Осы жалпақ тас Томпақ торайды басынан аяғына дейін жанап өтті; оның қолындағы мүйіз мың-сан ақ жарықшаққа айналып лезде жоқ болып кетті. Томпақ торай тіл тартпастан, ұшып бара жатып аударылып, құлама жардан бір бүйірлей дыбыссыз бір-ақ ұшты. Тас екі мәрте шоқырақтай соғылып, орманға жетіп құлады. Томпақ торай қырық футтай ұшып барып, теңіздегі сол қызыл, шаршы үйіндіге арқасымен құлады. Басы қақ жарылып, айналасы қып-қызыл болып кетті... Өлер алдында тұяқ серпіген шошқадай, Томпақ торайдың қол-аяғы дір-дір ете қалды. Теңіз бұрынғы баяу, ауыр демін ішіне тартты, үйіндінің үстінде ағарған қызыл көпіршік қайнады; ал теңіз толқыны қайта соққанда, Томпақ торайдың денесі жоқ болып шықты.
