Дайындаған: Елмұрат Ораз

 

«Шабыт» баспасы

Алматы, 2022

Ғират жайы, Көрұғлының Райхан арабпен соғысы

Ғаждамбек аң аулауға сайланады,

Құшақтап Көрұғлыны аймалады.

Баршагүл шыбын жанын пида қылад,

Көреді мұнан артық қай баланы.

Көрұғлы сол уақытта он үш жаста,

Бала жоқ тағасында мұнан басқа.

Ғаждамбек аңға шығып кеткен кезде,

Ат мініп келді біреу бір көк қасқа.

Аты бар көк қасқалы біреу келді,

10 Көрұғлы назар салып қарайды енді.

Наз бедеу қарап тұрса бір тікуар,

Сол атқа ашық болып көңіл бөлді.

Сол атқа Көрұғлының ышқы кетіп,

Биеме шаптырам деп қайтсем нетіп.

«Ей, аға, боз биеме бір шаптыр» деп,

Бала айтты бұл жігітке жауап етіп.

— Аға, сенің мен білмеймін атыңды,

Қайсы русың, білдіріп қой затыңды.

Мен айтамын сізге арыз-датымды,

20 Жаным аға, боз биеме бір шаптыр.

Құмар болдым құралайдай көзіне,

һұшым кетті әсте оның ізіне.

Әрне десең берем тауып өзіңе,

Жаным аға, боз биеме бір шаптыр.

Өзін білген уәдесінен тая ма?

Жақсы кісі сыртқа сырын жая ма?

Бір шабуға айғырыңды аяма,

Жаным аға, боз биеме бір шаптыр.

Бір шабуға сізден, аға, сұраймын,

30 Шаптырар деп бетіңізге қараймын.

Әрне десең бұйрығыңа жараймын,

Жаным аға, боз биеме бір шаптыр.

Райханның сонда айтқан гәптері-ай:

— Мені білің араб жұрттың бектері-ай.

Айғырымның өте асыл тектері-ай,

Қалағаным берсең, балам, шап деді-ай.

Туған құлын жаман болмас затынан,

Бір құлыны мың тілләлық шетінен.

Мен шаптырам Көкқасқамды, балақай,

40 Бір сүйдірсең жеңешеңнің бетінен.

Қабыл болсын, бала, сенің тілегің,

Өзім дағы ынтық болып жүр едім.

Мен шаптырам Көкқасқамды, балақай,

Бір ұстатсаң жеңешеңнің білегін.

Жомарт адам уәдесіне жетеді,

Көрұғлының атқа ышқы кетеді.

Баршагүлдің ұстатпаққа білегін,

Арабпенен бала уағда етеді.

Арабпенен бала уағда байласты,

50 Атты көріп ақылынан адасты.

Боз биені көргеннен соң Көкқасқа,

Оқыранып шабайын деп жанасты.

Боз биеге шапты барып Көкқасқа,

Көрұғлының мақсаты сол бір асса.

Басын тартты назыл болар уақытта,

Қиял ойлап Райхан араб бір басқа.

Жарты асылы боз биеде қалады,

Жарты асылы жерге барып тамады.

Тақиясымен тосып алып Көрұғлы,

60 Боз биеге қайта апарып салады.

Райхан араб сонда тұрып күледі,

...