автордың кітабын онлайн тегін оқу Ананың хаты
Байғүс ана хат жазыпты,
Депті: "Балам, сағындым,
Ұмыттың ғой, бізді, тіпті,
Бір келмедің, не қылдым?
Оқу іздеп кеткеніңнен
Ауылға бір қайтпадың.
Біз не көрдік жеткеніңнен,
Елге уәж айтпадың,
Жас күніңде көп ойлаушы ем,
Сені әлдилеп, тербетіп.
Арманым жоқ деп ойлаушы ем,
Қалқам өссе, ер жетіп.
Болмай шықты ойлағаным,
Сен жігіт боп жеткен соң,
Қалжырадым, ойла, жаным,
Сен алысқа кеткен соң.
Пәлен жерде сені сырттан
Ұлық болды деседі.
Ағайының естіп жүрттан,
Гулеп желдей еседі.
Арманым зор неғылайын,
Елге келіп тұрмадың.
Маған салып сары уайым,
Артқа мойын бүрмадың.
Ойла енді, кім мені күтті,
Қартайдым, кем саулығым.
Үй іші де тозып бітті,
Тозды баста жаулығым.
Қалжырадым, сағындым мен,
Бір кеп көрін көзіме.
Үмытқандай не қылдым мен,
Жауап қайтар сөзіме".
