Дайындаған: Елмұрат Ораз

 

«Шабыт» баспасы

Алматы, 2022

Қисса Данадан

Бисмилла, мен сөйлейін Тәңірім атын,

Мұны жазған Сергелі Уақ затым.

Ақылбектің өлеңін тыңдасаңыз,

Ыбраһым шаһның сөйлейін хикаятын.

Ақылбек Сабалұғылы мұны жаздым,

Қайғыға зағыпырандай болып аздым.

Хикаятты өлеңге айналдырып, 

Талайын шығарушы ем өлең наздың.

Нағашым Рахмет, Абай өткен,

10 Құнанбай балаларын еркелеткен.

Жалғаннан өлмей, сірә, кім қалады,

Анам Талжан, Асылбай, бәрі кеткен.

Мен де белгі тастайын өлмей тұрып,

Алланың аманатын бермей тұрып.

Артыма қисса басып қалдырайын,

Түндіксіз, қараңғы үйге кірмей тұрып.

Қиссаны шығарушы деген құрсам,

Кітаптағы нұсқаға мойын бұрсам.

Мирас көріп һәр адам оқыр ма екен,

20 Бір күні қаза жетіп өліп қалсам.

Тіліме келтірейін жалғыз Хақты,

Безейін шамам келсе тіл мен жақты.

Ыбраһым падишаның хикаятын, 

Жарандар, енді айтайын сал құлақты.

Құдайым жәрдем берсе, жазайын хат,

Аллаға қабыл болсын көп мінәжат.

Өтіпті Ыбраһым атты бір падиша,

Шаһарын мен айтайын Хадарабад.

Бар екен бір баласы жүзі көркем,

30 Һәркімге мейірін салып жүрген екен.

...