Жаңбырдан кейін жиналған қақ бірнеше күнде сасық суға айналады. Себебі қозғалмайды. Енді көп қозғалмайтын бұлшық етті ойлаңыз, оның жайы қалай болады? Спортпен шұғылданғанда бұлшық еттер ширығып, серпіліп, тотынан тазарған темірдей жарқырап шыға келеді.
Адамды қартайтпайтын бір нәрсе болса, ол – спорт. Мына қызықты қараңыз: спортпен айналысқан адам ауыр темір көтереді, ұзаққа жүгіреді, құм салынған бокс қабын ұрғылайды. Айналысып біткенде демалып қалады, жаңадан күш қосылады. Дәл осындай физикалық еңбекті жасаған адам шаршап, қалжырайды. Қарап тұрсаңыз, спортқа ниет еткеннен бастап-ақ ағзаңыз басқа режимге өзгереді.
Спортпен айналысу барысында миыңыз демалады. Содан болар, жақсы идеялар бірінен соң бірі топырлап келе бастайды.
Қасиетті Құранда: «Ендеше, кімде-кім зәредей (мысқалдай) жақсылық жасаса, соның қарымын алады. Ал кімде-кім зәредей (мысқалдай) жамандық жасаса, соның жазасын тартады»
«Мен жалғыз өзім не болам?» деп салыңыз суға кетпесін. Бірдің үлгісі мыңға азық болады. Сізді көріп шабыттанып, еліктейтін адамды Құдай өзі әкеледі. Адамның ниеті амалынан қайырлы. Бүкіл әлемді алты күнде жаратқан Аллаға мың адамдық қоғамды өзгерте салу қиын боп па?
