Бұл еңбекте «Фатиха» сүресі қамтыған мәселелер жеке-жеке тақырып ретінде алынып, қарапайым тілде түсіндірілген. Бүгінгі күнмен байланыстыра отырып, Құран аяттарының адамға қалай бағыт-бағдар беретіні айтылған. Қаламгер аяттардағы өмірге нақты керекті мәселелерді түсіндіруге тырысқан.
Шайтан – Алла Тағаланың күнәһар мақұлығы. Әлемдегі күллі дуалистік түсініктегі адамдар шайтанды Алланың күндесі, Алламен айқасқа әзірленіп жүрген күш иесі деп қарайды. Әсте олай емес, керісінше, Құран кәрімде шайтанның «Мен Алладан қорқамын»37 деген сөзі келтірілген.
Алла «басы-соңы» деген қағидалар жоқ кезде бар болғанын ескерсек, «Алланы кім жаратты?» деген сұрақ та мүлде логикаға сай емес. Демек, мұны «шексіздік» деп шектелгеніміз жөн болады. Себебі Абай айтқандай, «Шектеулімен шексіздікті біліп болмайды». Мәселен, шексіздіктен бір миллиардты алып тастасам қанша қалады? Не болмаса, шексіздікке бір миллионды қоссам қанша шығады? Байқайсыз ба, сұрақ дұрыс емес. Ендеше, Жаратушыны жаратылғандардың заңдарына сыйғызуға тырысу, осындай әрекеттен басқа еш нәрсе емес.
Алла Тағала бұл әлем болмай тұрғанда да бар болған әрі уақыт пен мекен болмаған кезде де бар еді. Алла Тағала өзі жаратқан нәрселерге еш ұқсамайды һәм әлемдегі ережелер Аллаға жүрмейді. Қалайша орындыққа тән, сезбеу, қозғалмау, ішпеу-жемеу, білмеу-күлмеу сынды ережелер маған жүрмейтін болса, мына әлемдегі уақыт, мекен сынды тағы басқа ережелер де Аллаға жүрмейді.
