İndiana
Əsl adı Avrora Düpen olan Jorj Sand 1804-cü ildə Parisdə anadan olmuşdur. Uşaqlığını o, nənəsi Mari Düpenlin yanında keçirmişdir. Jorj Sand romanlarla yanaşı, bir neçə nağıl, povest də yazmışdır. XIX əsrdə yazıb yaradan yazıçılarda olduğu kimi, onun yaradıcılığında da Fransanın adət-ənənələri, milli ədəbiyyatı haqqında əsərlər vardır. 1832-ci ilin aprel ayında çapdan çıxan «İndiana» romanı Jorj Sand təxəllüsü ilə fəaliyyət göstərən Avrora Düpenlin ilk əsəridir. Roman özündə romantizm, realizm və idealizmin ahəngini birləşdirir. Sevgi və nikah haqqındadır. Əsas qəhrəman cismən zəif, ruhu möhkəm gənc qadın İndianadır. Qoca ərini sevməyən qadın sevgi axtarışındadır. Daxilində kimisə sevmək istəyi o qədər çoxdur ki, saf, təmiz, lakin lal məhəbbətləri görmür. Özünü yalançı birinin mübaliğəli hisslərinə həsr edir. İndiana səhvini başa düşəcəkmi? Müəllif əsərdə göstərir ki, ailə həyatı dözülməzdirsə, qadının bu həyatı pozmağa və özünün istədiyi kimi hərəkət etməyə ixtiyarı vardır. Jorj Sandın fikrincə «İndiana» romanı ümumiyyətlə zülmə qarşı baş qaldırmış bir etirazdır. XIX əsr Fransa ədəbiyyatının görkəmli nümayəndələrindən biri olan Jorj Sandın bu əsəri böyük şöhrət qazanmışdır. İndiananın ailə faciəsi əsərin baş xəttini təşkil edir.
