1953 жылы екінші қудалау кезеңі басталғанда Қаныш академиядан қуылып, Мәскеуді барып паналайды. Сол кезде Мәскеудегі басшылар оған қызмет істеймін десең, мынадай қызмет түрлері бар деп ірі-ірі институттардың басшылығын ұсынады және Мәскеуден пәтерді таңдап ал дейді. Қаныш бұл ұсынысты қабыл алмайды. Одан гөрі Қазақстанда қарапайым барлаушы болғаным жақсы деп қайтып келеді. Қазіргі прагматик жастардың көзқарасында Қаныш Сәтбаев «ел үшін» деген иллюзияға беріліп, керексіз қиындыққа шатылған қарабайыр ұлтшыл сияқты көрінеді. Бірақ сау ақылмен ойласаңыз, Қаныштың сол кездегі ұлтшылдығы мен жанкешті еңбегінің шарапатынан Қазақстанның қазіргі экономикасы әліге дейін жұмыс істеп тұр.