Салих Юсуфоглу

 

ОТБАСЫ ӨЗІҢНЕН БАСТАЛАДЫ!

(ОТБАСЫ БАҚЫТЫНа АРНАЛҒАН 33 КЕҢЕС)

 

Аударған: Жаннұр Таласбаева

 

Алматы, 2020

ӘОЖ 28

КБЖ 86.38

Ю 91

ҚР Ақпарат және қоғамдық даму министрлігі

Дін істері комитетінің дінтану

сараптамасының оң қорытындысы берілген

Кітап төмендегі түпнұсқадан аударылды:

С.Юсуфоглу. Семья начинается с тебя! (33 секрета счастья). – Алматы: Издательство «Көкжиек», 2020. – 78 с

Аударған: Жаннұр Таласбаева

Юсуфоглу Салих

Ю 91 Отбасы өзіңнен басталады (отбасы бақытына арналған 33 кеңес). – Алматы: «Таным» баспасы, 2020. – 78 б.

ISBN 978-601-80804-1-8

Қолыңыздағы кітапта отбасындағы татулық пен береке-бірлікті нығайтатын 33 пайдалы кеңес берілген. Олардың барлығында қасиетті Құран Кәрімде бұйырылған тәлім-тәрбие бар. Сонымен қатар Алла Тағаланың ақырғы елшісі, адамзаттың ардақтысы Мұхаммед пайғамбардың (с.а.с.) үлгі-өнегеге толы өмірбаянынан сыр шертеді.

Барлық оқырмандарға арналған.

Кітапта мынадай қысқарған сөздер кездескен:

с.а.с. – «саллаллаһу аләйһи уә сәлләм» деген тіркестің қысқарған нұсқасы, «оған Алланың игілігі мен сәлемі болсын» деген мағынаны білдіреді.

а.с. – «аләйһис сәләм» тіркесінің қысқарған нұсқасы (көпше түрі – аләйһимус сәләм), «Оған/Оларға сәлем болсын» дегенді білдіреді.

р.а. – «радиаллаһу анһ/анһа» тіркесінің қысқарған нұсқасы (көпше түрі – «анһум»), «Оған/Оларға Алла разы болсын» деген мағынаны білдіреді.

ӘОЖ 28

КБЖ 86.38

© «Таным» баспасы, 2020

Кіріспе

Қымбатты оқырман!

Қолыңыздағы кітап «Менің отбасым» журналындағы «Пайдалы кеңестер» айдарынан алынған мақалалардан құрастырылды. Көпшілікке танымал «Менің отбасым» журналының жүз мыңдаған оқырманы бар. Бұның бір себебі – журналдың оқырмандарына жүйелі түрде ақыл-кеңес бере алуы. Ал екінші себебі – кеңестердің күнделікті тұрмыс-тіршілікке жарамдылығында. Отбасы жайлы айдардың мақсаты үй ішіндегі өзекті мәселелерге нақты өлшем беруге көмектесу болатын. Бұл кітапқа 33 кеңес таңдап алынды. Олардың барлығы қасиетті Құран Кәрімде бұйырылған тәлім-тәрбие жолдары әрі Алла Тағаланың ақырғы елшісі, адамзаттың ардақтысы Мұхаммед пайғамбардың (с.а.с.) көрсеткен үлгісі турасында болады.

Ал енді сіздерді рухани байытып, жүрегіңізді нұрландыратын, ой-өрісіңізді кеңейтетін, үміттің сөнбес шамшырағы болатын, уайым мен үрей билеген жан дүниеңізді емдеп, тыныштық сыйлайтын дана ойлар мен өнегелі оқиғалар желісімен танысуға шақырамыз.

Салих Юсуфоглу

1

Жақсы көретінімізді білдіре жүрейік

Адамзаттың ардақтысы Расулалла (с.а.с.): «Кімде-кім Алла разылығы үшін жақынын жақсы көрсе, онда оған жақсы көретінін білдірсін» деп насихат еткен. Ал біз жақындарымызға, достарымызға және көршілерімізге бұл ізгі сезімімізді білдіреміз бе?

Кейбір адамдар біреуді сүюден және сүйікті болудан қорқатындай. Сүйген адамына жақсы көретіні жайлы айтуға батылы бармайды. Алайда жақтырмай қалғанын немесе ашуын оңай білдіреді, тіпті бейәдеп тіл қатуға дейін барады. Бірақ мейірімділік танытып, жұмсақ сөйлеуге тәуекел етпей жатамыз. Шынымен, «Не айтасың, күнім?!» деп көркем тіл қатудың орнына «Жап аузыңды!» деп жиі жекіреміз. Арадағы сенімді нығайтатын «Біз бар қиындықты бірге жеңе аламыз!» сөзіне қарағанда «Баршы ана жаққа!» дегенді көбірек қолданамыз. «Сен – ғажапсың!» дегенімізден гөрі «Құрсыншы!» деген сөзіміз көп. Адамзаттың асыл тәжі Пайғамбарымыз (с.а.с.) осыны өсиет етіп пе еді? Ол (с.а.с.): «Кімде-кім Алла разылығы үшін жақынын жақсы көрсе, онда оған жақсы көретінін білдіртсін» деді емес пе?! Алла Елшісі Мұхаммед (с.а.с.) өсиет еткендей, сүйіктілерімізге «Мен сені жақсы көремін» деп айтудың міндет екенін естен шығармайық. Алла разылығы үшін жақсы көретінімізді қанша адамға айттық? Бір сәт ойланып, есімізге түсіріп көрейікші? Ал осы бір керемет, жанға жылу беретін сөздерімізбен қанша рет біз жұбайымызға, ата-анамызға, іні-қарындастарымызға, балаларымызға, көршілерімізге, жұмыстағы әріптестерімізге ілтипат білдірдік? Енді қанша рет оларға дауыс көтергенімізді, дөрекі сөйлегенімізді, артынан жаман сөздер айтқанымызды еске түсіріп, салыстырып көрейікші? Таразы басы не дейді?

Өзімізді «Мен сені жақсы көремін!» деп айтуға үйретейік

«Ағраф» сүресінің 16 және 17-аяттарында әзәзілдің адамды Алланың хақ жолынан тайдыру үшін барын жасайтыны айтылған. Бәлкім, адамзаттың қазіргі кездегі қиындықтары әзәзіл малғұнға өз еркімен тізе бүгудің салдарынан болар. Аталмыш хадисті өміріміздің бір бөлшегіне айналдырып, хақ жолдан таймай, Алла Тағаланың рақымы мен Елшісінің (с.а.с.) ұнатқан ісін жасайық. Бұның ізгі жолы – жақындарымызға деген махаббатымызды көркем түрде білдірту. Әлемдердің Раббысын разы ететін, Алла Елшісін (с.а.с.) қуантатын, періштелер үлгі алатын, керісінше, әзәзілді ашуландыратын әрекет жасайық. Бар пенденің көкірегінде өмірге, адамдарға, бұл әлемге деген «Мен сені жақсы көремін!» деген достық пен сыйластық сөзі жайылсын! Суық жүректерді жылыту үшін, айнала әсемдікке бөлену үшін «Мен сені жақсы көремін!» деп, бүкіл әлем бір ауыздан үн қатсын!

2

Жымию арқылы ізгі іс жасаңыз әрі айналаңызға қуаныш сыйлаңыз

Күлгенде беттегі бұлшық еттердің жиырма шақтысы жиырылып, ал өкпелі немесе наразы түр жасағанда отызы жиырылатыны ғылыммен дәлелденген. Неге адамдар қиындауын таңдайды екен?!

Көпшілігі бақыт енді келетіндей күту сезімімен жүреді, бұл – адамдарға тән қасиет, сарыла күткендегі соңғы нүктені өмір жолындағы ең қалаулы тұрақ деп санау әдет сынды. Алайда бұл олай емес, себебі бақыт белгіленген бекет емес, бақыт деп жүрген жолды айтады. Бақытты болу – өз өмірлік жолымыздан бақытты тауып алуға тырысу. Өкінішке орай, қазіргі таңда сенімділік пен тыныштық сезімдерінен нұр шашып жүрудің орнына өмірге өкпелі, наразы түр жасап алып жүретіндер көбейіп кетті. Әлемде күлімдеп жүретіндер түгілі қарапайым амандасатындар да азайып барады. Себебі тіпті амандасуды ұмытып, бір-біріміздің жанымыздан өте шығатын кездер сирек емес. Адамдар біздің қабағымыздан қар жауған келбетімізді бұдан артық көргісі келмей алыстай беруі мүмкін. Қабағымыздың қатулы болуы беттегі бұлшық еттерге көбірек күш салуды талап етсе де, қыңыр келбет жасауға құмармыз. Ғалымдардың айтуы бойынша, жымию бет бұлшық еттерінің жиырмасының жиырылуын тудырса, қабақ шытып, көңілсіз болу бет бұлшық еттерінің отызын жиырады екен.

Дініміз Ислам және Алла Елшісі (с.а.с.) бізге ізгілік қалаушылардан және жақсы мінез иелерінен болуға кеңес береді: «Мұсылманның мұсылман бауырына күліп қарауының өзі садақа болады (яғни, сауапқа кенеледі)». Адамзаттың ардақтысы Мұхаммед пайғамбарға (с.а.с.) мұндай әдеп өмірлік ұстанымға айналған, сондықтан пайғамбарлық міндетіне дейін де адамдар оны «сенімді, адал» деген мағынада «Әмин» деп атағаны таңғаларлық емес. Мұндай тамаша қасиеттерге жылы шырайсыз әрі әркез өмірге налып жүретін адамның ие болуы екі талай.

Жиі жадырап жүру керек...

Егер Алла Елшісі (с.а.с.) бізге «жымию – садақа» десе, неге қазірден бастап ізгі амал жасамасқа? Басқаларға да күлкі сыйлап, өзгелердің бізге деген сенімін бекіте түсіп, әрі өзімізге деген сенімділікті де неге арттырмасқа? Сіз «Қалайша?» деп сұрауыңыз мүмкін. Мысалы, таңертеңгісін жақындарыңызды ұйқыларынан оятқан кезде күлімсіреңіз! Таңғы ас кезінде де күлімдеңіз, жұмысқа не үйге бара жатқан жолда, кеңсеңіздің есігін ашып жатқанда, әріптестеріңізді не таныстарыңызды кездестіргенде күлімсіреңіз! Көшеде серуендегенде, сауда жасағанда жадырап жүріңіз, көлігіңізде не автобуста болсын күлімсіреңіз! Көршілеріңіз бен клиенттеріңізге, жақсы көрген адамдарыңызға, тіпті ренжіп қалған адамдарыңызға болсын жымия қарап, жылу беріңіз! Басқаша айтқанда, қандай амал жасасаңыз да күліп жасаңыз. Сол кезде өміріңіздің қалай өзгергенін білмей де қаласыз.

3

Жақындарыңызды құттықтауды ұмытпаңыз