́скренний таи́нниче.

Ра́дуйся, преве́чных суде́б Тро́ических ве́рный исполни́телю; ра́дуйся, ему́же с любо́вию удивля́ются Небе́сная во́инства.

Ра́дуйся, его́же с ве́рою прославля́ют земноро́днии; ра́дуйся, его́же трепе́щут а́дския си́лы.

Ра́дуйся, Михаи́ле, вели́кий Архистрати́же, со все́ми Небе́сными си́лами.

Кондак 3

Си́лу необори́мыя ре́вности по сла́ве Бо́жией в себе́ явля́я, стал еси́ во главе́ лико́в а́нгельских, Михаи́ле, проти́ву ды́шащаго зло́бою, прего́рдаго денни́цы, ему́же со те́мными клевре́ты его́ с высоты́ небе́сныя в преиспо́днюю низве́ржену су́щу, во́инства Небе́сная, тобо́ю пресла́вне води́мая, с весе́лием, я́ко един́ыми усты́, пред Престо́лом Бо́жиим возгласи́ша: Аллилу́иа.

Икос 3

И́мать тебе́, Арха́нгеле Михаи́ле, весь род христиа́нский вели́ка засту́пника и ди́вна во бра́нех с проти́вными помо́щника: сего́ ра́ди пречу́днаго покро́ва твоего́ сподо́битися жела́юще, в день торжества́ твоего́ взыва́ем ти си́це:

Ра́дуйся, и́мже сатана́, я́ко мо́лния, с Небесе́ низве́ржеся; ра́дуйся, и́мже храни́мый род челове́ческий к Небеси́ восхо́дит.

Ра́дуйся, всесве́тлаго ми́ра го́рняго преди́вное украше́ние; ра́дуйся, па́дшаго ми́ра до́льняго пресла́вное заступле́ние.

Ра́дуйся, николи́же си́лами зла побежде́нный; ра́дуйся, со все́ми А́нгелы Бо́жиими в и́стине и пра́вде на ве́ки благода́тию Бо́жиею утвержде́нный.

Ра́дуйся, Михаи́ле, вели́кий Архистрати́же, со все́ми Небе́сными си́лами.

Кондак 4

Бу́ри искуше́ний и бед изба́ви нас, А́нгелов первопресто́льниче, с любо́вию и ра́достию пресве́тлое торжество́ твое́ соверша́ющих: ты бо еси́ в беда́х вели́кий помо́щник и в час сме́рти от злых духо́в храни́тель и засту́пник всех вопию́щих твоему́ и на́шему Влады́це и Бо́гу: Аллилу́иа.

Икос 4

Слы́шаще твое́ проти́ву по́лчищ сатани́нских дерзнове́ние, вси чи́нове а́нгельстии с ра́достию подвиго́шася во след тебе́ на брань за и́мя и сла́ву своего́ Влады́ки, вопию́ще: кто я́ко Бог? Мы же, ве́дуще сатану́ под нога́ма твои́ма пове́ржена, тебе́, я́ко победи́телю, зове́м:

Ра́дуйся, и́мже мир и тишина́ на Небеси́ водвори́шася; ра́дуйся, от него́же ду́хове зло́бы да́же до а́да низложи́шася.

Ра́дуйся, а́нгельския во́инства и си́лы ми́ра неви́димаго ко истребле́нию зла направля́яй; ра́дуйся, прю и возмуще́ние стихи́й ми́ра ви́димаго незри́мо укроща́яй.

Ра́дуйся, подъе́млющих брань к духово́м зло́бы поднебе́сным ди́вный спобо́рниче; ра́дуйся, изнемога́ющих во искуше́ниих и напа́стех ве́ка сего́ кре́пкий помо́щниче.

Ра́дуйся, Михаи́ле, вели́кий Архистрати́же, со все́ми Небе́сными си́лами.

Кондак 5

Богото́чный исто́чник превели́ких чуде́с яви́лся еси́ во хра́ме твое́м, и́же в Хо́нех; не то́чию бо змий вели́кий и стра́шный, на ме́сте том пребыва́вый, си́лою твое́ю потреби́ся, но и струи́ водны́я, вся́кий неду́г теле́сный врачу́ющия, откры́шася, да вси прославля́ющему тя Влады́це А́нгелов с ве́рою зову́т: Аллилу́иа.

Икос 5

Ви́дяще тя, я́ко свети́ло вели́кое, посреде́ лико́в а́нгельских блиста́ющася, пречу́дный Михаи́ле, к тебе́, по Бо́зе и Пресвяте́й Матери Божией, прибега́ем: озари́ луча́ми све́та твоего́ всех нас, вопию́щих ти си́це:

Ра́дуйся, вождю́ и храни́телю в пусты́ни наро́да богоизбра́ннаго; ра́дуйся, высо́кий посре́дниче зако́на, руко́ю Моисе́я на Сина́и да́ннаго.

Ра́дуйся, у него́же судии́ и вожди́ Изра́илевы си́лу и покро́в обрета́ху; ра́дуйся, чрез него́же проро́цы и первосвяще́нницы иуде́йстии дар ве́дения от всеве́дущаго Бо́га приима́ху.

Ра́дуйся, богобоя́зненныя законода́вцы та́йною прему́дростию снабдева́яй; ра́дуйся, суд и пра́вду творя́щим бла́гость на се́рдце полага́яй.

Ра́дуйся, Михаи́ле, вели́кий Архистрати́же, со все́ми Небе́сными си́лами.

Кондак 6

Провозве́стника тя Бо́жиих суде́б егда́ узре́ не́когда Мано́е, недоуме́ния и стра́ха испо́лнися, мня не жи́ти ктому́ на земли́; науче́н же от жены́ своея́ о бла́гости явле́ния и кро́тости слове́с твои́х, в ра́дости о име́вшем роди́тися, по словеси́ твоему́, сы́не свое́м Сампсо́не, благода́рне возопи́ Бо́гу: Аллилу́иа.

Икос 6

Возсия́л еси́ пречу́дно сла́вою, Михаи́ле, егда́ во о́бразе челове́честе пред Иису́сом Нави́ном стал еси́, глаго́ля: изу́й сапо́г с ногу́ твое́ю, аз есмь Архистрати́г си́лы Госпо́дни. Таково́му явле́нию твоему́ чудя́щеся, с любо́вию вопие́м ти:

Ра́дуйся, боговенча́нных глав неусы́пный охрани́телю; ра́дуйся, противля́ющихся вла́сти, я́ко Бо́жию повеле́нию проти́вящихся, ско́рый низложи́телю.

Ра́дуйся, усмири́телю наро́дных треволне́ний; ра́дуйся, незри́мый упраздни́телю злочести́вых обы́чаев.

Ра́дуйся, я́ко ты просвеща́еши сумня́щихся в час лю́тых недоуме́ний; ра́дуйся, я́ко ты исхища́еши искуша́емых от пагубоно́сных наважде́ний.

Ра́дуйся, Михаи́ле, вели́кий Архистрати́же, со все́ми Небе́сными си́лами.

Кондак 7

Хотя́й Влады́ка вся́ческих показа́ти, я́ко жре́бии сыно́в челове́ческих не самослуча́йни суть, но в десни́це Его́ вы́ну содержа́тся, даде́ тя ца́рствам земны́м засту́пника и храни́теля, да племена́ и наро́ды к ве́чному Ца́рствию Бо́жию уготовля́еши; сего́ ра́ди вси, ве́дущии о вели́цем служе́нии твое́м спасе́нию челове́ческому, благода́рне зову́т Бо́гу: Аллилу́иа.

Икос 7

Но́вая чудеса́ показа́ нам, Архистрати́же, тобо́ю на земли́ всех чуде́с Творе́ц и Влады́ка, егда́ храм, во и́мя твое́ созда́нный, от потопле́ния вода́ми ре́чными ди́вно спасл еси́, струя́м пото́ка в не́дра земна́я устреми́тися повеле́вый: е́же ви́дя блаже́нный Архи́пп с духо́вными ча́ды свои́ми, благода́рне к тебе́ возопи́:

Ра́дуйся, святы́х хра́мов Бо́жиих несокруши́мая огра́до; ра́дуйся, враго́м ве́ры Христо́вы необори́мая прегра́до.

Ра́дуйся, его́же веле́нию стихи́и покоря́ются; ра́дуйся, и́мже вси зло́бнии за́мыслы сокруша́ются.

Ра́дуйся, ве́рным ра́дость от Престо́ла Вседержи́теля износя́щий; ра́дуйся, неве́рных на стезю́ пра́вды и и́стины приводя́щий.

Ра́дуйся, Михаи́ле, вели́кий Архистрати́же, со все́ми Небе́сными си́лами.

Кондак 8

Стра́нное чу́до си́лы твоея́, Архистрати́же Бо́жий, уве́де на себе́ Авваку́м, егда́ по ма́нию Бо́жию, восхи́тив, прине́сл еси́ его́ скороте́чне от Иуде́и в Вавило́н, да́ти пи́щу Дании́лу, в ро́ве со львы заключе́ну: те́мже уди́влься превели́кому де́йствию си́лы твоея́, возопи́ с ве́рою: Аллилу́иа.

Икос 8

Весь еси́ в вы́шних, Михаи́ле, Престо́лу Царя́ Сла́вы предстоя́й, не дале́к еси́ и от ни́жних, ра́туя вы́ну со врага́ми спасе́ния челове́ческаго; те́мже вси вожделе́ннаго Оте́чества Небе́снаго дости́гнути хотя́щии, согла́сно тебе́ зову́т:

Ра́дуйся, нача́льниче Трисвята́го а́нгельскаго пе́ния; ра́дуйся, земноро́дных при́сно гото́вый предста́телю и храни́телю.

Ра́дуйся, прего́рдаго фарао́на с неве́рными еги́птяны порази́вый страннообра́зно; ра́дуйся, ве́рныя иуде́и путеводи́вый в пусты́ни пресла́вно.

Ра́дуйся, и́мже угаси́ся пла́мень пещи́ вавило́нския; радуйся, Иисусу Навину во Иерихоне на сопротивныя споборствовавый; ра́дуйся, и́мже посрами́шася ко́зни бесо́вския.

Ра́дуйся, Михаи́ле, вели́кий Архистрати́же, со все́ми Небе́сными си́лами.

Кондак 9

Вси и́ноцы Святы́я Горы́ Афо́нския в ра́достный тре́пет приидо́ша, ви́дяще, ка́ко богобоя́зненна о́трока, неи́стовно от нечести́вых златолю́бцев во глубину́ морску́ю с ка́мнем пове́ржена, спасл еси́: те́мже прия́вшая его́ оби́тель, и́менем твои́м красу́ющися, благода́рне взыва́ет ко Го́споду: Аллилу́иа.

Икос 9

Вити́й глаго́лы и любому́дров смы́слы не довле́ют ко изглаго́ланию си́лы твоея́, Михаи́ле, ка́ко во еди́ну нощь сто о́смьдесят и пять ты́сящ порази́л еси́ от во́ев царя́ ассири́йска Сеннахири́ма, да нака́жется про́чее не хули́ти и́мя Госпо́дне: мы же, почита́юще святу́ю ре́вность твою́ о сла́ве Бо́га и́стиннаго, с весе́лием зове́м ти си́це:

Ра́дуйся, правосла́вных во́инств непобеди́мый воево́до; ра́дуйся, злове́рных ра́тей страх и низложе́ние.

Ра́дуйся, пра́выя ве́ры и богопочита́ния насади́телю; ра́дуйся, душевре́дных ересе́й и раско́лов искорени́телю.

Ра́дуйся, благочести́выя Маккаве́и на по́ле бра́ни мно́гажды укрепи́вый; ра́дуйся, нечести́ваго вождя́ Антио́хова Илиодо́ра в саме́м хра́ме порази́вый.

Ра́дуйся, Михаи́ле, вели́кий Архистрати́же, со все́ми Небе́сными си́лами.

Кондак 10

Спасти́ся хотя́щим нам бу́ди помо́щник тверд, Архистрати́же Бо́жий, избавля́яй и храня́й нас от бед и напа́стей, па́че же от злых на́выков и грехо́в на́ших, да, преспева́юще в ве́ре, наде́жде и любви́ Христо́ве, с ра́достию о преди́внем заступле́нии твое́м ко Влады́це А́нгелов и челове́ков благода́рне зове́м: Аллилу́иа.

Икос 10

Стена́ еси́ ве́рующим челове́ком, Архистрати́же Бо́жий, и столп кре́пок во бра́нех со враги ви́димыми и неви́димыми; сего́ ра́ди, от сете́й бесо́вских тобо́ю избавля́еми, благода́рным се́рдцем и усты́ зове́м си́це:

Ра́дуйся, враго́м ве́ры и сопроти́вником Святы́я Це́ркве непобеди́мый противобо́рниче; ра́дуйся, смире́нным провозве́стником Ева́нгелия неутоми́мый споспе́шниче.

Ра́дуйся, во тьме злове́рия седя́щих све́том ве́ры Христо́вы просвеща́яй; ра́дуйся, лжему́дрием объюро́девших на стезю́ и́стины и покая́ния наставля́яй.

Ра́дуйся, гро́зный отмсти́телю кляну́щимся и́менем Бо́жиим всу́е; ра́дуйся, молниено́сный кара́телю глумя́щихся безу́мне о та́инствех святы́я ве́ры.

Ра́дуйся, Михаи́ле, вели́кий Архистрати́же, со все́ми Небе́сными си́лами.

Кондак 11

Пе́ние вся́кое хвале́бное побежда́ется мно́жеством чуде́с твои́х, Архистрати́же Бо́жий, я́же соверше́на суть тобо́ю не то́чию на Небеси́ и на земли́, но и в те́мных се́нех преиспо́дней, иде́же глуби́ннаго зми́я связа́л еси́ у́зами си́лы Госпо́дни, да избавля́емии от зло́бы его́ благословя́т Влады́ку Небесе́ и земли́, зову́ще: Аллилу́иа.

Икос 11

Светоно́сный служи́тель и́стины и чистоты́ богопочита́ния яви́лся еси́, Архистрати́же, егда́, прови́дя ко́зни ду́ха тьмы, воспрети́л еси́ ему́ и́менем Бо́жиим, да не де́рзнет сокрове́нное те́ло почи́вшаго вождя́ Изра́илева Моисе́я яви́ти ко обо́жению чу́вственным сыново́м Изра́илевым: сего́ ра́ди, чту́ще ны́не благосве́тлый собо́р твой, благода́рне вопие́м ти:

Ра́дуйся, чистоту́ богове́дения во дни Ве́тхаго Заве́та среди́ иуде́ев сохрани́вый; ра́дуйся, пле́велы заблужде́ний во дни но́выя благода́ти мно́гажды искорени́вый.

Ра́дуйся, язы́ческих прорица́лищ и куми́ров истреби́телю; ра́дуйся, христиа́нских подви́жников и страстоте́рпцев укрепи́телю.

Ра́дуйся, немощны́я ду́хом си́лою благода́ти Божией исполня́яй; ра́дуйся, изнемога́ющия пло́тию всеору́жием ве́ры облека́яй.

Ра́дуйся, Михаи́ле, вели́кий Архистрати́же, со все́ми Небе́сными си́лами.

Кондак 12

Благода́ть от Бо́га с Небесе́ испроси́ нам, пою́щим во сла́ву всечестна́го и́мене твоего́, Михаи́ле, да, осеня́еми твои́м заступле́нием, во вся́ком благоче́стии и чистоте́ поживем, до́ндеже, отреше́ннии сме́ртию от уз пло́ти, сподо́бимся предста́ти огнезра́чному Престо́лу Царя́ Сла́вы и с ли́ки а́нгельскими возопи́ти: Аллилу́иа.

Икос 12

Пою́ще многообра́зная твоя́ чудеса́, Михаи́ле, во спасе́ние на́ше соде́янная, мо́лим Го́спода и Влады́ку вся́ческих, да дух ре́вности по сла́ве Бо́жией, и́же в тебе́, николи́же оскуде́ет и в нас, зову́щих ти си́це:

Ра́дуйся, ве́рных рабо́в Бо́жиих во вре́мя благопотре́бно на высоту́ вла́сти преди́вне поставля́яй; ра́дуйся, проде́рзых и недосто́йных с высоты́ си́лы и сла́вы незри́мо низлага́яй.

Ра́дуйся, в день после́дний избра́нных от четы́рех конце́в земли́ име́яй собра́ти; ра́дуйся, и́мже гре́шним, я́ко пле́велы, по гла́су Бо́жию огню́ ве́чному преда́ны бу́дут.

Ра́дуйся, и́мже сатана́ со а́нгелы его́ во е́зеро о́гненное на ве́ки пове́ргнется; ра́дуйся, и́мже пра́веднии во оби́телех Отца́ Небе́снаго пресла́вне водворя́тся.

Ра́дуйся, Михаи́ле, вели́кий Архистрати́же, со все́ми Небе́сными си́лами.

Кондак 13

О пречу́дный Арха́нгелов и А́нгелов нача́льниче, за преди́вное служе́ние твое́ спасе́нию ро́да челове́ческаго приими́ от нас возноси́мый к тебе́ ны́не глас хвалы́ и благодаре́ния и, я́ко испо́лнь си́лы Божией, покры́й нас невеще́ственныма крило́ма твои́ма от всех враг ви́димых и неви́димых, да прославля́емому тобо́ю и просла́вившему тя Го́споду вы́ну зове́м: Аллилу́иа.

Этот Кондак читается трижды, зате́м 1-й Икос и 1-й Кондак.

Молитва

Святы́й и вели́кий Арха́нгеле Бо́жий Михаи́ле, неисповеди́мыя и пресу́щественныя Тро́ицы пе́рвый во А́нгелех предстоя́телю, ро́да же челове́ческаго приста́вниче и храни́телю, сокруши́вый с во́инствы свои́ми главу́ прего́рдаго денни́цы на Небеси́ и посрамля́яй вы́ну зло́бу и кова́рства его́ на земли́! К тебе́ прибега́ем с ве́рою и тебе́ мо́лимся с любо́вию: бу́ди щит несокруши́м и забра́ло тве́рдо Святе́й Це́ркви и Правосла́вному Оте́чествию на́шему, огражда́я их молниено́сным мече́м твои́м от всех враг, ви́димых и неви́димых. Не оста́ви же, о Арха́нгеле Бо́жий, по́мощию и заступле́нием твои́м и нас, прославля́ющих днесь свято́е и́мя твое́: се бо, а́ще и многогре́шни есмы, оба́че не хо́щем в беззако́ниих на́ших поги́бнути, но е́же обрати́тися ко Го́споду и оживле́нным быти от Него́ на дела́ блага́я. Озари́ у́бо ум наш све́том лица́ Бо́жия, и́же вы́ну сия́ет на молниеви́днем челе́ твое́м, да возмо́жем разуме́ти, что есть во́ля Бо́жия о нас, блага́я и соверше́нная, и ве́дети вся, я́же подоба́ет нам твори́ти и я́же презира́ти и оставля́ти. Укрепи́ благода́тию Госпо́днею сла́бую во́лю и немощно́е произволе́ние на́ше, да, утверди́вшеся в зако́не Госпо́днем, преста́нем про́чее вла́ятися земны́ми по́мыслы и похоте́нии пло́ти, увлека́ющеся по подо́бию несмы́сленных дете́й скороги́бнущими красо́тами ми́ра сего́, я́ко ра́ди тле́ннаго и земна́го безу́мне забыва́ти ве́чная и небе́сная. Над все́ми же си́ми испроси́ нам свы́ше дух и́стиннаго покая́ния, нелицеме́рную печа́ль по Бо́зе и сокруше́ние о гресе́х на́ших, да остаю́щее нам число́ дней вре́меннаго живота́ на́шего иждиве́м не во угожде́нии чувств и рабо́те страсте́м на́шим, но во изглажде́нии зол, соде́янных на́ми, слеза́ми ве́ры и сокруше́ния серде́чнаго, по́двигами чистоты́ и святы́ми дела́ми милосе́рдия. Егда́ же прибли́зится час оконча́ния на́шего, освобожде́ния от уз бре́ннаго сего́ телесе́, не оста́ви нас, Арха́нгеле Бо́жий, беззащи́тных проти́ву духо́в зло́бы поднебе́сных, обы́кших прегражда́ти душе́ челове́честей восхо́д в го́рняя, да, охраня́еми тобо́ю, безпреткнове́нне дости́гнем о́ных пресла́вных селе́ний ра́йских, иде́же несть печа́ль, ни воздыха́ние, но жизнь безконе́чная, и, сподо́бльшеся узре́ти пресве́тлое лице́ Всеблага́го Го́спода и Влады́ки на́шего, па́дше со слеза́ми у ног Его́, в ра́дости и умиле́нии воскли́кнем: сла́ва Тебе́, дража́йший Искупи́телю наш, И́же за премно́гую любо́вь Твою́ к нам, недосто́йным, благоволи́л еси́ посла́ти А́нгелы Твоя́ в служе́ние спасе́нию на́шему! Ами́нь.

Молитва Михаилу Архистратигу, грозному воеводе

Го́споди Бо́же вели́кий Царю́, Безнача́льный! Посли́, Го́споди, Арха́нгела Твоего́ Михаи́ла на по́мощь рабу́ Твоему́ (имя рек) изъя́ти мя от враг мои́х ви́димых и неви́димых. О, Госпо́день Михаи́ле Арха́нгеле, де́монов сокруши́телю: запрети́ всем врага́м борю́щимся со мно́ю, сотвори́ их, я́ко о́вцы и сокруши́ их, я́ко прах пред лице́м ве́тра. О, Госпо́день вели́кий Арха́нгеле Михаиле, шестокрыла́тый пе́рвый кня́же, воево́до Небе́сных сил Херуви́м и Серафи́м. О, угодный Михаи́ле Арха́нгеле, бу́ди ми помо́щник во всех де́лех, в ско́рбях, печа́лех, в пусты́нях, на распу́тиях, на река́х и на моря́х – ти́хое приста́нище. Изба́ви мя, вели́кий Михаи́ле Арха́нгеле, от вся́ких пре́лестей ди́авольских, егда́ услы́шиши мя, гре́шнаго раба своего́ (имя рек), моля́щегося тебе́ и призыва́ющаго и́мя твое́ свято́е, ускори́ на по́мощь мне и услы́ши моли́тву мою́.

О, вели́кий Арха́нгеле Михаи́ле, победи́ вся проти́вящияся мне си́лою Честна́го и Животворя́щаго Небе́снаго Креста́ Госпо́дня, моли́твами Пресвяты́я Богоро́дицы и святы́х апо́столов, свята́го проро́ка Бо́жия Илии́, святи́теля Никола́я Чудотво́рца, свята́го Андре́я юро́диваго, святы́х великому́чеников Ники́ты и Евста́фия, преподо́бных оте́ц и святы́х святи́телей, му́чеников и всех святы́х Небе́сных сил. Ами́нь.

Молитва сия древняя, написана на паперти Чудова монастыря в Кремле – в Церкви Михаила.

Канон Собору святого архангела Гавриила

Тропа́рь, гла́с 4:

Небе́сных во́инств Архистрати́же, мо́лим тя́ при́сно мы́, недосто́йнии, да твои́ми моли́твами огради́ши на́с кро́вом крилу́ невеще́ственныя твоея́ сла́вы, сохраня́я на́с, припа́дающих приле́жно и вопию́щих: от бе́д изба́ви на́с, я́ко чинонача́льник вы́шних си́л.

Глас 4

Пе́снь 1

Ирмос: Отве́рзу уста́ моя́ и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Яко све́та су́ща к Све́ту кра́йнему невеще́ственными причаще́нии, боже́ственнаго и невеще́ственнаго, молю́ тя, Арха́нгеле Госпо́день: у́м мо́й просвети́ моли́твами твои́ми, я́ко да воспева́ю тя́.

Соста́вим дне́сь ли́к боже́ственный, веселя́щеся, пе́рваго почита́юще безпло́тных умо́в, неизрече́нную ра́дость возвести́вшаго, в ми́р прише́дшую за бла́гость.

Предста́теля тя́ вели́ка, и к Бо́гу засту́пника, и сте́ну, и утвержде́ние, Гаврии́ле, иму́ще, лю́бящии тя́, избавля́емся от бе́д и вре́да змии́на, восхваля́ющии тя́.

Богородичен: Чи́сту Тя́, Всенепоро́чную, Гаврии́л я́ко узре́, – ра́дуйся! – Тебе́, Влады́чице, све́тло возопи́, браконеиску́сная, челове́ков спасе́ние, Ангелов похвала́ и честносло́вие.

Пе́снь 3

Ирмос: Твоя́ песносло́вцы, Богоро́дице, живы́й и незави́стный исто́чниче, ли́к себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Прича́стием Све́та невеще́ственнаго, я́ко невеще́ствен вои́стинну, Гаврии́ле, невеще́ственно просвеща́емь, све́т ви́ден бы́л еси́ вторы́й, веще́ственныя всегда́ челове́ки просвеща́я, пою́щия тя́.

Вели́каго благозва́ния сподо́бился еси́, вели́кое та́инство на́м откры́в, вели́кий Ангелов, и́мже взя́ти бы́хом от земли́ к велича́йшей высоте́ вельми́ чту́щии тя́.

Яви́ся все́м с небесе́, любо́вию ищу́щим тя́ при́сно, и уста́ви бу́рю на ны́ дви́жимую напа́стей же и скорбе́й, о Гаврии́ле Архистрати́же!

Богородичен: Сказу́я е́же дре́вле сокрове́нное та́инство, Отрокови́це, Тебе́ иногда́ Гаврии́л взыва́ше: ра́дуйся, Бо́жия пала́то, в ню́же всели́вся, вся́ челове́ки обожи́, я́ко Милосе́рд.

Конда́к, гла́с 2:

На небесе́х зря́ Бо́жию сла́ву и на земли́ с высоты́ подая́ благода́ть, нача́льниче Ангелов, му́дре Гаврии́ле, Бо́жия сла́вы служи́телю и ми́ра боже́ственный побо́рниче, спаса́й, соблюда́й вопию́щия ти́: са́м бу́ди помо́щник, и никто́же на ны́.

Седа́лен, гла́с 4

Безпло́тных служи́телей ты́ пе́рвствуяй, первове́чное повеле́нное стра́шное та́инство, тебе́ еди́ному, Гаврии́ле сла́вне, вверя́ется, рождество́ неизрече́нное Святы́я Де́вы: ра́дуйся, – провозглаша́я Ей, – Обра́дованная. Те́мже тя́ до́лжно, ве́рнии, с весе́лием при́сно ублажа́ем.

Сла́ва, и ны́не; Богородичен:

Яко невозде́ланная, Де́во, лоза́, красне́йший Гро́зд прозябла́ еси́, источа́ющ на́м вино́ спасе́ния, все́х веселя́щее ду́ши же и телеса́. Те́мже я́ко вину́ Тя́ до́брых блажа́ще при́сно, со Ангелом вопие́м Ти́: ра́дуйся, Благода́тная.

КрестоБогородичен:

Неискусобра́чная Чи́стая и Ма́ти Твоя́, Христе́, ви́дящи Тя́, ме́ртва ви́сяща на Кресте́, ма́терски пла́чущи, глаго́лаше: что́ Тебе́ воздаде́ евре́йский беззако́нный собо́р и неблагода́рный, и́же мно́гих и вели́ких Твои́х, Сы́не Мо́й, даро́в наслади́выйся? Пою́ Твое́ Боже́ственное снизхожде́ние.

Пе́снь 4

Ирмос: Неизсле́дный Бо́жий сове́т, е́же от Де́вы воплоще́ния Тебе́, Вы́шняго, проро́к Авваку́м усмотря́я, зовя́ше: сла́ва си́ле Твое́й, Го́споди.

Стоя́л еси́, прича́стием богонача́льным дре́вле, Гаврии́ле досточу́дне, просвеща́я проро́ка Дании́ла и изложи́в явле́ние недове́домых ду́хом.

Усты́ бре́нными тя́ ра́достно, о́гненное естество́ су́ща, восхваля́ем: изми́ на́с огня́ всегда́ паля́щаго, боже́ственными, Гаврии́ле, хода́тайствы твои́ми.

Па́че со́лнца в боже́ственную оде́жду, сла́вою непристу́пною блиста́ющуся, одева́емь, Архистрати́же служи́телей, Царю́ предстои́ши Небе́сному, веселя́ся.

Богородичен: Всю́ Тя́, Ду́хом Гаврии́л преочище́ну, Всенепоро́чная, разуме́в, вопие́т Тебе́ я́вственно: ра́дуйся, кля́твы избавле́ние и пра́отцев воззва́ние.

Пе́снь 5

Ирмос: Ужасо́шася вся́ческая о Боже́ственней сла́ве Твое́й, Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

Ума́ прича́стием Пе́рваго просвеща́емь, вторы́й ви́ден бы́л еси́ све́т, зовы́й со безчи́сленными Ангел чи́нми: Свя́т Оте́ц Вседе́тель, Сы́н Собезнача́лен и Ду́х Сопресто́лен.

Ви́д тво́й о́гнен, добро́та пречу́дна, вся́ку мы́сль удивля́я, ве́лия сла́ва, Гаврии́ле вели́кий, боже́ственных безпло́тных нача́льниче, все́х удобре́ние, ве́рно воспева́ющих тя́.

Боже́ственный я́ко ви́де тя́, во вре́мя кажде́ния дре́вле стоя́ща, Заха́рия, быва́ет не́м: не ве́рова бо твоему́ возвеще́нию стра́шному, его́же изгласи́л еси́, Гаврии́ле Архистрати́же.

Богородичен: Хра́м свяще́ния су́щи, Пренепоро́чная, гла́сом Гаврии́ла Арха́нгела, во святы́х почива́ющаго родила́ еси́ Пресвята́го Бо́га, вся́ освяща́ющаго и лю́тых изыма́ющаго.

Пе́снь 6

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те рука́ми воспле́щим, от Нея́ ро́ждшагося Бо́га сла́вим.

Земни́и язы́цы почести́ тя, ума́ светоза́рнаго и небе́снаго, не возмо́гут, пресве́тло просвеща́ема па́че ума́ и сло́ва Боже́ственными светлостьми́.

Заря́ со́лнца многосве́тлая, о́гненных слу́г нача́льниче, светоно́сными твои́ми ко Влады́це мольба́ми пою́щия тя́ тмы́ страсте́й исхи́ти.

Сове́ты язы́ков разори́, ве́ру правосла́вную утверди́, уста́ви раздира́ния церко́вныя, Арха́нгеле, ко все́х Творцу́ твои́ми моли́твами.

Богородичен: Глаго́лов Боже́ственных послушли́ва, Чи́стая, Гаврии́ловых была́ еси́, и Пребезнача́льнаго Сло́ва пло́тию родила́ еси́, безслове́сия ми́р изба́вльшаго.

Конда́к, гла́с 2

Архистрати́же Бо́жий, служи́телю боже́ственныя сла́вы, Ангелов нача́льниче и челове́ков наста́вниче, поле́зное на́м проси́, и ве́лию ми́лость, я́ко безпло́тных Архистрати́г.

Икос:

Ре́кл еси́, Человеколю́бче, в Писа́ниих Твои́х: мно́жеству ра́доватися Ангел на небеси́ о челове́це еди́ном ка́ющемся, Безсме́ртне. Те́мже мы́, и́же в беззако́ниих, Безгре́шне, еди́не Сердцеве́дче, Тя́ моли́ти всегда́ дерза́ем, я́ко Благоутро́бнаго, уще́дрити и низпосла́ти недосто́йным умиле́ние, Влады́ко, подая́й на́м проще́ние, о все́х бо на́с мо́лится Тебе́ безпло́тных Архистрати́г.

Пе́снь 7

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Иоа́нново рождество́, сла́вне, возвести́л еси́ Заха́рии иногда́, вну́трь Боже́ственнаго хра́ма предстоя́щу и пою́щу Изба́вителю и Бо́гу: препе́тый отце́в Госпо́дь и Бо́г, благослове́н еси́.

Пресла́вное хра́ма твоего́ благоле́пие пресве́тло, Гаврии́ле, освяща́ет ду́ши ве́рных и повелева́ет велегла́сно вопи́ти: препе́тый отце́в Госпо́дь и Бо́г, благослове́н еси́.

Просвеща́емь прича́стием, Архистрати́же, пе́рваго Све́та та́йно, вторы́й све́т вои́стинну ви́ден бы́л еси́, пою́щия просвеща́еши всегда́: препе́тый отце́в Госпо́дь и Бо́г, благослове́н еси́.

Богородичен: По́слан бы́сть Гаврии́л Архистрати́г, ра́дость возвеща́я Тебе́, Де́во Ма́ти Чи́стая, Ея́же ра́ди печа́ль преста́, и кля́тва вои́стинну непло́дна бы́сть, и благослове́ние процвете́ ве́рным во ве́ки.

Пе́снь 8

Ирмос: Отроки благочести́выя в пещи́ Рождество́ Богоро́дицы спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте дела́ и превозноси́те Его́ во вся́ ве́ки.

Священносло́вии свяще́нными тя́ лю́дие свяще́ннии пою́т, веселя́щеся, ты́ бо всевино́вное Сло́во воплоща́емо, е́же по на́м, Арха́нгеле, и е́же от на́с приглаша́еши Де́ве па́че ума́ же и сло́ва. Те́мже тя́ почита́ем во вся́ ве́ки.

Уму вели́кому же и пе́рвому невеще́ственно, Арха́нгеле, соединя́яся усты́ о́гненными твои́ми пое́ши пе́ние стра́шное, е́же пою́т вси́ Ангельстии ли́цы: Го́спода по́йте, дела́, и превозноси́те Его́ во вся́ ве́ки.

Благоле́пием я́ве испещре́н Боже́ственным, прохо́диши небе́сная, та́же и земна́я, соверша́я свяще́нная хоте́ния Христа́, все́х Бо́га, Ангелов нача́льниче Гаврии́ле, красота́ ве́рою при́сно тя́ хва́лящих.

Пло́тию по ипоста́си Сло́во челове́ком примеси́тися хотя́, имя́ше тя́, предтеку́ща и проуготовля́юща свяще́нную пала́ту, о свяще́нный Гаврии́ле: Го́спода по́йте, вопию́ща, и превозноси́те Его́ во вся́ ве́ки.

Богородичен: Яко престо́л красе́н Царе́в, я́ко все́х тва́рей преиму́щую, я́ко Пресу́щнаго еди́ну осуществова́вшую, челове́ки обожи́вшаго соедине́нием лу́чшим рождества́ неизрече́ннаго и стра́ннаго, благослове́нную воспои́м Де́ву.

Пе́снь 9

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Предстои́ши, стра́шно престо́лу благода́ти служа́, и облиста́емь светоли́тии е́же па́че ума́, и свяще́нно обожа́емь, и Све́т зри́мь, и просвеща́яй ве́рою чту́щия тя́, свяще́нне Гаврии́ле Архистрати́же.

Якоже не́бо, зри́шися, звезда́ми укра́шено, Боже́ственными светлостьми́, и, я́коже воево́да, рука́ми держи́ши ски́птр пресве́тлый и претека́еши всю́ зе́млю, во́лю Влады́чню всегда́ соверша́я и лю́тых ве́рныя изыма́я.

Ути́ши лю́тую ва́рварскую бу́рю, воздви́жемую всегда́ на рабы́ твоя́, церко́вныя уста́ви раздо́ры, пою́щим тя́ пода́ждь прегреше́ний избавле́ние, да́руй победи́тельная, Гаврии́ле, те́плым предста́тельством твои́м.

Предо́брая дво́ице и пресла́вная, Михаи́ле и Гаврии́ле, престо́лу предстоя́ще Боже́ственныя сла́вы, все́м проси́те грехо́в проще́ния и злы́х премене́ния, я́ко предста́телие и я́ко бла́гости Влады́чней во все́м подо́бящеся.

Богородичен: Све́т блиста́ния рождество́м Твои́м возсия́, и просвети́ всю́ подсо́лнечную, и предста́теля тмы́ погуби́, Богороди́тельнице Пречи́стая, Ангелов хвало́ и челове́ков все́х спасе́ние, непреста́нными гла́сы восхваля́ющих Тя́.

Свети́лен.

Архистрати́же Бо́жий, в кро́ве крилу́ твое́ю ополчи́вся, огради́ мя́, прибега́ющаго к тебе́, и во исхо́де изба́ви мя́ го́рьких истяза́телей, и спаси́ мя мольба́ми твои́ми.

Богородичен: Бо́г на́м, Чи́стая, прибе́жище, и си́лу, и по́мощь Тя́ подаде́ в ско́рбех на́ших и во обстоя́ниих, все́х у́бо на́с изба́ви от бе́д на́ших.

Молитва Архангелу Гавриилу

O, святы́й Арха́нгеле Бо́жий Гаврии́ле, при́сно предстоя́й Престо́лу Всевы́шняго, прера́достный благове́стниче и усе́рдный споспе́шниче на́шего спасе́ния! С сво́йственным тебе́ милосе́рдием приими́ сие́ хвале́бное пе́ние, oт нас недосто́йных тебе́ приноси́мое. Испра́ви моли́твы на́ша, и принеси́ я́, я́ко фимиа́м, на Небе́сный Олта́рь кади́льный; озари́ умы́ на́ша све́том позна́ния та́ин спаси́тельныя ве́ры на́шея; воспламени́ сердца́ на́ша любо́вию ко Христу́ Спаси́телю на́шему, обрати́ и укрепи́ жела́ния на́ша на спаси́тельный путь Ева́нгельских Его́ за́поведей; да в сем ве́це ти́хо и благоче́стно поживе́м во сла́ву Бо́жию, в бу́дущем же не лиши́мся ве́чнаго Ца́рствия Бо́жия, е́же получи́ти да сподо́бимся благода́тию Христа́ Бо́га на́шего, хода́тайством Пречи́стыя Его́ Ма́тере, Пренепоро́чныя Де́вы Мари́и и твои́ми многомо́щными ко Го́споду Бо́гу о нас моли́твами, и да просла́вим с тобо́ю и про́чими безпло́тными си́лами небе́сными и все́ми святы́ми Еди́наго во Тро́ице сла́вимаго Бо́га, Отца́ и Сы́на и Свята́го Ду́ха во ве́ки веко́в. Ами́нь.

Молитва вторая Архангелу Гавриилу

О, святы́й Арха́нгеле Гаврии́ле! Всеусе́рдно мо́лим тя, наста́ви нас, раб Бо́жиих (имена), к покая́нию от злы́х дел и ко утвержде́нию в ве́ре на́шей, укрепи́ и огради́ ду́ши на́ша от искуше́ний прельсти́тельных и умоли́ Созда́теля на́шего о отпуще́нии грехо́в на́ших. О, святы́й вели́кий Гаврии́ле Арха́нгеле! He пре́зри нас, гре́шных, моля́щихся тебе́ о по́мощи и заступле́нии твое́м, в ве́це сем и в бу́дущем, но при́сно помо́щник нам яви́ся, да непреста́нно сла́вим Отца́ и Сы́на и Свята́го Ду́ха держа́ву и твое́ предста́тельство во ве́ки веко́в. Ами́нь.

Молитва третья Архангелу Гавриилу

Святы́й вели́кий Арха́нгеле Гаврии́ле! Бо́жию Престо́лу предстоя́й и озаре́нием oт Боже́ственнаго све́та осия́нный, веде́нием же непостижи́мых та́ин о преве́чней прему́дрости Его́ просвеще́нный! Всеусе́рдно молю́ тя, наста́ви мя к покая́нию oт злых дел и ко утвержде́нию в ве́ре мое́й, укрепи́ и огради́ ду́шу мою́ oт искуше́ний прельсти́тельных, и умоли́ Созда́теля на́шего о отпуще́нии грехо́в мои́х.

O, святы́й вели́кий Гаврии́ле Арха́нгеле! Не пре́зри мене́ гре́шнаго, моля́щагося тебе́ o по́мощи и заступле́нии твое́м в ве́це сем и в бу́дущем, но при́сно помо́щник мне яви́ся, да непреста́нно сла́влю Отца́ и Сы́на и Свята́го Ду́ха держа́ву и твое́ предста́тельство во ве́ки веко́в. Ами́нь.

Собор Архангела Гавриила XVIII в.

Акафист Архангелу Божию Гавриилу

Кондак 1

Избраннаго Архангела, присно предстоятеля престолу Вседержителя, таинника благодати и радости благовестника, всечестнаго Гавриила, Пречистыя Девы невестокрасителя, пением похвальным благочестно почтим, со благодарением ему зовуще:

Радуйся, Архангеле Гаврииле, вечнаго спасения нашего благовестниче.

Икос 1

Ангел безплотный естеством бысть, славы присносущныя и вечныя Премудрости в создании мира зритель явился еси, Архангеле. Сего ради тебе вопием:

Радуйся, именем твоим силу Божию возвещаяй; радуйся, дивною красотою твоею неизреченную славу Божию являяй.

Радуйся, душе невещественный, свободный от уз телесного естества; радуйся, светлый уме, подобие невидимаго Божества.

Радуйся, божественнаго разума вместилище; радуйся, неизреченных тайн сокровище.

Радуйся, первосияннаго света чистейший луче; радуйся, пламенем Божественныя любви горящая свеща.

Радуйся, престола Божия предстателю; радуйся, славы Господней созерцателю.

Радуйся, нас земнородных утешение.

Радуйся, Архангеле Гаврииле, вечнаго спасения нашего благовестниче.

Кондак 2

Видяще тя, яко звезду лучезарную, благоукрашеннаго небесе разумнаго, созданнаго прежде видимого небесе и земли, Архангеле, да вопием с тобою Творцу Богу: Аллилуия.

Икос 2

Разум творческий созерцая в творении небесе и земли, и всего украшения их, благоговейно предстоял еси, Архангеле, Престолу Создателя: егда же сотворены быша звезды, велиим гласом восхвалил еси Того со всеми Небесными силами. Тем же и мы тебе вопием:

Радуйся, небо невещественное, славу Божию поведающее; радуйся, светило духовное, благость Творца возвещающее.

Радуйся, звездо, прежде видимого света возсиявшая; радуйся, пресветлая луно, обилие благодати, паче иных многих Ангел восприимшая.

Радуйся, зерцало Божественнаго откровения; радуйся, споспешнице духовнаго просвещения.

Радуйся, Первоангеле, тайны Божия открываяй; радуйся, Свете вторый, поющия ти верныя просвещаяй.

Радуйся, чистейшая пламенная к Богу любве; радуйся, немолчныя уста Того хваления.

Радуйся, огнем благодати сердечныя нас согревающая; радуйся, зной страстей тем отражаяй.

Радуйся, Архангеле Гаврииле, вечнаго спасения нашего благовестниче.

Кондак 3

Силе Божией тезоименит сый, споборник явился еси, Архангеле пресветлаго Небеснаго воинства, Архистратигу Михаилу противу падших мрачных духов. Пребыв же верен Господу Создателю с прочими безплотными чинами, взывал еси Тому Трисвятую Песнь. Ему же и мы с тобою вопием: Аллилуия.

Икос 3

Имея благодать неотъемлему ради верности твоей Господу, во веки пребываеши утверждаем во благом изволении. Тем же в похвалу вопием тебе сице:

Радуйся, не изменивый твоего благодатнаго стояния; радуйся, не оставивый блаженнаго горнего пребывания.

Радуйся, предстоятелю безплотных, веления Божия исполняяй; радуйся, предивным смирением украшенный.

Радуйся, Божиею благодатию навеки утвержденный; радуйся, огненною, никогда не отпадающею любовию ко Господу пылаяй.

Радуйся, небеснаго хлеба Ангельскаго присно вкушаяй; радуйся, небесных учителю, хвалебных создателю песней.

Радуйся, вышних руководителю, возводяяй нас к Славе небесней; радуйся, чиноначальниче немолчнаго Ангельскаго ликостояния.

Радуйся, увеселение и услаждение имущим сего блаженнаго достояния.

Радуйся, Архангеле Гаврииле, вечнаго спасения нашего благовестниче.

Кондак 4

Бурю помышлений сумнительных светом Божественныя благодати прогоняяй, приносиши свыше, Архангеле, мир в сердца наша. Тем же благодарно, прославляюще благодеяния твоя, воспеваем Спасителю Богу Песнь: Аллилуия.

Икос 4

Слышаще Боговдохновенныя сказания пророка Моисея о начале миробытия и повести о первых родех, учителя того благочестно разумеем тя, Архангеле, яко повелением Божиим недоуведанныя тайны тому открыл еси. Сего ради в похвалу тебе вопием:

Радуйся, светозарная звездо, облиставаемая от трисолнечнаго Божества; радуйся, славнаго изобилием благодати украшение созданнаго естества.

Радуйся, служебный душе на спасение человеком от Бога посылаемый; радуйся, светильниче Божиих откровений, на земли являемый.

Радуйся, пламень огненный, плевелы лжи и суеверия попаляяй; радуйся, мечу духовный, терние неверия и безбожия словом истины посекаяй.

Радуйся, истиннаго разумения словесе Божия небесный учителю; радуйся, величия тайны спасения предопределенный служителю.

Радуйся, тайниче под именем первозданного небесе, невидимый мир Ангельский прикровенно чрез бытописание нам указуяй; радуйся, в творческом слове Божием всемогущее ипостасное Слово Божие нам показуяй.

Радуйся, в создании человека, и в нарочитых Божественных словесех, действиях и в ветхозаветных образах, тайну Пресвятыя Троицы нам являяй; радуйся, в Божиих обетованиях древним патриархом начало нашего спасения возвещаяй.

Радуйся, Архангеле Гаврииле, вечнаго спасения нашего благовестниче.

Кондак 5

Боготечная струя откровений Божественных явился еси, Архангеле, и в последнем пророческом роде, ясно назнаменуя пророку Даниилу о последних временах, царех и царствиих. О сем вопием дивному в судьбах Своих Царю царей Богу хвалебную Песнь: Аллилуия.

Икос 5

Видяще исполнение ясных пророчеств Твоих, Архангеле, о будущем освобождении ветхозаветнаго Израиля от плена Вавилонскаго, и о явлении по сих в мире Христа Владыки. Мы же, яко Богоизбранный Израиль, благоговейно благодаряще Свободителя душ наших похвальную Песнь тебе приносим:

Радуйся, Божественнаго света селение; радуйся, наших мыслей озарение.

Радуйся, будущих судеб Божиих яснозрителю; радуйся, испытующих свидения Господня тайноучителю.

Радуйся, вождем благочестивым на враги одоление подаваяй; радуйся, мудрым правителем Божественное откровение являяй.

Радуйся, конечное посрамление языческаго нечестия в радости возвестивый; радуйся, муже желаний, духовных грядущих, свобождением Израиля возвеселивый.

Радуйся, возрождение Иерусалима, и возсоздание святаго храма предуказавый; радуйся, пришествие Христа Мессии ясно назнаменовавый.

Радуйся, седминами исчисливый время спасительныя смерти Христа; радуйся, откровением твоим ветхозаветному сыновнему богослужению конец наста.

Радуйся, Архангеле Гаврииле, вечнаго спасения нашего благовестниче.

Кондак 6

Проповедник всемирный радостныя вести о Спасителе был еси, Архангеле, егда бо приблизися седминами святому пророку Даниилу возвещенное время явление Христа Мессии, послан бысть еси к сетующим о неплодстве своем родителем Богоматери, возвестити им о рождении Благословенныя Дщери, предизбранней от веков Матери Мессии Христа, хотящаго приити на избавление человечества, Ему же с тобою вопием: Аллилуия.

Икос 6

Возсия тобою, Архангеле, сетующим родителем Богоотроковицы утешение о скором разрешении неплодства их, рождением Преблагословенныя. Прием от них убо велие благодарение, приими и от нас сицевую похвалу:

Радуйся, светлое зерцало Божия благости; радуйся, небесный вестниче спасительныя радости.

Радуйся, Божественный вестниче, носителю вышняго мира благословения; радуйся, скорый прогонителю душевнаго смущения.

Радуйся, блуждающим во тьме, Боговедения внезапное озарение; радуйся, седящим в смертной сени уныния, благодатное оживление.

Радуйся, обрадователю смиренных и уничиженных; радуйся, утешителю презренных и отверженных.

Радуйся, смертоносныя печали мира сего прогонителю; радуйся, спасительныя по Бозе печали возбудителю.

Радуйся, от находящия скорби избавляяй; радуйся, уповающия на Господа возвеселяяй.

Радуйся, Архангеле Гаврииле, вечнаго спасения нашего благовестниче.

Кондак 7

Хотяще яснее озарити путь веры восходящему Солнцу Правды, Христу Спасителю, Господь посла тя, Архангеле, благовестити такожде и иерею Захарии о рождении от него великого Иоанна, Предтечи Спасова. О сем убо радующеся вопием Богу: Аллилуия.

Икос 7

Дивному пророческому словеси твоему о рождении Предтечи неверие показавши того родитель немотою связан бысть от тебе, Архангеле. Мы же исполнение пророчества видяще, похвалу тебе сице вопием:

Радуйся, звездо светозарная, разгоняющая мрак прошедшия ночи смертныя; радуйся, деннице, вещающая невечерний день благодати новыя.

Радуйся, зачало Евангелия иерею Захарии предвозвестивый; радуйся, прославляти Господа разрешением языка последнего научивый.

Радуйся, пути ко Грядущему Спасителю небесный уготовителю; радуйся, семена спасительныя веры в Того на земли насадителю.

Радуйся, Божественнаго всемогущества ревностный показателю; радуйся, всякаго сомнения в том строгий наказателю.

Радуйся, Церкви ветхозаветныя невестоводителю; радуйся, Грядущаго Жениха Христа благовестителю.

Радуйся, завершителю пророческаго в Ветхом Завете откровения; радуйся, первый возвестителю Евангельскаго в Новом Завете исполнения.

Радуйся, Архангеле Гаврииле, вечнаго спасения нашего благовестниче.

Кондак 8

К Богоотроковице Марии, чудесно рожденной от неплодове, хранителем от Бога приставлен был еси, великий Архангеле, и во храме Божием Сию духовно и телесно питал еси, на всяк день пищу принося Ей и поучая непрестанно пети Богу: Аллилуия.

Икос 8

Весь мир небесный и земный дивится служению Твоему, Архангеле, в месяц бо шестый по зачатию великаго Предтечи Христова Иоанна, послан был еси в Назарет с таинством от века сокровенным и самим Ангелом неведомым, благовестити Пречистей Деве Марии Богородице, непостижимое Сына Божия в Ней зачатие. Тем же в похвалу Тебе, яко благовестнику нашего спасения радостно вопием:

Радуйся, совета предвечнаго откровение; радуйся, таинств сокровенных явление.

Радуйся, светоносный спасительный день, благовестившая многосветлая заря; радуйся, первый луче восходящаго Солнца Правды, Христа Царя.

Радуйся, Божественныя славы Сына Всевышняго возвестителю; радуйся, сладчайшаго имени Иисуса первый возгласителю.

Радуйся, благовестниче вечнаго Царства Христова; радуйся, спасительный утешителю человеческаго рода грешнаго.

Радуйся, Божественныя нашей веры наставниче; радуйся, усердный наш ко Господу Спасителю, молитвенниче.

Радуйся, хотящим последовати спасения вышний служителю; радуйся, всего рода христианскаго небесный покровителю.

Радуйся, Архангеле Гаврииле, вечнаго спасения нашего благовестниче.

Кондак 9

Все богатство смирения и непорочности явила еси, Приснодева, егда смутися о преславнем Архангельстем приветствии и недоумеющи вопросила благовестника: «Како будет сие, идеже мужа не знаю?» Ты же, утверждая Ю, рекл еси: «Дух Святый найдет на Тя, и сила Вышняго осенит Тя; тем же и раждаемое свято наречется Сын Божий». Тому убо поклоняющеся с тобою вопием: Аллилуия.

Икос 9

Витии многовещании не довлеют к похвале дивнаго служения твоего, Архангеле. Мы же, любовию побеждаеми, паки тебе яко благовестнику нашего спасения вопием:

Радуйся, небесный уме, Божественных откровений светлое зерцало; радуйся, отъемляй с духовных очес наших ветхаго закона покрывало.

Радуйся, Всевышняго Царя превышний служителю; радуйся, тайны Триестественнаго Божества твердый изъяснителю.

Радуйся, истинное вочеловечение Сына Божия провозглашаяй; радуйся, безмужнее Того зачатие от Приснодевы нашествием Святаго Духа возвещаяй.

Радуйся, Божественную силу Утешителя извествуяй; радуйся, благодатное тем осенение Пречистыя Девы благовествуяй.

Радуйся, кимвале, веления Божия возглашаяй; радуйся, органе, Божественное смотрение проставляяй.

Радуйся, псалтире, Божественное снисхождение Сына Божия возвещаяй; радуйся, прекрасная гусль Святаго Духа, утешение воспевающий.

Радуйся, Архангеле Гаврииле, вечнаго спасения нашего благовестниче.

Кондак 10

Спасти хотя в бури недоумения суще праведного Иосифа, обручника Пречистыя Отроковицы, явился еси тому, Архангеле, уверяя его о Неискусобрачней, яко зачатие у Ней от Духа Святаго есть, и по сих Христу рождшемуся в Вифлееме благовестил еси сию радость велию пастырем, и со множеством вой Небесных воспел еси: слава в вышних Богу! Ему же и мы присно вопием: Аллилуия.

Икос 10

Царю Христу прежде вольнаго страдания, молившемуся в вертограде, явился еси, Архангеле, укрепляя Его, яко человека в подвизе суща. Тем же и нас немощных духом, божественною благодатию укрепи, да радостно в похвалу тебе вопием:

Радуйся, скорый предстателю в беде сущих; радуйся, усердный заступниче, упование на тя имущих.

Радуйся, во искушениих сильный помощниче; радуйся, противу злых духов крепкий поборниче.

Радуйся, мрак недоумений и смущений от сердец наших прогоняяй; радуйся, познанием воли Божией разум наш озаряяй.

Радуйся, в печали сущия утешаяй; радуйся, елеем милости Божией сердца скорбных умащаяй.

Радуйся, истиннаго боговедения ищущих, небесный учителю; радуйся, жизни благочестивыя неложный известителю.

Радуйся, к равноапостольскому житию непрестанный возбудителю; радуйся, в горнее Царство благонадежный водителю.

Радуйся, Архангеле Гаврииле, вечнаго спасения нашего благовестниче.

Кондак 11

Пение хвалебное воспевал на небеси с прочими Небесными силами Воскресению Христову, и на земли возвеститель того был еси, Архангеле, явився мироносицам при гробе и благовестив тем возстание Христа Живодавца, Его же с тобою прославляюще, вопием: Аллилуия.

Икос 11

Светоподательный светильник откровения Божия, Пречистей Деве Богородице явился еси, Архангеле, и тепле молившейся на горе Елеонстей благовестил еси Ей, яко приближися честное Ея Успение, и райскую светоносную ветвь подал еси Ей. Сего ради приими от нас сию хвалебную Песнь:

Радуйся, славнейший от седми духов, предстоящих престолу Вседержителя; радуйся, честнейший на земли слуго Пречистыя Матери Христа Спасителя.

Радуйся, спасительных откровений Божиих изрядный служителю; радуйся, любве милосердия Божия присный благовести-телю.

Радуйся, теплыя молитвы к Богу верных на Жертвенник Небесный возносяй; радуйся, мир и благословение Божие оттуду им приносяй.

Радуйся, усердный помощниче в добродетельной жизни подвизающихся; радуйся, благий утешителю ко блаженней кончине приближающихся.

Радуйся, пред престолом Небесным Судию праведнаго о нас умоляяй; радуйся, яко с верою к тебе молящияся от вечных мук избавляются.

Радуйся, яко любовь к тебе имущий вечнаго Царствия со Ангелы сподобляются.

Радуйся, Архангеле Гаврииле, вечнаго спасения нашего благовестниче.

Кондак 12

Благодатныя знамения твоея помощи не токмо в древния, но и в новыя времена являеши, Архангеле, пречестная бо обитель дохиарская на Святей Горе Афонстей, создавши храм во имя Архангелов, доныне возвещает чудо твое, еще купно со Архистратигом Михаилом спасл еси благочестиваго послушника от горькия смерти в пучине морстей, и благодарне вопием Богу: Аллилуия.

Икос 12

Воспевая на небеси с прочими безплотными Честнейшую Херувим, тому же и нас сущих на земли научаеши. Всечестнейшая бо другая афонская обитель, именуемая «Достойно есть», именем своим проповедует другое преславное чудо явления твоего, Архангеле, благоговейному послушнику, его же научил еси небесней песни ко прославлению Богоматере. Сию бо поюще в честь Богородицы и тебе достойно в похвалу вопием:

Радуйся, небесный обрадователю Матери Преблагословенныя; радуйся, невестокрасителю Приснодевы Нетленныя.

Радуйся, небесный Ея воспевателю; радуйся, в вечней славе Той предстоятелю.

Радуйся, яко и прочия чины Ангельския возбуждаеши воспевати Честнейшую Херувим; радуйся, яко нас земнородных научаеши прославити Славнейшую Серафим.

Радуйся, ревнующим об ангельстем житии вышний покровителю; радуйся, в молитве к Богу предобрый учителю.

Радуйся, сердца молящихся любовию ко Господу возжигаяй; радуйся, фимиам чистых молитв на алтарь Небесный возлагаяй.

Радуйся, благодатию умиления молящихся услаждаяй; радуйся, в безмолвии их тою утешаяй.

Радуйся, Архангеле Гаврииле, вечнаго спасения нашего благовестниче.

Кондак 13

О великий Архангеле Гаврииле, сокровеннейших тайн Божиих служителю, воплощение Сына Божия прерадостный благовестниче, и нашего спасения усердный споспешниче. Приими от нас недостойных сие хвалебное и благодарственное пение, и умоли Господа даровати нам наследие в вечном Его Царствии, да с тобою непрестанно воспоем Ему: Аллилуия.

Сей Кондак глаголи трижды, затем Икос 1 и Кондак 1.

Молитва

О, Святый Архангеле Божий Гаврииле! Присно предстояй престолу Всевышняго, прерадостный благовестниче и усердный споспешниче нашего спасения! Милостиво приими от нас недостойных тебе приносимое сие хвалебное пение. Исправи молитвы наша и, яко фимиам, на небесный алтарь кадильный вознеси их. Озари умы наша светом веры православныя, воспламени любовию сердца наша ко Христу Спасителю нашему, обрати и укрепи желания наша на спасительном пути Евангельских заповедей. Да в сем веце тихо и благочестно поживем во славу Божию, в будущем же не лишимся Царствия Небеснаго, егоже получити да сподобимся благодатию Христа Бога нашего, ходатайством Пречистыя Его Матери, и твоими многомощными молитвами, и да прославим с Тобою и прочими безплотными силами Небесными и всеми святыми Единого в Троице славимого Бога: Отца и Сына, и Святаго Духа ныне и присно, и во веки веков. Аминь.