Сонда да қол қусырып отырмаңдар. Тәнді ысқылап, көңілдің айнасына жеткенше егей бер. Әбден қашалып, ысылғанда ішінде құпия жатқан періштенің сипаты көрінеді. Ұсталар соққан өткір кетпеннен ғибрат алыңдар. Кетпенді жұмысқа аямай салып, қара топырақты қопарған сайын жарқырай түседі. Еңбекке жегілмей, құр тұрған кетпен мен күрек өзінен өзі тот басып шіріп кетеді. Мынаны қаперден шығармайық! Тәңірім ақылды жарқыратып өсіретін ілім берді. Таза ақылмен жүректі жарқыратып нұрландыр. Құлшылығың болмаса тоттан тазара алмайсың. Адам құлшылықты денемен ғана емес, ақылымен де, ойдың қуатымен де жасай алады. Жалқау ақыл, шабан ой тұрып қалған су сияқты борсып кетеді. Осыдан соң құмарлықтың араны ашылады. Құмарлықты тежесең жүректі тазалау оңай болады. Әлемнің ең мөлдір айнасына айналған «сом темірдің» бетінен дүниедегі барлық жаратылысты көруге болады.
Кіру не тіркелу пікір қалдыру үшін