автордың кітабын онлайн тегін оқу Қалжыңшыл қылжақпас
Жайдары күлдіргіш, қалқам,
Ұятсыз, әдепсіз, салқам.
Күлгенім бір сенің арқаң,
Ыржақта,қылжақта,әйді
Мазақ қыл көрінген жайды
Өнер қыл қылжақтағанды
Сөзіңе құмарым қанды,
Жыртақта,
бұлғақта,
әйдә!
Жолыққан кісіге соқтық,
Қaлжыңға қосып айт боқтық
Осы ғой сәулесі жоқтық,
Сен күлдің,
мен білдім,
әйдә!
Ішің у, сыртыңды майла,
Есердің бәрін де жайла.
Күлкімен көздерін байла,
Сенделдің,
жөңделдің,
әйдә!
Сөзіңе күлгенді ұна,
Күлмесе жалынып сұра.
Сөйлесең аузыңды бұра,
Жедің боқ,
әбден соқ,
әйдә!
Бай өліп, баласы қалса,
Қасына сені ертіп алса.
Қылжақ пен күлкіге салса,
Тамақ тоқ,
қайғы жоқ,
әйдә!
Жағасың күлкімен жүріп,
Шығасың ішіне, кіріп.
Аласың аузынан жырып,
Бұлғылда,
жылпылда,
әйдә!
Маймыл бол есерде сондай,
Арсылда адамға болмай.
Ит болып өтесің оңбай,
Жырқылда,
тырқылда,
әйдә!
Сынатарсың өзіңді,
Менің түгім құрамас.
Өлген кісі сөзімді
Сынама деп сұрамас.
Сынасын деп жазғамын,
Сынама деп шатпаймын.
Қазақтың мінін қазғамын,
Айтқанымнан қайтпаймын.
Қазақ сыншы болса екен,
Болмасын деп айтпаймын.
Жетегіме ерсе екен,
Өлсем де тыныш жатпаймын.
Мен жетелеп өлемін,
Өрге қарай қазақты,
Өлсем де ойын бөлемін,
Сөзбен салып азапты.
Білімдінің сөзіндей,
Сөзім демен таза-ақ-ты.
Қазақ болса өзімдей,
Қыла алмайды мазақты.
Қазақтың жайы белгілі,
Өлеңі өңкей құрама,
Байқадың ғой ендігі,
Оны менен сұрама.
