Қартайғанда сауапты істерді көбірек жасауға құлшындыру
اَوَلَمْ نُعَمِّرْكُمْ مَا يَتَذَكَّرُ فِيهِ مَنْ تَذَكَّرَ وَجَآءَكُمُ النَّذِيرُ
«Сендерге ойланып-толғанған адамның (бұл өмірден) ғибрат алып (қыр-сырын) аңғара алатынындай жеткілікті ғұмыр нәсіп етпедік пе? Сонымен қатар, сендерге ескертуші (Пайғамбар да) келген болатын» («Фатыр» сүресі, 37-аят).
- 70 -
عَنْ أَبِي هُرَيْرَةَ رَضِىَ اللَّهُ عَنْهُ عَنِ النَّبِيِّ صَلَّى اللَّهُ عَلَيْهِ وَسَلَّمَ قَالَ: «أَعْذَرَ اللّٰهُ إِلَى امْرِئٍ أَخَّرَ أَجَلَهُ حَتّٰى بَلَغَ سِتِّينَ سَنَةً»
Әбу Һурайрадан (р.а.) жеткен хадисте:
«Пайғамбарымыз (саллаллаһу аләйһи уә сәлләм): «Алла тағала алпыс жас ғұмыр берген құлының ешбір сылтауына құлақ аспайды»,21 – деп айтқан» – делінген (Бұхари, риқақ 5).
21 Яғни, пайғамбар жасына келгенше құлшылық жасамаған адамның «тағы да біраз өмір сүрсем, құлшылық жасар едім» деген сылтауы қабылданбайды.
- 71 -
عَنْ عَائِشَةَ رَضِىَ اللَّهُ عَنْهَا قَالَتْ: مَا صَلَّى رَسُولُ اللّٰهِ صَلَّى اللَّهُ عَلَيْهِ وَسَلَّمَ صَلَاةً بَعْدَ أَنْ نَزَلَتْ علَيْهِ {إِذَا جَاءَ نَصْرُ اللّٰهِ وَالْفَتْحُ} إِلَّا يَقُولُ فِيهَا: «سُبْحَانَكَ رَبَّنَا وَبِحَمْدِكَ، اَللَّهُمَّ اغْفِرْ لِي»
Айша анамыз (р.а.): «Алла елшісі (саллаллаһу аләйһи уә сәлләм) «Алланың жәрдемі мен жеңісі келген кезде» деп басталатын «Насыр» сүресі түскеннен бастап әр намазда: «Субханәкә Раббәнә уә бихамдикә Аллаһумма-ғфирли» (Уа, Раббымыз! Сен кемшілік атаулыдан пәксің, Сені дәріптеп, мадақтаймын. Уа, Алла тағалам, мені жарылқап кешіре көр!) – деп айтатын болды», – деген (Бұхари, әзән 123/тәфсиру сура 110-1; Мүслим, саләт 219).
- 72 -
عَنْ جَابِرٍ رَضِىَ اللَّهُ عَنْهُ قَالَ: قَالَ رَسُولُ اللّٰهِ صَلَّى اللَّهُ عَلَيْهِ وَسَلَّمَ: «يُبْعَثُ كُلُّ عَبْدٍ عَلٰى مَا مَاتَ عَلَيْهِ»
Жәбирден (р.а.) жеткен хадисте:
«Алла елшісі (саллаллаһу аләйһи уә сәлләм): «Алланың құлдарынан кім қандай күйде (іс үстінде) жан тапсырса, ақыретте дәл солай қайта тіріледі», – деп айтты» – делінген (Мүслим, жәнна 83).
Кіру не тіркелу пікір қалдыру үшін