автордың кітабынан сөз тіркестері  100 хадис

Асқар Болатбекұлы

Шын мәнінде, Алла тағала сендердің сыртқы дене-бітімдеріңе не түр-тұрпаттарыңа емес, жүректерің мен амалдарыңа қарайды1.
1 Яғни, соған қарап сауапқа бөлейді.

Жатар алдында: «Уа, Алла тағалам! Шексіз мейіріміңді қалап, қаһарыңнан қорқып, өзімді бір Өзіңе бағыштадым. Жүзімді Саған бұрып, күллі ісімді Саған тапсырып, бір Өзіңе арқа сүйедім. Өзіңнен басқа қамқор да, пана да жоқ. Түсірген Кітабыңа және жіберген пайғамбарыңа иман келтірдім» – деп дұға жаса.

Кімде-кім бір игі істі бастап өзгеге үлгі болса, өзінен кейін сол істі істегеннің сауабындай сауап алады.

Пайғамбарымыздан (саллаллаһу аләйһи уә сәлләм) бір сахаба: «Уа, Алланың елшісі! Қандай садақаның сауабы көп?» – деп сұрағанда, ол: «Денсаулығың мықты кезіңде, әрі бойыңды сараңдық билеп, байыған үстіне баюды көздегеніңде берген садақаның сауабы мол болады. Ал зекет пен садақаны жан алқымға келіп, «мынаншасын пәленшеге берем, мынаншасы да түгеншенікі» дейтін өлім аузындағы сәтке дейін кешіктіруші болма. Өйткені өлген соң, жиған-терген дүниең онсыз да түгеншенікі болады», – деген еді.

Егер Алла тағала құлына жақсылық қаласа, күнәларының жазасын дереу осы дүниеде береді. Ал егер құлына жамандық қаласа, күнәларының жазасын қиямет күні толықтай тартқызу үшін кейінге қалдырады.

Кімде-кім ғылым жолына түссе, Алла тағала оған жұмаққа барар жолды жеңілдетеді. Алланың үйлерінің бірінде бас қосып, Құран оқып әрі оны өзара талқылап түсінуге тырысқан қауым жан тыныштығы мен Раббыларының шексіз мейіріміне бөленеді, періштелердің қорғауында болады және Алла тағала құзырындағыларға оларды мақтайды.

Ғылым жолы – жаннат жолы

Бұл дүниеде жат жерде уақытша ғана жүрген адам немесе жолаушы сияқты бол.

Қиямет күні Алланың алдына барғанда, бірде-бір құл өзінің өмірін қалай өткізгендігі, алған білімін қалай қолданғандығы, дүние-мүлкін қандай жолдармен тауып, қай жолда сарп еткендігі және тәнін қайда жүріп тоздырғандығы жайлы есеп бермейінше, бір адым алға жылжи алмайды.

Мына үш қасиетті бойына бірдей жиған адам шынайы иманның дәмін татады:

1) Алланы және оның елшісін бәрінен де артық жақсы көру;

2) Біреуді жақсы көрсе, тек қана Алла разылығы үшін жақсы көру;

3) Алла тағала күпірліктен құтқарған соң, қайтадан сол күпірлікке қайтып оралудан отқа түскеннен бетер жаны түршігіп, аза бойы қаза болатын адам.

(Бұхари, Мүслим)