Сол себепті Расулалла (с.а.с.) айтқан: «Алланың бұйрығын ұнатып орындаңдар, олай жасамасаңдар, өздеріңді қинап жасаңдар, мұнда сабыр ету өте қайырлы». Өзін қинап мал-мүлік берген адам жомарт емес. Жомарттық оңай беру деген сөз. Өзін қинап дүние жинаған адам сараң емес. Сараңдық – жаратылысынан дүние жинау деген сөз. Олай болса көркем мінез – табиғи түрде болып, мәжбүрлеу болмауы керек. Мінездің кемелдігі – өз жүгенін шариғаттың қолына беру, бұйрықтары мен тыйымдарына бағынуы оңай болуы, жүрегінде ешқандай күмән мен қарсылықтың қалмауы. Алла Тағала: «Жо-жоқ, Раббыңның атымен ант етейін! Олар өз араларында туындаған дау-дамайды (оңтайлы шешу үшін) сенің билігіңе жүгініп әрі шығарған үкіміңе іштей де болса наразылық танытпастан (өзіңе) толық бойсұнбайынша, иман келтірген болып саналмайды»113. Бұл – бір сыр. Бұл кітап оны түсіндіріп бере алмағанмен бір ишара бере алады.
