автордың кітабын онлайн тегін оқу Мы любім даўнія паданьні
Уладзімер Жылка
Мы любім даўнія паданьні ...
* * *
Мы любім даўнія паданьні,
Быліцы сівых песьняроў.
Няхітры іх апавяданьні
Аб справах мінулых часоў.
Нам даспадобы чэрпаць веду
Гісторыі з пажоўклых кніг;
З рукопісаў пра быт прадзедаў
Даведацца, што сьведчыць мніх.
Прыемна нам дзядоў надзеі,
Іх тайны думы адзначаць,
Вялікія ў мінулым дзеі,
Дзе й як змагалась наша раць.
Шануем мы бацькоў імёны:
Навука й прыклад нам яны;
І помнім мы і веча звоны,
І вольнасьць роднай стараны;
І нат мамэнты заняпаду –
Ў далёкім сумныя лісты –
Распазнаваць нас вучаць здраду
І родзяць помсты гнеў сьвяты.
Але нам будуць ўсё ж мілейшы
Часы, калі зь нізін, балот
З надзеяй ў шчаснасьць дзён сьвятлейшых
Устане ўзбуджаны народ.
Не відна йшчэ у завірусе,
Куды ляжыць ягоны шлях,
Але дух творчы ў Беларусі
Жыве й змагае долі жах.
І, можа, толькі той збаіцца
Падзей вялікіх нашых дзён,
У кім жыцьця не б'е крыніца,
Хто сьпіць і здолець недуж сон.
1921
