Қалжыңшыл қылжақпас

Шәкәрім Құдайбердіұлы

Сынатарсың өзіңді,

Менің түгім құрамас.

Өлген кісі сөзімді

Сынама деп сұрамас.

Жайдары күлдіргіш, қалқам,
Ұятсыз, әдепсіз, салқам.
Күлгенім бір сенің арқаң,
Ыржақта,қылжақта,әйді
Мазақ қыл көрінген жайды
Өнер қыл қылжақтағанды
Сөзіңе құмарым қанды,
Жыртақта,
бұлғақта,
әйдә!
Жолыққан кісіге соқтық,
Қaлжыңға қосып айт боқтық
Осы ғой сәулесі жоқтық,
Сен күлдің,
мен білдім,
әйдә!
Ішің у, сыртыңды майла,
Есердің бәрін де жайла.
Күлкімен көздерін байла,
Сенделдің,
жөңделдің,
әйдә!