автордың кітабын онлайн тегін оқу Алланы танығым келеді. 1-кітап
Алланы танығым келеді
Өзкан Өзе
1
Алматы, 2021
ӘОЖ 28
КБЖ 86.38
Ө 46
ҚР Ақпарат және қоғамдық даму министрлігі
Дін істері комитетінің дінтану
сараптамасының оң қорытындысы берілген
Аударған: Қанат Сұлтанбекұлы
Өзкан Өзе
Ө 46 Алланы танығым келеді. 1-кітап. Алматы: «Таным» баспасы, 2021. – 88 б.
ISBN 978-601-80815-5-2
Бұл кітапта Алла Тағала жайлы кейбір сұрақтардың жауаптары жасөспірімдерге сай қарапайым, түсінікті тілмен берілген.
Кітап жасөспірімдерге және барша оқырмандарға арналады.
ӘОЖ 28
КБЖ 86.38
ISBN 978-601-80815-5-2
© Қанат Сұлтанбекұлы, 2021
Сөз басы
«Алланы танығым келеді» атты бұл кітапта Жаратқан Иеміз Алла Тағала туралы кейбір сұрақтардың жауаптары жасөспірімдерге сәйкес қарапайым түсінікті тілмен берілген. Бірақ жасының үлкен-кішісіне және білім деңгейіне қарамастан әрбір мұсылман адам үшін бұл кітап пайдалы болады деген ойдамыз.
Балалық шақтан бастап қоршаған ортамызды, адамдарды және әлемді терең ойланып жүреміз. Әрбірімізде бұл әлемді жаратқан Алла Тағала жөнінде біршама сұрақтар туындап, Ол туралы көп нәрселерді білгіміз келген сәттерді бастан өткерсек керек. Қызықтырған сұрақтардың кейбіріне кейде жауап таба алмай, «Тегі, қандай болды екен?» деп көп ойлаған кездеріміз де болады.
Егер де дін ілімін жақсы білген және дұрыс түсіндіре алған кісі бар болса, Алла Тағала жөніндегі сұрақтарға нанымды жауап алсаң болады. Өкінішке орай, кейде ондай ілімді адамдар да, сұрақтарыңа жауаптар да табылмай қалады.
Сұрақтар ойлануға жетелейді. Ал ойлану, ой жүгірту – адам баласының ақыл-ойының жетілуіне жетелейтін асыл қасиет. Қасиетті кітабымыз Құранда «Сендер ой жүгіртіңдер» деп көп қайталанады.
Қасиетті Құран – Алланың кітабы. Одан басқа да Алла Тағаланың әлем атты кітабы бар. Ол екеуін жақсы оқып, терең ойлануға бұйырылғанбыз. Айтқымыз келгені, Алла Тағала жөнінде ойлану да, Алла Тағаланың аталған екі кітабын зерделеп оқып, олар туралы ой жүгірту де өте маңызды.
Негізі, оқи білсең, әрбір адам – бір кітап; әрбір оқиға, әрбір құбылыс, тіпті әлемдегі әрбір нәрсе, әрбір жасуша және әрбір атом – бір кітап! Өкінішке орай, бұл жағынан көпшілігіміз сауатсыз болып қалдық. Бұл – біздің үлкен кемшілігіміз.
Әзірге біз ең қарапайым кітаптарды – қолымыздағы адамдар тарапынан жазылған қағаз кітаптарды жақсы оқи алсақ, сол да игілік болмақ. Өйткені қарапайым болса да кітап оқымаған адамдар – басқа тірі жандылардан онша айырмасыз өмір сүріп өтеді деседі...
«Кітап – ең жақсы дос және ең керемет ұстаз» дегендей, қолыңыздағы кітаптан бұл дүниеге жаңа сұрақтарымен қадам басып келген жасөспірімдер Жаратқан Алланы танып білуде өз сұрақтарына жауап табады деген ойдамыз.
Аталған сұрақтар ең көп қызығушылық тудырған сұрақтардың арасынан таңдалып алынған. Әлбетте, әр адамның ойына әртүрлі сұрақтар келуі мүмкін. Ол сұрақтардың жауаптарын басқа кітаптардан табу мүмкін деген үмітпен барлығыңызға бекем иман, жарқын келешек тілейміз!
Жас достар, сендерді Алла Тағала Өзі қолдап, екі дүниеде игіліктер нәсіп болсын!
Қысқа әңгіме
Кішкентай ұлым кеше маған:
– Алла не үшін бізге көрінбейді, әке? – деп сұрақ қойды.
Ұлымнан мұндай сұрақты күтпеген едім, не деп жауап беруді білмей қалдым. Негізі, бұл сұрақтың жауабын да білетінмін. Бірақ:
– Не... – деген күйі тоқтап қалдым.
Ұлым да бақырайған көзін жыпылықтатып, маған қадала қарап қапты. Оның көздері «болыңыз, тез жауап беріңізші» дегендей көрінді. Сөзді басқа жаққа бұрып:
– Сенің көзің кішкентай, Алла болса өте үлкен, сондықтан көре алмайсың, – деп құтылдым.
– Аа-а, солай ма?! – деп, қолындағы ойыншығын көтеріп, ештеңе болмағандай бөлмесіне кіріп кетті.
Бәлкім, мұндай шақтағы балалар үшін менің берген жауабым жеткілікті болуы мүмкін. Бұл жауаппен екі ыңғайсыз жағдайдан уақытша шыққандай болдым. Бірақ балам есейген сайын Жаратқан Алла туралы жаңа сұрақтарды қоятыны белгілі болды. Ол сұрақтарға қазірден дайындалуым керек. Бұл кітапты жазуыма да ұлымның кенеттен қойған «Алла не үшін көрінбейді?» деген сұрағы себеп болды. Сөйтіп, ұлымның есейгенде Алла туралы қоятын сұрақтарына жауап іздеуге кірістім. Оның үстіне, кітап оқығанды үйреніп алғаннан кейін, бұл кітапты өз бетінше оқып, түсініп алады емес пе?
Бұдан басқа көптеген адамдар бұл сұрақтарды көп ойлануы мүмкін. Кейбіреулері жауабын іздеп табады. Кейбірі «мұндай сұрақтардың жауабы болмайды» деп құтылады. Бірақ ойымызға түйетін нәрсе: «Егер ақылымызда бір сұрақ пайда болса, оның міндетті түрде жауабы болады». Иә, ұлылар да осыған ұқсас сұрақтарды береді. Сондықтан бұл кітапты ата-анаңыз да қиналмай алатын сөреге қойыңыз.
Сіз кітапқа үңіліп кіргенге шейін ұмытпауыңыз керек болған тағы бір нәрсені айта кетейін: «Сұрақ сұраудан еш уақытта қорықпаңыз және бас тартпаңыз». Әрбір сұрақ сізге жаңа есіктерді ашады. Ал ол есіктердің артында әртүрлі жаңа дүниелер тұрады.
Сізден сұралған сұрақтардан да ешқашан қорықпаңыз және қашпаңыз. Сұраққа терең бойлап, оның ұшын тарта берсеңіз, артынан бір жауап шығады. Әлбетте, дұрыс жауапты алып шығу үшін көбірек оқып, жалықпай ізденіңіз.
Оның үстіне сұрақ қою дұға қылғанмен парапар. Сондықтан көп-көп дұға қылыңыз, ақылыңыз бен жүрегіңіз білімнің нұрымен нұрлансын.
Жолыңыз әрдайым жарық болсын!
Сәттілік!
Алла Тағала не үшін көрінбейді?
Алла Тағаланы шын көруді қаласаң, тартынбастан: «Мен Алланы көргім келеді!» – деп айт. Өйткені мен де Алланы қатты көргім келеді.
Қалайша жарқыраған Күнді жер жүзінің үстіне лампа сияқты іліп қойған Алланы көргім келмесін?!
Қараңғы түнді Аймен жарық қылып, миллиардтаған жымыңдаған жұлдыздар арқылы аспанды әсемдеп қойған Алланы көруге қалайша қызықпайын?!
Бұл дүниеге көз жүгірткен адам ғаламшарлардың үп-үлкен баскетбол добы сияқты ғарышта қалқып жүргенін көреді. Жо-жоқ, қалқып емес, бұл ғаламшарлар қатты жылдамдықпен Күнді айналып жүр. Мен де Жер шарын осынау алып ғарышта құлатпай айналдырып тұрған Алланы әлбетте көргім келеді.
Аспанның бетін көкпеңбек қылып мінсіз әсемдеп қойған Алланы көруге ынтызар болмай қою мүмкін бе? Көкпеңбек аспанда қалқыған бұлттарды ары-бері ұшырған және ішінде көл мен теңіздердей үлкен көлемдегі суды сыйдырып қойған Алланы көруге кім қызықпасын?
Бұлттардан тамшы-тамшы жаңбыр жаудырған, әрбір түскен қар ұшқынын екіншісіне еш ұқсатпай, әдемі және өзгеше қылып жаратқан Алланы тану және Оны көруден де қызықты не болуы мүмкін?
Айналаңыздағы бау-бақшаларға қараңызшы? Топырақтың астындағы тамырларымен кір суды ішеді. Бірақ оның бұтақтарында мың бір түрлі жеміс-жидектер, тәтті өріктер, дәмді алмалар, шекердей алмұрттар, анарлар... өседі. Бұлардың бәрін жасаған Алланы көруді кім қаламасын?..
Иә, Алла Тағала не үшін көрінбейді? – деп сұрауға ақың бар. Оны көруді қалағаның дұрыс-ақ. Мен сені түсініп тұрмын!
Мен де Алланы көруді қалаймын. Одан сайын жақыннан тануды
