Алла Тағала жайлы ойландырған сұрақтарға жауаптар

Алланы танығым келеді

Өзкан Өзе

Алматы, 2021

ӘОЖ 28

КБЖ 86.38

Ө 46

ҚР Ақпарат және қоғамдық даму министрлігі

Дін істері комитетінің дінтану

сараптамасының оң қорытындысы берілген

Аударған: Қанат Сұлтанбекұлы

Өзкан Өзе

Ө 46 Алланы танығым келеді. 2-кітап. Алматы: «Таным» баспасы, 2021. – 88 б.

ISBN 978-601-80815-4-5

Бұл кітапта Алла Тағала жайлы кейбір сұрақтардың жауаптары жасөспірімдерге сай қарапайым, түсінікті тілмен берілген.

Кітап жасөспірімдерге және барша оқырмандарға арналады.

ӘОЖ 28

КБЖ 86.38

ISBN 978-601-80815-4-5

© Қанат Сұлтанбекұлы, 2021

Ойландырған сұрақтарға тұшымды жауаптар

Есіңде болса, алдыңғы кітапта «Бас қатырған сұрақтардың жауабы сөзсіз табылады» деп айтқан едік.

«Сұрақтардан ешқашан қорықпаңыз және қашпаңыз. Керісінше, оның ұшын тарта берсеңіз, артынан міндетті түрде бір жауап шығады» деген болатынбыз.

Бұл жай айтыла салған сөз емес еді. Өзім анық сенгенім үшін айтқанмын. Жеке өзім осы күнге дейін ешбір сұрақтан қорыққан емеспін.

Басымды қатырған күрделі сұрақтардан да қорыққан жоқпын.

Миымда қандай сұрақ пайда болмасын, міндетті түрде жауабы табылады деп сенемін.

Құдай Тағала ойымда бір сұрақ туындаса, демек, қайсыбір жерде мені күткен жауабы да бар деп білем. Бірақ сол жауапқа жету үшін әрекет етуіміз керек. Өйткені жауап дегенің бағалы нәрсе. Ал енді әрбір бағалы нәрсеге жету үшін тынымсыз әрекет, қажымас қайрат керек.

Ойланып көрші! Сен қызықпаған сұрақтың жауабы саған өзі-ақ келсе, оның қандай бағалы екенін де байқамайсың. Бірақ сен қатты қызығып, жауабын тапсам екен деп шешілген түйінді мәселенің жауаптары қандай бағалы екенін жақсы білесің.

Мысалы, лампочка жасаудың жолын табу үшін мыңдаған мәрте тәжірибе жасаған Эдисон емес, қайсыбір қора сыпырғыш кездейсоқтан біліп қалса, қуаныштан төбесі көкке жетіп, дереу лампочка жасап жібереді емес пе? Жоқ! Өйткені ол өзін қызықтырмаған сұрақтың жауабына да бейжай қарайды.

Үлкен жауаптардың қадірін үлкен сұрағы барлар ғана біледі. Әсіресе сол үлкен сұрақтардың жауабын табам деп мысы құрып, әбден мазасызданғандар жақсы біледі…

Олай болса, қане, келіңдер, сұрақтардың артынан түсіп, шаршап-шалдықпай, ізденіп отырып, артынан қандай жауаптар шығарын көрейік!

***

«Алланы танығым келеді» атты бірінші кітапта Жаратқан Иеміз – Алла Тағала туралы біз қызыққан кейбір сұрақтардың жауабын беруге әрекет қылдық. Ол сұрақтар:

– Алла Тағаланы неге көрмеймін?

– Алла Тағала қаншалықты ұлы?

– Алла Тағала қайда?

– Алланы кім жаратты?

– Алланы қалай тани алам?

– Алла неге жалғыз?

– Алла бір сәтте сансыз көп істерді қалай жасай алады?

– Алла жеміс жарату үшін неге оның бағын жаратады?

– Алла Тағала жаратса, онда табиғат қандай қызмет атқарады?

Біз сенімен ұзақ-ұзақ сөйлесіп, бұл сұрақтардың жауаптарын табуға әрекет жасаған едік. Бұлар шынында да өте маңызды сұрақтар еді. Соған қарамай, біз жауап іздеп, әрекет жасап көрдік. Алла Тағала бізге олардың жауаптарын тарту етті.

Міне, енді Жаратқан Иемізді екеуіміз де танып қалдық. Оған бұрынғыдан да бекем, күмәнсіз сендік.

Бірақ сенің ойыңда тағы жаңа сұрақтар пайда болып жатқандай. Дұрыс па? Онда кел, сенімен қайтадан бірге отырайық.

Сұрақтардың артына түсіп, бізді қандай жауаптар күтіп тұрғанын жақында көреміз…

Алла Тағала бұл әлемді неге жаратқан?

«Біз көк пен жерді һәм екеуінің арасындағы бар нәрсені бекерден бекер, мақсатсыз (яғни адамдар нәпсіге еріп, білгенін істесін деп) жаратпадық!»

(Сад сүресі, 27).

Сен өте шебер суретші болдың дейік. Қағаз бетіне қаламыңды жүргізіп, ешкім сала алмаған әдемі гүлдердің, бау-бақшалардың және әртүрлі көріністердің суретін салып қойдың.

Бірақ сен салған суреттердің біреуін де көрмей тұрып, сенің шебер суретші екеніңді ешкім ешқашан білмейді.

Демек, өзіңнің шеберлігіңді, өнеріңді, тасыған талантыңды жалғыз өзің ғана білесің. Басқалардың онымен ісі де жоқ.

Егер сол өнеріңді басқалар да көрсін, білсін, бағаласын десең, онда салған суреттеріңді ел-жұртқа көрсетуің керек.

Мәселен, сурет көрмесін ашасың. Сосын ол көрмеге жұртты шақырасың. Кісілер көрмеңе келіп, сен салған әдемі суреттерді көреді. Сөйтіп, біз бәріміз сенің тамаша суретші екеніңді біліп, таңданып мақтаймыз. Шығармаларыңды тамсанып көреміз.

Сенің суретшілігіңе қызығып, баға беріп, тіпті әрбір портретіңді үңіліп зерттейміз.

Бақтарды қандай әдемі салғаныңды, гүлдерді қандай бояғаныңды, қыл қаламды бір-екі сілтеумен аттарды тулатып әдемілеп салғаныңды, қояндарды өте сүйкімді етіп салғаныңды… Мүмкін болғанша ешбірін қалдырмай қарап шығып, мақтай бастаймыз.

Қысқасы, өзіңді жұрт білсін, көпшілік танысын десең, шеберлігіңді және бағалы шығармаларыңды басқалардың да көргенін қаласаң, онда суреттеріңді жайып, көрме ашуың абзал.

Міне, дәл сол секілді Алла Тағала бұл әлемді жаратпай қойса, онда біз оны ешқашан біле алмас едік. Өйткені әлемдегі басқа барлық нәрселер сияқты, біз де жоқ болатын едік.

Онда Алла Тағала қандай ұлы Жаратушы екенін бір Өзі ғана білер еді.

Бір ғана Алла Тағала бар болушы еді…

Өйткені Алла Тағаланың Өзі ғана бар еді. Басқа ештеңе жоқ еді.

Алла Тағала ештеңені жаратпай тұрған кезде де Жаратушы еді.

Бұны бір Өзі ғана білуші еді.

Аспандағы жұлдыздардың саны жер бетіндегі құмдардың санынан да көп. Сол жұлдыздарды жаратудан б