Зікір айтамыз ол Хаққа,
Мұсылмандарың жұмаққа.
Кәпірлерің тозаққа.
Алғашқы бала сабаққа,
Соңғы бала шыбыққа.
Ғайыр бат та, ғайыр бат.
Молдамызға ғұмыр бат.
Әкемізге бақ-дәулет,
Шешемізге рақмет бат.
Нұр Мұхамбетке салауат,
Азан уақыты болып тұр,
Ассалаумағалейкум, молдеке!
Үйге қайтуға ұлықсат.
Пайғамбарға салауат
Он сегіз мың ғаламға сәруар болған Мұхамбет
Отыз үш мың асхабқа сардар болған Мұхамбет.
Жоқшылық пен індетке қанағатшыл Мұхамбет,
Күнә тартқан үмбетке шапағатшыл Мұхамбет.
Кірпік ілмей талықты, сабыр табар Мұхамбет,
Жетім, міскін, ғаріпті жарылқаған Мұхамбет.
Үлес берген пендеге сара жолдан Мұхамбет,
Азап кешкен әммеге пана болған Мұхамбет.
Әбужаһил залымға төзім қылған Мұхамбет,
Жалақордың Хақ жолға өзін бұрған Мұхамбет.
Жалғаншының қайғысын ұмыттырған Мұхамбет,
Зікір айтып Рухын шынықтырған Мұхамбет.
Малғұн, лағин, шайтанға соғыс қылған Мұхамбет,
Шариғатқа үмбетін тоғыстырған Мұхамбет.
Тариқатқа жолбасшы, жаны ышқынған Мұхамбет,
Ақиқатты баршаға табыстырған Мұхамбет.
Жамандыққа жақсылық бағыштаған Мұхамбет,
Тауфық тілеп, залыммен алыспаған Мұхамбет.
Сәждеге ұрып маңдайын, тағат қылған Мұхамбет,
Қабыл болып дұғасы таң аттырған Мұхамбет.
Залымдардың бәлесін харап қылған Мұхамбет,
Бір Алланың Дидарын талап қылған Мұхамбет.
Бес уақыт намазда имам болған Мұхамбет,
Миғражда көргені дидар болған Мұхамбет.
Ғаршы, Күрсі базарын иеленген Мұхамбет,
Сегіз бейіш төріне кие берген Мұхамбет.
Міскін Ахмет құлына мұра қылған Мұхамбет,
Жетімдерге жүрегін шыра қылған Мұхамбет.
