Осыған орай Пауль Тиллих есімді экзистенциалист «БАР БОЛУҒА батырлық керек» («The courage to be», «Мужество быть») деген еңбек жазады. Яғни мына дүниеде БАР болып, адами сипатта көрініп жүру үшін кісіге БАТЫРЛЫҚ керек. «Адам атын арқалап жүру оңай емес» деген мораль осыдан шыққан. Тіршілікте Адамдық мәртебеңді арқалап жүру үшін Қайсарлық, Өжеттік, Батылдық керек. Бұл – өте ауыр міндет. Екінің бірі шыдас бермейді. Кей пенде қиналғанда, Адам атын лақтырып тастап, тобырға сіңіп жоғалады.
