Цётка

Суседзям у няволі

Ад сваіх хат, ад сваіх ніў, 

Ад ўсіх братоў, хто толькі жыў, 

Нясу сьлязу, нясу я стогн, 

Нясу нагаек царскіх звон.

У нас там ноч, у нас там стук, 

Мы ацямнелі з страшных мук, 

З нас пот ліецца, сохнуць грудзі.

Нас катуюць! Чуйце, людзі!

Чуйце, чуйце, руку дайце!

Мы вам родны. Праўду знайце:

 Ці у долі, ці ў нядолі –

З вамі станем ў адным полі, 

Рука ў руку з вашым братам

За свабоду перад катам.

1906