Пайғамбарымыз (с.а.с.) хадисінде былай дейді: «Жәбірейіл жүрегіме мынадай нәрсе салды. Қалаған адамыңды сүй – нәтижеде бәрібір айырыласың. Өзің қалағаныңдай өмір сүр – бәрібір дүниеден өтесің. Сондай-ақ қалағаныңды істе оған міндетті түрде жауап бересің».
Әзірет Омар (р.а.): «Уа, адамдар! Ілім үйреніңдер! Алла тағала ілімді игі ниетпен үйренгендерге ұлылық киімін кидіреді. Егер ол адам күнә жасаса, бұл киімді кері алмау үшін оны үш мәрте тәубеге шақырады. Бұл қателіктер дүниеден өткенінше жалғасса да осылай болады», – деген.
Хасан әл-Басри Алла тағаланың: «Уа, Раббымыз! Бізге бұл дүниеде де, ақыретте де жақсылық бер» (Бақара, 201) аятында айтылған бұл дүниедегі жақсылық – ілім мен құлшылық, ақыреттегі жақсылық – жаннат», – деген
Әзірет Али (р.а.): «Ілім дүниеден жақсы, өйткені дүниені сен қорғайсың, ал ілім сені қорғайды. Ілім – үкім беруші, дүние – үкімге ұюшы. Дүниені жұмсаған сайын азаяды, ал ілімді таратқан сайын көбейеді», – деген.
«Адамдардың арасында пайғамбарлық дәрежеге ең жақыны – ғалымдар мен мұжаһидтер. Ғалымдар адамдарды пайғамбарлардың бұйрықтарын орындауға шақырады. Мұжаһидтер болса Пайғамбарлардың бұйрығына сай қаруларымен күреседі»
