– Тәңірі тағаланың жасырын жатқан хикметін көңіл көзі ғана көреді. Бас көзі оны көрмейді. Бастағы көз – шалбардың тесігі деген. Көңіл көзі саф таза болмаса соқыр боп қалады. Күнә мен қылмыстың кесірінен көңіл көзі қоқыммен бітеліп, түк көрмейтін көрге айналады. Сондықтан оны ұдайы тазалап отыру керек. Көңілдің көзін айна деп алсақ, күнә мен қылмыстың кесірін айнаға жабысқан қара тот деп біліңдер. Қара тот айнадан ештеңе көрсетпейді. Барлық заттың тазартқышы бар. Сол сияқты көңілдің айнасын жуып-шайып тазалайтын да өзінің құралы бар. Адамның түр-тұрпаты сом темірден сомдалған пұт сияқты. Бірақ біз тәннің сыртына емес, көңілдің ішіне үңілуіміз керек. Көңіл айнадай тазарып, ұлық Алланың хикметін анық көрсеткенше оны тоқтаусыз ысқылай бер, ысқылай бер, ысқылай бер!
Кіру не тіркелу пікір қалдыру үшін