Хазірет Мұсаб ибн Ұмәйр (радиаллаһу анһу)

Қуанышты жыл

Мәдиналық мұсылмандардың талабын ескерген Пайғамбарымыз (саллаллаһу аләйһи уә сәлләм) оларға Ислам дінін үйрететін мұғалім ретінде Мұсғаб ибн Ұмәйрді (р.а.) жібермек болды. Мұсғаб Ислам тарихында асыл дінімізді үйрету үшін тағайындалған алғашқы мұғалім ретінде аты қалды.

Жол әзірлігін қысқа уақытта тамамдаған Мұсғаб Пайғамбарымызбен тез қоштасып, Мәдинаға жүріп кетті. Мәдиналықтар Мұсғабтың келгеніне қатты қуанды. Енді дінімізді кеңірек танитын болдық, иманымыз кемелденіп, құлшылығымыз артатын болды деп үміттенді.

Мұсғаб Мәдинада алғаш мұсылмандықты қабылдаған Әсад ибн Зүрараның үйіне түсті. Мәдина-лықтар мүмкіндігінше Мұсғабты жалғызсыратпауға тырысты.

Пайғамбарымыздың (саллаллаһу аләйһи уә сәлләм) Меккеден Мәдинаға мұғалім жібергендігі жайлы хабар қысқа уақыттың ішінде шартарапқа жайылды. Мұсғабпен танысып, дидарласу үшін Әсадтың үйіне келушілер көбейді. Келгендер Мұсғабтың уағызын тыңдап, әңгімесіне мұқият құлақ салып отыратын. Тыңдап отырып көкейлеріндегі сауалдарын да қоятын.

Мұсғабты (р.а.) көргендер оған таң қалмай кетпейтін. Жасы 18-ге енді ғана толған бозбала тап-таза, әрі ұқыпты киінуімен еріксіз көз тартатын. Түр-тұлғасы өте тартымды еді. Сөз сөйлеу әдебі де тыңдағандарды өзіне үйіріп әкететін. Өзіне қойылған сұрақтарға барынша түсінікті етіп жауап беретін. Дауысы да құлаққа жағымды еді. Келген қонақтарға қоңыр дауыспен Құран оқып беретін. Мұсғабтың уағызын тыңдағандардың көпшілігі сол жерде-ақ шаһадат кәлимасын айтып, мұсылмандықты қабылдайтын.

Мәдинада мұсылмандардың саны күн өткен сайын арта берді, бірақ бұны көре алмаушылар да шықты. Бұлардың ең ықпалдысы – Мұсғабты үйіне жайғастырған Әсадтың нағашы әпкесінің ұлы Сағыд ибн Муаз еді.

Сағыд Мәдинадағы бірнеше үлкен тайпаның бірінің көсемі, аумағы кең бір қауымның басшысы еді. Күн сайын Мұсғабты тыңдау үшін ел-жұрттың ағылып сол жаққа бара жатқанын көргенде, Сағыд іштей қызғанышпен қарайтын. Өз-өзіне: «Әсадты