Дайындаған: Елмұрат Ораз

«Шабыт» баспасы

Алматы, 2022

Көрұғлы мен Безерген

(Белгісіз жыршы нұсқасы)

Көрұғлының жүз жиырмаға келген кезінде екі қауіпті жауы бар екен. Бірі — қызылбас Безерген батыр. Екіншісі — қалмақ Көбікті екен. Текежәуміт елін шауып аламақ болып Безергеннің он екі мың қолымен келе жатқанын Көрұғлы естиді, сонда Көрұғлы: «Әлім келсе жақсы, келмесе бек ұят іс болар, не де болса алдынан шығып көрейін», — деп Ғиратына мініп, жағын жібекпен таңып, Безергеннің алдына келеді. Сонда Безерген Көрұғлының Ғиратын танып, аттың үстіндегі кісіні «Көрұғлы» деуге қомсынып, оған айтқан сөзі екен:

— Мен таныдым Көрұғлының аттарын,

Қайда кетті Көрұғлыбек заттарым?

Қызылбаста Безерген ер боламын

Шапсам керек түркіменнің халықларын.

Ғират мініп қайсы жаққа барасың,

Көрұғлының жайын баян қыласың?

Атың танып, танымадым мен сені,

Әй, жігітім, қайсы жаққа барасың?!

Сонда Көрұғлы «мен оның құлымын» деп жауап берген екен: