Бейімбет Майлиннің әр жанрдағы өнімді еңбегі өз дәуірінің шындығын ашық көрсетті. Елдің, соның ішінде ауыл адамының санасындағы өзгерулер мен жаңаруларды, халық бастан кешкен оқиғаларды, әлеуметтік өмірдің шытырман қайшылықтарын шебер суреттеді. Халықтың ғасырлар бойы қалыптасқан тұрмыс-салт болмысының жойылып, оның орнына орныға алмай жатқан жаңа құрылым кезеңінің сырын көркем баяндайды. Шығармаларында автор мен халық арасындағы орныққан байланыс көрінеді. Оқиғалар мен кейіпкерлердің мінезі де бір-бірімен ұштасып, шынайы әңгімеленеді.
