Ол екі періште оған (мүмінге): «Раббың кім?» –дейді. Ол: «Раббым Алла» – дейді. Періштелер: «Дінің не?» – дейді. Ол: «Ислам» – дейді. Періштелер: «Сендерге кім жіберілді?» – дейді. Ол: «Алланың расулы Мұхаммед» – дейді. Періштелер: «Амалың (ісің) не?» – дейді. Ол: «Алланың кітабын оқыдым, оған иман келтірдім және оны растадым» дейді...»42
Иман келтіргендер бұл сұрақтарға мүдірмей дұрыс жауап бере алады, ал кәпірлер мен мұнафықтар болса дұрыс жауап бере алмайды. Әхли сүннет ғалымдары сұрақтардың сенім тақырыбында болатынын және жерленгеннен кейін қойылатынын айтады. Расулалла (саллаллаһу аләйһи уә сәлләм) бір мәйітті жерлегенде жерлеу ісі біткен соң қабірдің қасында тұрып былай дейтін: «Бауырларың үшін Алладан кешірім тілеңдер және Алладан (сенімінде) тұрақты қылуын қалаңдар. Ақиқатында ол қазір сұраққа тартылуда»43.
Халық арасына кең тараған бір сұрақ-жауап түрі бар. Қабірдегі жауап: Раббым − Алла Тағала, пайғамбарым − хазірет Мұхаммед (саллаллаһу аләйһи уә сәлләм), дінім − Ислам, кітабым − Құран, құбылам − Қағба, сенімдегі мәзһабым − әхли сүннет уәл жамағат, амалдағы мәзһабым − Имам Ағзам Әбу Ханифа, тегім Хазірет Адам (алейхиссәлам), Мұхаммедтің үмбетімін, мүмінмін, мұсылманмын, әлхәмдулиллаһ.
