Дайындаған: Елмұрат Ораз

 

«Шабыт» баспасы

Алматы, 2022

Алпамыс батыр

(А. Нысанов нұсқасы)

Бисмилла деп бастайын,

Көңілге жад қып Алланы.

Өткен шығар пендеміз

Бар болса қатар жалғаны.

Құданың өзі бейайып,

Мақлұқаты тамғалы.

Ерлерден дастан бастайын,

Бар болса бізге әруағы.

Бұл Құдайға өлім жоқ

10 Бейбаян депті пендені.

Баяғы өткен заманда,

Ілгері өткен адамда.

Бір әңгіме бастайын,

Адамзат болған жаһанда.

Жиделі Байсын жерінде,

Қоңырат деген елінде,

Құлтай деген өтіпті.

Дүниеге адам тоқталмай,

Солардың бәрі кетіпті.

20 Замана заман болғанда,

Азат болып мұсылман

Басына бабы қонғанда,

Халық болып бекітті.

Жиделі Байсын жер бопты,

Қоңырат деген ел бопты.

Сол елдің қалың ішінде,

Құлтай деген ер бопты.

Ер Құлтайдың баласы —

Байбөрі деген шер бопты.

30 Бала көрмей Байбөрі,

Көзінің жасы көл бопты.

Алпысқа келген жасында,

Байбөрі шыққан басында,

Көргеніңдей қызыл тіл

Бір-ақ айт толық жасырма.

Күндерде бір күн Байбөрі

Жылқысына шығады.

Бала көрмей Құдайға

Күндіз-түні жылады.

40 Әйелі болды Аналық,

Қартайған еді мұның да уағы.

Елуді ол да жағалап,

Елу бірге шығады.

Тарығып өзі жүргенде,

Сартай деген біреуден

Бір бала онан туады.

Сартай деген ер еді,

Елуге ол да кеп еді.

Байбөрінің қоңсысы

50 Өзіне малай боп еді.

Маған бала болсын деп,

Сартайменен келісіп,

Аналыққа алып береді.

Асырады Аналық,

Тәрбиелеп бала ғып.

Атын Үлтан қойыпты,

Байбөрі қылды ағалық.

Басы болды қалқандай,

Аузы болды талқандай.

60 Мұрны болды кепедей,

Екі құлағы төбедей.

Мұнарадай бойы бар,

Кәлласы үлкен түйедей.

Аяқ-қолы шынардан,

Беті қара күйеден. 

Қозғалған төбе сықылды,

Құлаған тауды сүйеген.

Үлтан құл келді жетіге,

Адам қарап болмайды

70 Арыстанның бетіне.

Мысалы бөрі төбедей

Қораның жатса шетінде.

...