Талған дауыстар бірінен соң бірі ауада естіліп тұр: «Бірінші — екінші — үшінші — төртінші…» — есептеп жатыр. Отыз екіге жеткенде дауыс өшті. Үнсіздік ұзаққа созылды. Ақырында рота командирінің дауысы тыныштықты бұзды. «Басқа ешкім жоқ па?» — деп сұрады да, жауап күтіп, үнсіз тұрып қалды. Жауап естімеген соң: «Взвод взводымен…» дей беріп, кілт үнсіз тына қалды да: «Екінші рота…» — деді, өзін-өзі зорлағандай: «Екінші рота, алға, марш! Еркін жүруге болады!» — деді.
Таң сәулесі астында екі-екіден тізіліп бір ғана кішкентай колонна келеді, қып-қысқа колонна. Бар болғаны отыз екі-ақ адам.
Батыс майданда өзгеріс жоқ
·
Эрих Мария Ремарк
