Есімі кеңінен белгілі хадисші ғалым Имам Нәуәуидің бұл еңбегінде Алланың сүйікті елшісі Мұхаммед пайғамбардың (саллаллаһу аләйһи уә сәлләм) таңдаулы хадистері іріктелген. Ана тілімізге ықшамдалып аударылғандықтан, қолыңыздағы кітапта әртүрлі мазмұндағы 874 хадис қамтылған. Еңбек хадистерге қызығушылық танытқан барша оқырман қауымға арналған.
Бірде Осман ибн Әбу әл-Ас (р.а.) Алла елшісіне (саллаллаһу аләйһи уә сәлләм) бойындағы жанын жегідей жеген дертін айтып, мұңын шақты. Сонда Алла елшісі (саллаллаһу аләйһи уә сәлләм) оған: «Денеңнің ауырған жеріне қолыңды қойып, үш рет «Бисмилләһ» деп айт. Содан кейін жеті қайтара «Әғузу бииззәтилләһи уә құдратиһи мин шәрри мә әжиду уә ухазиру» (Жаныма батқан мына дерттен және қауіптенген басқа да ауру-сырқаудан Алланың ұлылығы мен шексіз құдіретіне сиынамын)» деген дұғаны оқы», – деп айтты (Мүслим, сәләм 67).
Әбу Һурайра (р.а.): «Алла елшісі (саллаллаһу аләйһи уә сәлләм): «Адамның өзіне қатысы жоқ нәрселерден бойын аулақ ұстауы – оның жақсы мұсылман екендігінің белгісі»11 – деп айтты», – деген (Тирмизи, зуһд 11). 11 Яғни, кәміл мұсылман – өзіне қатысы жоқ барлық сөзден, ойдан, іс-әрекеттерден аулақ болған адам.
Әбу Муса Абдуллаһ ибн Қайс әл-Әшғари (р.а.): «Бір кісі Пайғамбарымыздан (саллаллаһу аләйһи уә сәлләм): «Біреуі өзінің көзсіз батырлығын көрсету үшін, енді біреуі ұлтының, руының немесе әулетінің намысы үшін, тағы біреуі рия қылып елдің назарын өзіне аудару үшін шайқасқандардың қайсысы Алла жолында күрескен болып саналады?» – деп сұрағанда, ол: «Кім Алланың сөзін (яғни, дінін) асқақтату үшін күрессе, міне, сол – Алланың жолында», – деп жауап қатты», – деген
