Жолаушылар асығып-аптығып жүріп келеді, Гэндальф бет алған жағалауға жеткенше бір-екі миль қалды. Ол жаққа жеткен соң қақпа есігін іздеу керек. Көлдің солтүстік бұрышына келгенде, жол бойында сылдырлап ағып жатқан бұлақ көрінді. Жиегін көк майса басқан, суы тұнық екен. Сонау құздарға дейін созылып жатыр. Гимли қорықпай алға қарай жүріп, судың таяз екенін байқады. Тобықтан аспайды. Басқалары соңынан ілесіп, әр қадамдарын аңдап басып келеді, өйткені жасыл балдырлар шырмалып, аяққа оратыла берді. Оның үстіне, аяқтың асты тайғанақ. Фродо аяғы қап-қара лас суға тигенде жиіркеніштен селк ете қалды.
