Валеры Маракоў

Песнi, песнi юнацкага слова

Песнi, песнi юнацкага слова,—

Вам шырокi, як радасць, прастор.

Па-над вёскай i горадам новым

Вашы струны ткуць сонца узор.

Я падслухаў вас ў цiхiх калоссях,

Пад бярозамi радасных нiў,

Калi сэрца агнём абвiлося

У жыццёвыя хвалi крынiц…

Вашых думак — аб сонцы i раннi —

Кiнуў я тады вольны прыбой,

Дзе ўзнiмалiся горда курганы,

На курганах шаптаў сiнi бор!..

I цяпер, калi горад шумлiвы

Ўскалыхнуў у грудзях гул машын,

Усё роўна пяю я пра нiвы,

Пра вясковыя рысы душы…

Песнi, песнi юнацкага слова —

Вам шырокi, як радасць, прастор…

Па-над вёскай i горадам новым

Вашы струны ткуць сонца узор.