Ақбілек — Жүсіпбек Аймауытұлының қаламынан туған психологиялық роман. Роман тұңғыш рет 1927 жылы «Әйел теңдігі» журналында жарияланды. «Ақбілек» романындағы барлық оқиғалар тікелей өмірден алынған. «Ақбілек» романы — қазақ ауылындағы дүрбелең жылдар шындығы, олардың дәстүрі мен тұрмысы, жекелеген адамдардың іс-әрекеттері мен қарым-қатынастары, әсіресе басты кейіпкер Ақбілектің қасіретке толы өмірі, мұңы мен шері жайындағы туынды. Бір ғана қазақ қызының күрделі тағдыры негізінде әлеуметтік төңкерістер тұсындағы қазақ ауылының өзгеру процесін суреттеген алғашқы қазақ романдарының бірі. Сонымен бірге халқымыздың өткен өмір көріністерін, адамдар арасындағы көзқарастар қақтығысын, ел мен жер, келешек күндерге деген наным, сенімдері серпінді, шабытты, көркем кестеленеді. Кейіпкерлер келбеті, іс-қимылдары да нанымды жеткізіледі. Қазақ төңкерісінен кейінгі қазақ ауылының өмір-тірліктері, ақ гвардияшылар әрекеті кеңінен көрініс береді. Романда көтерілген басты мәселе — қазақ қызының тағдыры мен әйел теңсіздігі. Барша оқырман қауымға арналады.
Ақбілектің тағдырындай оқиға қазақ даласында бұрын-соңды болмаған. Бұл азапты ел қалай өткерді? Әкесі ше? Бәрін қойшы, Ақбілек не болды?
Шығарма әйел құқығы, өмірі, жаңа қоғамдағы әйелдің орны мен құндылығың суреттейді. Сонымен бірге оқырманға ерекше әсер етіп, сол кезеңдегі қазақ әйелінің бейнесін жаңаша түсінуге жол ашады.
Өмір серік жар табу – бір қиын жұмыс. Тапқан жары Ақбілек еді. Ол мұндай күйге ұшырап отыр. Ақбілек оқиғасы қазақ баласының басында болмаған, төтен оқиға ғой. Жалғыз Бекболат пен Ақберген емес, мұндай оқиғадан кейін не істеу, қалай болу керектігін бүкіл қазақ баласы ойлап көрген жоқ қой.
Дүниеде әйел бір-бірімен өштеспесін. Әйел өштессе, аяу дегенді білмейді. Қайдағы жараның аузын жұлып алатын нәзік, жанды жерді аңдиды. Әйел шақса, шаяннан бетер шағады. Әйел өмірі кешірмейді.
Ана, ана, мейірімді ана. Адамды сүйгіш, ар-ұятты, көргенді бала болсақ, әкемізге бір есе, анамызға он есе борыштымыз. Тәжім еттік бізді тәрбиелеген аналарға! Көп жасасын аналар! Көсегесін көгертсін балалар!.
